ରସୁଲପୁର,୮ା୮(ଡି.ଏନ୍.ଏ.): ଯାଜପୁର ଜିଲା ରସୁଲପୁର ବ୍ଲକ ଅଧୀନ ପ୍ରଥମାଖଣ୍ଡି ପଞ୍ଚାୟତର ଗୋପାଳପୁର ଗାଁ ବୁଣାକାରବହୁଳ ଗାଁ ଅଟେ। ଏଠାରେ ୧୫୦୦ରୁ ଊର୍ଦ୍ଧ୍ୱ ବୁଣାକାର ବସବାସ କରୁଛନ୍ତି। ବିଭିନ୍ନ ସମସ୍ୟା ଭିତରେ ଗତି କରୁଥିବା ଉକ୍ତ ବୁଣାକାର ସମ୍ପ୍ରଦାୟ ରବିବାର ୮ମ ଜାତୀୟ ବୁଣାକାର ଦିବସ ପାଳନ କରିଛନ୍ତି। ତେଣେ ଦରଦାମ ବୃଦ୍ଧି, ମୁଦ୍ରାସ୍ଫୀତି ହାର ଉପରମୁହାଁ, ସରକାରଙ୍କ ବୁଣାକାର ଯୋଜନାକୁ ପ୍ରଣୟନ କରିବାରେ ଟାଳଟୁଳ ନୀତି ଅବଲମ୍ବନ କରିବାକୁ ନେଇ ବୁଣାକାର ସମ୍ପ୍ରଦାୟ ଆଶା ଆଶଙ୍କାରେ ରହିଛନ୍ତି। ତେଣୁ ବୁଣାକାରଙ୍କ କୌଳିକ ବୃତ୍ତିକୁ ବଞ୍ଚାଇବା ପାଇଁ ସରକାର ସେମାନଙ୍କ ଦାବିପୂରଣ ଦିଗରେ ଗୁରୁତ୍ୱ ଦେବାକୁ ମତପ୍ରକାଶ ପାଇଛି।
ଏବେ ବୁଣାକାର କୁଳ ବେଉଷାକୁ ଭୁଲିବାକୁ ବସିଲେଣି। ତନ୍ତଶାଳାର ରୋଜଗାର ହାଣ୍ଡିଶାଳକୁ ସୁହାଉ ନ ଥିବାରୁ କୌଳିକ ବୃତ୍ତିରେ ତାଲା ପଡ଼ିବା ଆରମ୍ଭ ହେଲାଣି। କେତେକ ବୁଣାକାରଙ୍କ ଘରେ ଆଉ ତନ୍ତଶାଳର ଖଡ଼ଖାଡ଼ ଶବ୍ଦ ଶୁଣିବାକୁ ମିଳୁନାହିଁ। କୌଳିକ ବୃତ୍ତି ଛାଡ଼ି ବୁଣାକାର ସୁରଟମୁହାଁ ହେଲେଣି ଓ ଅନେକ ଇଟାଭାଟି ଶ୍ରମିକ ସାଜିଲେଣି ମଧ୍ୟ। ବନ୍ୟା, ବାତ୍ୟା ଓ କରୋନା ସମୟରେ ସରକାର ବୁଣାକାରଙ୍କ ସ୍ବାର୍ଥକୁ ଅଣଦେଖା କରୁଛନ୍ତି। ଏହା କୌଳିକ ବୃତ୍ତି ବୁଡ଼ିବାର ମୁଖ୍ୟ କାରଣ ବୋଲି କୁହାଯାଉଛି। ସରକାରୀସ୍ତରରେ କ୍ଷୟକ୍ଷତି ପ୍ରଦାନରେ ପକ୍ଷପାତିତା ବୁଣାକାରଙ୍କୁ ହତୋତ୍ସାହିତ କରୁଛି। ବୁଣାକାର ସେମାନଙ୍କ ସମସ୍ୟା ନେଇ ବିଭିନ୍ନ ସମୟରେ ସରକାରଙ୍କ ଦୃଷ୍ଟି ଆକର୍ଷଣ କରିଆସୁଛନ୍ତି। ହେଲେ ସମସ୍ୟା ସମାଧାନ ହୋଇପାରୁ ନାହିଁ।
ବୁଣାକାରଙ୍କୁ ଆତ୍ମନିର୍ଭରଶୀଳ କରିବାକୁ ହେଲେ ସରକାରଙ୍କ କେତେକ ବିଷୟ ପ୍ରତି ବିଶେଷ ଧ୍ୟାନ ଦେବାକୁ ବୁଣାକାର ସମ୍ପ୍ରଦାୟ, ସଂଘ, ନେତାମାନଙ୍କ ପକ୍ଷରୁ ଦାବି ହେଉଛି। ଏଠାରେ ଉପସ୍ଥାପିତ ପ୍ରମୁଖ ଦାବିଗୁଡ଼ିକ ମଧ୍ୟରୁ ବୁଣାକାରଙ୍କ ଉପତ୍ାଦିତ ସାମଗ୍ରୀକୁ ଜିଏସ୍ଟି ମୁକ୍ତ କରିବା, ବୁଣାକାର ଦ୍ରବ୍ୟ ବିକ୍ରି ପାଇଁ ବଜାର ସୃଷ୍ଟି, ପଞ୍ଜୀକୃତ ବୁଣାକାରଙ୍କୁ ସହଜରେ ଓ ରିହାତିରେ କଞ୍ଚାମାଲ ଯୋଗାଇ ଦେବା, ବୁଣାକାରଙ୍କ ଆର୍ଥତ୍କ ଓ ସାମାଜିକ ବିକାଶ ପାଇଁ ରାଜ୍ୟ ସରକାରଙ୍କ ପକ୍ଷରୁ କାର୍ଯ୍ୟକାରୀ ହେଉଥିବା ହସ୍ତତନ୍ତ ଓ ହସ୍ତଶିଳ୍ପ ବିକାଶ ଓ ଉନ୍ନୟନ ପରିଷଦକୁ ତୁରନ୍ତ କାର୍ଯ୍ୟକ୍ଷମ କରିବା, କଞ୍ଚାମାଲ ଉପରେ ରିହାତି ପ୍ରଦାନ ଦିଗରେ ରାଜ୍ୟ ସରକାର ପଡ଼ୋଶୀ ରାଜ୍ୟର ନୀତି ନିଷ୍ପତ୍ତିକୁ ଅନୁସରଣ କରି ସମାନ ସୁବିଧା ଆମ ରାଜ୍ୟର ବୁଣାକାରଙ୍କୁ ପ୍ରଦାନ କରିବା, ବୁଣାକାରଙ୍କ ପାଇଁ ଉଦ୍ଦିଷ୍ଟ ତନ୍ତଶାଳା ନିର୍ମାଣରେ ରହିଥିବା ନିୟମରେ ପରିବର୍ତ୍ତନ, ୫୦ବର୍ଷରୁ ଊର୍ଦ୍ଧ୍ୱ ବୁଣାକାରଙ୍କୁ ୩ହଜାର ଟଙ୍କା ଭତ୍ତା ପ୍ରଦାନ ଓ ବିଭିନ୍ନ ସରକାରୀ ସୁବିଧା ହାସଲ ପାଇଁ ବୁଣାକାରଙ୍କୁ ଅନଲାଇନ ଏବଂ ଅଫଲାଇନ ସୁବିଧା ଯୋଗାଇ ଦେବା ଆଦି ଅନ୍ତର୍ଭୁକ୍ତ। ତେବେ ଏସବୁ ଦାବି ପୂରଣ କରିବାରେ ସରକାର କେତେ ସହାୟକ ହେଉଛନ୍ତି ତାହା ସମୟକ୍ରମେ ସ୍ପଷ୍ଟ ହୋଇଯିବ ବୋଲି କୁହାଯାଉଛି।
