ଭୁବନେଶ୍ୱର,୨୯।୮(ସୂର୍ଯ୍ୟକାନ୍ତ ବେହେରା):ରାଜଧାନୀରେ ଜମି ଠକେଇ ଅଭିଯୋଗ ବଢ଼ି ଚାଲିଛି। ଜମି ଦେବା ନାଁରେ ୫୭ ଲକ୍ଷ ଠକେଇ ହୋଇଥିବାନେଇ ଶହୀଦନଗର ଥାନାରେ ଅଭିଯୋଗ ହୋଇଛି। ଠକେଇର ଶିକାର ହୋଇଥିବା ବାଲେଶ୍ୱରର ବନମାଳି ନାୟକ ଏହି ଥାନାଞ୍ଚଳରେ ଥିବା ଏକ ରିୟଲ ଇଷ୍ଟେଟ୍ ସଂସ୍ଥା ନାଁରେ ଏତଲା ଦେବା ପରେ ପୋଲିସ ଆଇପିସିର ଦଫା ୪୨୦ ଓ ୩୪ରେ ଏକ ମାମଲା ନଂ.୩୧୯ ରୁଜୁ କରି ତଦନ୍ତ ଆରମ୍ଭ କରିଛି।
ଅଭିଯୋଗ ଅନୁସାରେ, ବନମାଳି ରାଜଧାନୀରେ ଏକ ଜମି କିଣିବା ପାଇଁ ବୁଝାବୁଝି କରୁଥିବାବେଳେ ୨୦୨୧ ଅଗଷ୍ଟରେ ଚିତ୍ରାସେନ ବେହେରା ନାମକ ଜଣେ ବ୍ୟକ୍ତିଙ୍କ ସଂସ୍ପର୍ଶରେ ଆସିଥିଲେ। ଚିତ୍ରାସେନ ଭଲ ପ୍ଲଟ୍ ଦେବାକୁ କହି ଉକ୍ତ ରିୟଲ ଇଷ୍ଟେଟ ସଂସ୍ଥାର ନିର୍ଦ୍ଦେଶିକାଙ୍କ ସହ ବନମାଳିଙ୍କୁ ପରିଚିତ କରାଇଥିଲେ। ସଂସ୍ଥାର ନିର୍ଦ୍ଦେଶିକା ରାଜଧାନୀ ଉପକଣ୍ଠରେ ଏକ ପ୍ଲଟ ଯୋଗାଇଦେବାକୁ ବନମାଳିଙ୍କୁ ପ୍ରତିଶ୍ରୁତି ଦେଇଥିଲେ। ଏହାପରେ ପାଣ୍ଡରା ମୌଜାରେ ଏକ ୩ହଜାର ବର୍ଗଫୁଟର ଏକ ଜମିକୁ ୬୭ ଲକ୍ଷ ଟଙ୍କାରେ କିଣିବାକୁ ବନମାଳି ରାଜି ହୋଇଥିଲେ। ସେହିବର୍ଷ ଅକ୍ଟୋବର ୨୯ରେ ବନମାଳି ଏବଂ ଚିତ୍ରାସେନ ଓ ରିଅଲ ଇଷ୍ଟେଟ ସଂସ୍ଥା ମଧ୍ୟରେ ଏକ ଚୁକ୍ତିନାମା ହୋଇଥିଲା। ଚୁକ୍ତି ଅନୁସାରେ ଅଗ୍ରୀମ ବାବଦକୁ ବନମାଳି ୧୭ ଲକ୍ଷ ଟଙ୍କା ଓ ରେଜିଷ୍ଟ୍ରେଶନ ପାଇଁ ୧ ଲକ୍ଷ ସେମାନଙ୍କୁ ଦେଇଥିଲେ। ହେଲେ ନିର୍ଦ୍ଧାରିତ ସମୟରେ ସଂସ୍ଥା କୌଣସି ଜମି ଦେଇପାରି ନ ଥିଲା। ପରେ ପାଣ୍ଡରା ମୌଜାରେ ଆଉଏକ ପ୍ଲଟ୍ ଯୋଗାଇଦେବାକୁ କହି ପର୍ଯ୍ୟାୟକ୍ରମେ ପୁଣି ବନମାଳିଙ୍କଠାରୁ ୩୯ ଲକ୍ଷରୁ ଅଧିକ ଟଙ୍କା ନେଇଥିଲେ। ଏହିଭଳି ମୋଟ ୫୭ ଲକ୍ଷରୁ ଅଧିକ ଟଙ୍କା ନେଇଯିବା ପରେ ଜମି ଦେଇ ନ ଥିଲେ। ଏପରିକି ଚିତ୍ରସେନ ଓ ସଂସ୍ଥାର ନିର୍ଦ୍ଦେଶିକା ବନମାଳିଙ୍କୁ ଧରାଛୁଆଁ ଦେଇ ନ ଥିଲେ। ଫଳରେ ବନମାଳି ୨୦୨୩ ଅଗଷ୍ଟ ୮ରେ ଥାନାରେ ଅଭିଯୋଗ କରିବା ପରେ ସଂସ୍ଥାର ନିର୍ଦ୍ଦେଶିକା ୨ ଲକ୍ଷ ଟଙ୍କା ଦେଇ ବାକି ସବୁ କିସ୍ତିରେ ଫେରସ୍ତ କରିବାକୁ ଚୁକ୍ତି କରିଥିଲେ। ସେହି ଅନୁଯାୟୀ, ୧୦ ଲକ୍ଷ ଟଙ୍କା ଓ ୭ ଲକ୍ଷ ଟଙ୍କାର ଦୁଇଟି ଚେକ ମଧ୍ୟ ଦେଇଥିଲେ। ହେଲେ ଉକ୍ତ ଆକାଉଣ୍ଟରେ ଟଙ୍କା ନ ଥିବାରୁ ଓ ଦସ୍ତଖତ ମେଳ ନ ଖାଇବାରୁ ଉଭୟ ଚେକ ବାଉନ୍ସ ହୋଇଯାଇଥିଲା। ଶେଷରେ ଅନ୍ୟ କୌଣସି ଉପାୟ ନ ପାଇ ବନମାଳି ଶହୀଦନଗର ଥାନାରେ ପୁଣି ଅଭିଯୋଗ କରିଥିଲେ।
