ପୁରୀ ଅଫିସ,୧୦।୬: ସରକାରଙ୍କ ମାଲିିିିିକାନାକୁ ଫେରିବ ପୁରୀ ସିପସରୁ ବାଲି ଅଞ୍ଚଳରେ ଥିବା ୫ଶହ ଏକରରୁ ଅଧିକ ଜମି। ରାଜ୍ୟ ସରକାରଙ୍କ ସପକ୍ଷରେ ଏହି ରାୟ ଶୁଣାଇଛନ୍ତି ହାଇକୋର୍ଟ। ଦୀର୍ଘ ୨୩ ବର୍ଷ ଧରି ରାଧାକାନ୍ତ ମଠ ପକ୍ଷରୁ ଚାଲିଥିବା ମାମଲାର ଶୁଣାଣି କରି ଗତ ୭ତାରିଖରେ କୋର୍ଟ ଏହି ନିର୍ଦ୍ଦେଶ ଦେଇଛନ୍ତି। ରାଧାକାନ୍ତ ମଠ ପକ୍ଷରୁ ସିପସରୁବାଲି ଅଞ୍ଚଳର ୫ଶହ ଏକର ଜମିକୁ ନିିଜର ବୋଲି ଦାବି କରାଯାଇଆସୁଥିଲା। ୧୯୯୯ ମସିହାରେ ଏ ନେଇ ମଠ ପକ୍ଷରୁ ହାଇକୋର୍ଟରେ ରିଟ୍ ପିଟିଶନ ଦାୟର କରାଯାଇଥିଲା।
ଉଲ୍ଲେଖଯୋଗ୍ୟ, ସିପସରୁବାଲି ଅଞ୍ଚଳର ୫୩୩ ଏକର ଜମିର ମାଲିକାନା ଦାବି କରି ରାଧାକାନ୍ତ ମଠ ପକ୍ଷରୁ ୧୯୯୬ ମସିହାରେ ପ୍ରଥମେ ପୁରୀ ତହସିଲଦାରଙ୍କ କୋର୍ଟରେ ମାମଲା ହୋଇଥିଲା। ତହସିଲଦାର ଏଭଳି ଦାବି ଖାରଜ କରିବା ପରେ ଉପଜିଲାପାଳଙ୍କ କୋର୍ଟରେ ଆବେଦନ କରାଯାଇଥିଲା। ସେଠାରେ ମଧ୍ୟ ମାମଲା ଖାରଜ ହେଲା। ଏହାପରେ ଅତିରିକ୍ତ ଜିଲାପାଳଙ୍କ କୋର୍ଟରେ ଏସଂକ୍ରାନ୍ତ ଆବେଦନ ଖାରଜ ହୋଇଥିଲା। ପରେ ୧୯୯୯ରେ ହାଇକୋର୍ଟରେ ରିଟ୍ ପିଟିଶନ ଦାଖଲ କରାଯାଇଥିଲା। ତାହା ଏପର୍ଯ୍ୟନ୍ତ ବିଚାରାଧୀନ ଥିଲା। ବିଭିନ୍ନ ପକ୍ଷକୁ ଶୁଣିବା ପରେ ହାଇକୋର୍ଟ ଗତ ୭ ତାରିଖରେ ରାୟ ଶୁଣାଇଛନ୍ତି। ରାୟରେ ଜମିର ମାଲିକାନା ସରକାରଙ୍କ ପାଖରେ ରହିବ ବୋଲି କହିଛନ୍ତି। ସରକାରୀ ଖାତାକୁ ଜମି ଫେରାଇବା ପାଇଁ କାର୍ଯ୍ୟକ୍ରମ ହାତକୁ ନେବା ଲାଗି ନିର୍ଦ୍ଦେଶ ଦିଆଯାଇଛି। ଏବେ ସରକାରୀ ଖାତାକୁ ଜମି ଫେରାଇବା ପ୍ରକ୍ରିୟା ଆରମ୍ଭ କରାଯିବ ବୋଲି ପ୍ରଶାସନ ସ୍ପଷ୍ଟ କରିଛି। ୨୦୧୨ରେ ହାଇକୋର୍ଟ ଏକ ଅନ୍ତରୀଣ ରାୟରେ ମଠ ପାଖରେ ଜମିର ମାଲିକାନା ରହିବ ବୋଲି କହିଥିଲେ। ମାତ୍ର ୭ତାରିଖ ରାୟ ପରେ ଅନ୍ତରୀଣ ରାୟ ନାକଚ ହୋଇଯାଇଛି।
