ନୂଆଦିଲ୍ଲୀ, ୪।୬ : ଏକ କାର୍ଯ୍ୟକ୍ରମରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଘୋଷଣା କରିଛନ୍ତି ଯେ ଅଗଷ୍ଟ ୧୫ ସୁଦ୍ଧା ଦିଲ୍ଲୀରେ ୫୦୦ ତ୍ରିରଙ୍ଗା ଲଗାଯିବ। ତ୍ରିରଙ୍ଗାର ଯତ୍ନ ନେବା ପାଇଁ ସ୍ବେଚ୍ଛାସେବୀ କମିଟି ମଧ୍ୟ ଗଠନ କରାଯିବ। କେଜ୍ରିୱାଲ କହିଛନ୍ତି ଯେ ପ୍ରତ୍ୟେକ ତ୍ରିରଙ୍ଗା ସମ୍ମାନ କମିଟିରେ ୧,୦୦୦ ସ୍ବେଚ୍ଛାସେବୀ ରହିବେ।
ଶନିବାର ତ୍ୟାଗରାଜ ଷ୍ଟାଡିୟମରେ ତ୍ରିରଙ୍ଗା ସମ୍ମାନ କମିଟିର ସ୍ବେଚ୍ଛାସେବୀମାନଙ୍କୁ ସମ୍ବୋଧିତ କରିବା ପାଇଁ ଆୟୋଜିତ ଏକ କାର୍ଯ୍ୟକ୍ରମରେ କେଜ୍ରିୱାଲ କହିଛନ୍ତି ଯେ ତାଙ୍କ ସରକାର ଦେଶପ୍ରେମ ବଜେଟ ଅନ୍ତର୍ଗତ ରାଜଧାନୀରେ ଏସବୁ ତ୍ରିରଙ୍ଗା ଲଗାଇବେ।
ସେ କହିଛନ୍ତି ଯେ ଯେଉଁ ଦିନ ୧୩୦ କୋଟି ଲୋକ ଏକାଠି ଭାରତ ପାଇଁ ଚିନ୍ତା କରିବା ଆରମ୍ଭ କରିବେ, ସେହି ଦିନ ଦାରିଦ୍ର୍ୟ ଦୂର ହେବ, ଭାରତ ଅଗ୍ରଗତି କରିବ ଏବଂ ବିଶ୍ୱ ଗୁରୁ ହେବ।
ମୁଖ୍ୟମନ୍ତ୍ରୀ କହିଛନ୍ତି ଯେ ବର୍ତ୍ତମାନ ଦିଲ୍ଲୀର ବିଭିନ୍ନ ସ୍ଥାନରେ ୨୦୦ ତ୍ରିରଙ୍ଗା ଲଗାଯିବ। ଅଗଷ୍ଟ ୧୫ ସୁଦ୍ଧା ମୋଟ ୫୦୦ ତ୍ରିରଙ୍ଗା ସ୍ଥାପନ କରାଯିବ। ଗତ ବର୍ଷ ଦିଲ୍ଲୀ ସରକାର ଦେଶପ୍ରେମୀ ବଜେଟର ଏକ ଅଂଶ ଭାବରେ ସହରରେ ୧୧୫ ଫୁଟ ଉଚ୍ଚତା ବିଶିଷ୍ଟ ୫୦୦ ତ୍ରିରଙ୍ଗା ସ୍ଥାପନ କରିବାକୁ ଘୋଷଣା କରିଥିଲେ।
