ଭୁବନେଶ୍ୱର,୩।୯(ବ୍ୟୁରୋ): ଚାଷୀଙ୍କ ନାଁରେ ସବ୍ସିଡି ଉଠାଇ ୬ କୋଟିରୁ ଊର୍ଦ୍ଧ୍ୱ ଟଙ୍କା ଠକେଇ ଅଭିଯୋଗ ହୋଇଥିଲା। ମାମଲାର ତଦନ୍ତ କରି କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧି ଶାଖା(ଇଓଡବ୍ଲ୍ୟୁ) ଶୁକ୍ରବାର ଜଣେ ଅଭିଯୁକ୍ତଙ୍କୁ ବାଲେଶ୍ୱରରୁ ଗିରଫ କରିଛି। ସେ ହେଲେ ବାଲେଶ୍ୱର ସଦର ଥାନାର ଶ୍ରୀନାଥ ରାଣା। ଏହି ଠକେଇରେ ଏକାଧିକ ବ୍ୟକ୍ତିଙ୍କ ସମ୍ପୃକ୍ତି ଥିବା ନେଇ ଅଧିକ ତଦନ୍ତ ଚାଲିଥିବା ଇଓଡବ୍ଲ୍ୟୁ ପକ୍ଷରୁ କୁହାଯାଇଛି।
ମିଳିଥିବା ସୂଚନା ମୁତାବକ, ବାଙ୍ଗାଲୋରରେ ଥିବା ଭରୁଷାପ୍ରିୟ ଏଗ୍ରୋଟେକ୍ ପ୍ରାଇଭେଟ ଲିମିଟେଡ୍ କମ୍ପାନୀର ବ୍ରାଞ୍ଚ ଅଫିସ ବରମୁଣ୍ଡାରେ ରହିଛି। ଉକ୍ତ କମ୍ପାନୀରେ ଅଭିଯୁକ୍ତ ଶ୍ରୀନାଥ ରିଜୋନାଲ ମ୍ୟାନେଜର ଭାବେ ୨୦୧୮ରୁ ୨୦୨୦ ମଧ୍ୟରେ କାର୍ଯ୍ୟ କରୁଥିଲେ। ତେବେ କମ୍ପାନୀ ଓଡ଼ିଶା ସରକାରଙ୍କ ସହ ଅନୁବନ୍ଧିତ କରି ଚାଷୀମାନଙ୍କୁ ଧାନରୁଆ ଯନ୍ତ୍ର ଯୋଗାଉଥିଲା। ପ୍ରତି ଧାନରୁଆ ଯନ୍ତ୍ରର ଦାମ ୨ ଲକ୍ଷ ୩୩ ହଜାରରୁ ୩ ଲକ୍ଷ ମଧ୍ୟରେ ହୋଇଥିବା ବେଳେ ସରକାର ଚାଷୀମାନଙ୍କୁ ୯୩ ହଜାରରୁ ଦେଢ ଲକ୍ଷ ଟଙ୍କା ପର୍ଯ୍ୟନ୍ତ ସବ୍ସିଡି ଦେଇଥାନ୍ତି। ତେବେ ଅଭିଯୁକ୍ତ ଶ୍ରୀନାଥ ଚାକିରି ସମୟରେ ୫୦୦ରୁ ଊର୍ଦ୍ଧ୍ୱ ଧାନରୁଆ ଯନ୍ତ୍ରର ମିଛ କାଗଜପତ୍ର କରି ଚାଷୀଙ୍କୁ ବିକ୍ରି କରାଯାଇଥିବା ଦର୍ଶାଇଥିଲେ। ସେ ଚାଷୀମାନଙ୍କୁ ୫ ହଜାରରୁ ୪୦ ହଜାର ଟଙ୍କା ସବ୍ସିଡି ଦେଇ ବଳକା ଅର୍ଥ ହଡପ କରିଥିଲେ। ଫଳରେ ସରକାର ଓ କମ୍ପାନୀ ୬ କୋଟିରୁ ଊର୍ଦ୍ଧ୍ୱ ଟଙ୍କା କ୍ଷତି ସହିଥିଲେ। ହେଲେ ବାସ୍ତବରେ କୌଣସି ଧାନରୁଆ ଯନ୍ତ୍ର ବିକ୍ରି ହୋଇ ନ ଜଣାପଡିବା ପରେ କମ୍ପାନୀ ନିର୍ଦ୍ଦେଶକ କେ.ଜି ଶ୍ରୀଚରଣ ଜାନୁଆରୀ ୨୦ରେ ଭରତପୁର ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା (ନଂ.୨୪/୨୧) ରୁଜୁ କରିଥିଲା। ପରବର୍ତ୍ତି ସମୟରେ ମାମଲା ଇଓଡବ୍ଲ୍ୟୁକୁ ହସ୍ତାନ୍ତର ହୋଇଥିଲା। ଏନେଇ ଇଓଡବ୍ୟୁ ଏକ ମାମଲା (ନଂ.୧୧/୨୧) ରୁଜୁ କରି ତଦନ୍ତ ଆରମ୍ଭ କରିଥିଲା।
