ନୂଆଦିଲ୍ଲୀ, ୧୬ା୧୧ (ପି.ଟି.): ଆଗାମି ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ୨୦୨୫ ପାଇଁ ଖେଳାଳି ନିଲାମି ନଭେମ୍ବର ୨୪ ଓ ୨୫ରେ ସାଉଦି ଆରବର ଜେଦାହଠାରେ ହେବ। ଏଥିପାଇଁ ଶୁକ୍ରବାର ୫୭୪ ଜଣିଆ ଖେଳାଳି ତାଲିକା ପ୍ରକାଶ ପାଇଛି। ତନ୍ମଧ୍ୟରେ ୩୬୬ ଭାରତୀୟ ଖେଳାଳି ଅଛନ୍ତି। ଖେଳାଳିଙ୍କ ଟପ୍ ବେସ୍ ପ୍ରାଇସ୍ ୨ କୋଟି ଟଙ୍କା ରଖାଯାଇଛି। ଏଥିରେ ରିଷଭ ପନ୍ତ, ଶ୍ରେୟସ ଆୟର ଓ ଅର୍ଶଦୀପ ସିଂଙ୍କ ଚାହିଦା ରହିବ ବୋଲି ଆଶା କରାଯାଉଛି। ନିଲାମିରେ ଭାଗ ନେବାକୁଥିବା ସର୍ବକନିଷ୍ଠ ଖେଳାଳି ହେଲେ ଭାରତର ୧୯ ବର୍ଷ ବର୍ଷରୁ କମ୍ କ୍ରିକେଟର ବିହାରର ୧୩ ବର୍ଷୀୟ ବୈଭବ ସୂର୍ଯ୍ୟବଂଶୀ। ତାଙ୍କ ବେସ୍ ପ୍ରାଇସ୍ ୩୦ ଲକ୍ଷ ଟଙ୍କା ଧାର୍ଯ୍ୟ କରାଯାଇଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପ୍ରଥମେ ୧୫୭୪ ଜଣିଆ ଖେଳାଳି ତାଲିକା ପ୍ରସ୍ତୁତ କରିଥିଲା। ଶୁକ୍ରବାର ଏହୀ ସଂଖ୍ୟା ୫୭୪କୁ ହ୍ରାସ କରିଥିଲା। ଏଥିରେ ବିଦେଶୀ ଖେଳାଳିଙ୍କ ସଂଖ୍ୟା ୨୦୮ ରହିଛି। ବର୍ତ୍ତମାନର ସମସ୍ତ ଭାରତ ଖେଲାଳି ଟପ୍ ବେସ୍ ପ୍ରାଇସ୍ ବ୍ରାକେଟରେ ରହିଛନ୍ତି। ପନ୍ତ ସବୁଠାରୁ ଦାମି ଖେଳାଳି ହେବାକୁ ଯାଉଛନ୍ତି। ତାଙ୍କୁ ହୁଏତ ପଞ୍ଜାବ କିଙ୍ଗ୍ସ ଭଳି ଦଳ କ୍ରୟ କରିପାରେ, ଯାହା ପାଖରେ ଖେଳାଳି କ୍ରୟ ପାଇଁ ସର୍ବାଧିକ ୧୧୦.୫ କୋଟି ଟଙ୍କା ରହିଛି। ଅନ୍ୟ ଯେଉଁ ବଡ଼ ଖେଳାଳିମାନଙ୍କର ଚାହିଦା ରହିବ ସେମାନଙ୍କ ମଧ୍ୟରେ ଆଇପିଏଲ ବିଜୟୀ ଅଧିନାୟକ ଶ୍ରେୟସ ଆୟର, ଦକ୍ଷ ଅନ୍ତର୍ଜାତୀୟ ଟି୨୦ ବୋଲର ଅର୍ଶଦୀପ ସିଂ, କେ.ଏଲ୍ ରାହୁଲ, ମହମ୍ମଦ ଶାମି, ମହମ୍ମଦ ସିରାଜ, ୟୁଜବେନ୍ଦ୍ର ଚହଲ ଓ ଆଭେଶ ଖାନ୍। ଖବର ଅନୁସାରେ ୮୧ ଖେଳାଳି ଟପ୍ ବ୍ରାକେଟରେ ରହିଥିବା ବେଳେ ୨୭ଜଣ ୧.୫ କୋଟି କାଟେଗୋରିରେ ଅଛନ୍ତି। ସେହିପରି ୧୮ଜଣ ୧.୨୫ କୋଟି କାଟେଗୋରିରେ ରହିଥିବା ବେଳେ ୨୩ଜଣଙ୍କ ବେସ୍ ପ୍ରାଇସ୍ ୧ କୋଟି ଟଙ୍କା ରହିଛି। ଇଂଲଣ୍ଡର ଜୋସ ବଟଲର ଏବଂ ତାଙ୍କ ଦେଶର ହ୍ୟାରି ବ୍ରୁକ୍ ଓ ଜନି ବେୟାରଷ୍ଟୋଙ୍କ ନାମ ୧କୋଟି ଟଙ୍କା ବେସ୍ ପ୍ରାଇସ୍ ବ୍ରାକେଟରେ ସ୍ଥାନ ପାଇଛନ୍ତି। ସେହିପରି ଅବସର ନେଇଥିବା ଜେମ୍ସ ଆଣ୍ଡରସନଙ୍କ ବେସ୍ ପ୍ରାଇସ୍ ୧.୨୫ କୋଟି ଟଙ୍କା ରଖାଯାଇଛି। ନିଲାମିରେ ଭାରତରୁ ପ୍ରତିନିଧିତ୍ୱ କରିଥିବା ୪୮ ଏବଂ ନିଜ ଦେଶରୁ ଖେଳିଥିବା ୧୯୩ ବିଦେଶୀଙ୍କୁ ସାମିଲ କରାଯାଇଛି। ବର୍ତ୍ତମାନ ଯୁକ୍ତରାଷ୍ଟ୍ର ଆମେରିକାରେ ବାସ କରୁଥିବା ପୂର୍ବତନ ୧୯ବର୍ଷରୁ କମ୍ ବିଶ୍ୱକପ୍ ବିଜୟୀ ଅଧିନାୟକ ଉନ୍ମୁକ୍ତ ଚାନ୍ଦ ବର୍ତ୍ତମାନ ଜଣେ ସହଯୋଗୀ ସଦସ୍ୟ ରାଷ୍ଟ୍ର ଖେଳାଳି। ସେ ଏବଂ ସିମର ସୌରଭ ନେଥ୍ରାଭାଲ୍କର ସଂକ୍ଷିପ୍ତ ତାଲିକାରେ ସ୍ଥାନ ପାଇ ନାହାନ୍ତି। ସେହିପରି ଏମ୍ଆଇ ଏମିରେଟ୍ସ ତରଫରୁ ଖେଳୁଥିବା ଇଯାଲୀର ଥୋମାସ ଡ୍ରାକା ମଧ୍ୟ ନିଲାମି ତାଲତିକାରୁ ବାଦ୍ ପଡ଼ିଛନ୍ତି।
