ନୂଆଦିଲ୍ଲୀ,୨୯ା୩: ମହାମାରୀ କୋଭିଡ୍ ମୁକାବିଲା ପାଇଁ ଟିକାକରଣ ଉପରେ କେନ୍ଦ୍ର ସରକାର ଜୋର୍ ଦେଉଥିଲେ। କିନ୍ତୁ କୋଭିଡ୍-୧୯ ଟିକା ନେବା ପରେ ଭାରତରେ ୧୧୫୬ ଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରୁ ୫୦ ଜଣ ହେଉଛନ୍ତି ଓଡ଼ିଶାର। କେନ୍ଦ୍ର ସ୍ବାସ୍ଥ୍ୟ ରାଷ୍ଟ୍ରମନ୍ତ୍ରୀ ଭାରତୀ ପ୍ରବୀଣ ପାଓ୍ବାର ଗତ ୨୪ ତାରିଖରେ ଲୋକ ସଭାକୁ ଏହି ମୃତ୍ୟୁସଂଖ୍ୟା ଅବଗତ କରାଇଛନ୍ତି। ଏହା ପୂର୍ବରୁ ଗତ ନଭେମ୍ବର ୨୯ରେ ସୁପ୍ରିମ୍କୋର୍ଟଙ୍କୁ ସତ୍ୟପାଠ ଜରିଆରେ କେନ୍ଦ୍ର ଜଣାଇଥିଲା ଯେ, କୋଭିଡ୍ ଟିକା ନେଇଥିବା ବ୍ୟକ୍ତିଙ୍କ ମୃତ୍ୟୁ ହେଲେ ସରକାରଙ୍କୁ ଦାୟୀ କରାଯାଇପାରିବ ନାହିଁ। ‘କୋଓ୍ବିନ୍’ ପୋର୍ଟାଲ ସମେତ ବିଭିନ୍ନ ମାଧ୍ୟମରେ ଟିକା ନେବାକୁ ପ୍ରଚାର ପ୍ରସାର କରାଗଲା। ହେଲେ ଟିକା ନେବା ବ୍ୟକ୍ତିଙ୍କଠାରେ ଏକାଧିକ ପାର୍ଶ୍ୱପ୍ରତିକ୍ରିୟା ଦେଖାଦେବା ଓ ମୃତ୍ୟୁ ଘଟିବା ପରେ ଥାର୍ଡ ପାର୍ଟି ଦ୍ୱାରା ତାହା ପ୍ରସ୍ତୁତ ହେଉଥିବା ଦର୍ଶାଇ ସରକାର ନିଜ ଉପରୁ ଦୋଷ ଖସାଇଦେଇଥିଲେ।
୨୦୨୦ ଜାନୁୟାରୀ ୨୭ରେ କେରଳସ୍ଥିତ ଥିରିସୁରର ଜଣେ ୨୦ ବର୍ଷୀୟା ଛାତ୍ରୀ କୋଭିଡ୍ ପଜିଟିଭ୍ ଚିହ୍ନଟ ହୋଇଥିଲେ। ଚାଇନାର ଉହାନ୍ରୁ ଫେରିଥିବା ଏହି ଯୁବତୀ ହେଉଛନ୍ତି ଭାରତର ପ୍ରଥମ କୋଭିଡ୍ ସଂକ୍ରମିତ। ସେବେଠୁ ଅଦ୍ୟାବଧି ଦେଶରେ ମହାମାରୀର ୩ଟି ଲହର ଆସିଲାଣି। କୋଭିଡ୍ ସଂକ୍ରମଣ ରୋକିବା ପାଇଁ ପ୍ରଥମେ ପ୍ରଭାବଶାଳୀ ଉପାୟ ନ ଥିଲା। ୨୦୨୧ ଜାନୁୟାରୀ ୨ରେ ଭାରତ ବାୟୋଟେକ୍ର କୋଭାକ୍ସିନ ବଜାରକୁ ଆସିଥିଲା। ଏହା ପରେ ସିରମ୍ ଇନ୍ଷ୍ଟିଚ୍ୟୁଟ୍ ପକ୍ଷରୁ ବିକଶିତ କୋଭିଶିଲ୍ଡ ସମେତ ଅନ୍ୟ ଟିକାଗୁଡ଼ିକ ଦେଶରେ ଉପଲବ୍ଧ ହୋଇଥିଲା। ସେବେଠୁ ୨୦୨୩ ମାର୍ଚ୍ଚ ୧୫ ସୁଦ୍ଧା ଦେଶରେ ଟିକା ନେଇଥିବା ଲୋକଙ୍କ ମଧ୍ୟରୁ ୧,୧୫୬ ଜଣଙ୍କ ମୃତ୍ୟୁ ଘଟିଲାଣି। ଟିକା ନେଇ ମୃତ୍ୟୁମୁଖରେ ପଡ଼ିଥିବା ଲୋକଙ୍କ ମଧ୍ୟରେ ଓଡ଼ିଶାର ୫୦ ଜଣ ଅଛନ୍ତି। ଏଥିସହ ଟିକାକରଣ ପରେ ଓଡ଼ିଶାର ଅନ୍ୟ ୧,୫୫୨ ଜଣ ଆଡ୍ଭର୍ସ ଇଭେଣ୍ଟସ୍ ଫଲୋଇଙ୍ଗ୍ ଇମ୍ୟୁନାଇଜେଶନ୍ (ଏଇଏଫ୍ଆଇ) ଦ୍ୱାରା ପ୍ରଭାବିତ ହୋଇଛନ୍ତି। ମାତ୍ର ୮୦ ଜଣଙ୍କଠାରେ ଟିକାର ଗମ୍ଭୀର ପାର୍ଶ୍ୱପ୍ରତିକ୍ରିୟା ଦେଖିବାକୁ ମିଳିଛି ବୋଲି ସ୍ବାସ୍ଥ୍ୟ ରାଷ୍ଟ୍ରମନ୍ତ୍ରୀ ପାଓ୍ବାର ଉତ୍ତରରେ ଦର୍ଶାଇଛନ୍ତି। ଟିକାକରଣ ପରେ ସର୍ବାଧିକ ମୃତ୍ୟୁ କେରଳରେ ଘଟିଛି। ଦକ୍ଷିଣ ଭାରତର ଏହି ରାଜ୍ୟରେ ଟିକା ନେବା ପରେ ୨୪୪ ଜଣଙ୍କ ମୃତ୍ୟୁ ଘଟିଛି। ଏହି କ୍ଷେତ୍ରରେ ମହାରାଷ୍ଟ୍ର (୧୦୨) ଦ୍ୱିତୀୟ ସ୍ଥାନରେ ଥିବାବେଳେ ଉତ୍ତର ପ୍ରଦେଶ (୮୬) ଓ ମଧ୍ୟପ୍ରଦେଶ (୮୫) ଯଥାକ୍ରମେ ତୃତୀୟ ଓ ଚତୁର୍ଥ ସ୍ଥାନରେ ରହିଛି। ଏଇଏଫ୍ଆଇ ଯୋଗୁ କେଉଁ ରାଜ୍ୟରେ କେତେଜଣ ସଂକ୍ରମିତଙ୍କ ମୃତ୍ୟୁ ଘଟିଛି ବୋଲି ଆନ୍ଧ୍ରପ୍ରଦେଶର ଓ୍ବାଇଏସ୍ଆର୍ କଂଗ୍ରେସ ଏମ୍ପି କୁରୁବା ଗୋରନ୍ତଲା ମାଧବ ପ୍ରଶ୍ନ କରିଥିଲେ। ଲିଖିତ ଉତ୍ତରରେ କେନ୍ଦ୍ରମନ୍ତ୍ରୀ ପାଓ୍ବାର ଆହୁରି କହିଛନ୍ତି ଯେ, କୋଭିଡ୍ ଟିକାର ଏଇଏଫ୍ଆଇ ମାମଲାଗୁଡ଼ିକୁ ନେଇ ୟୁନିଭର୍ସାଲ ଇମ୍ୟୁନାଇଜେଶନ୍ ପ୍ରୋଗ୍ରାମ ଅନ୍ତର୍ଗତ ସର୍ଭିଲାନ୍ସ ସିଷ୍ଟମ୍ ଅଧୀନରେ ରିପୋର୍ଟ ଏବଂ ଅନୁଧ୍ୟାନ କରାଯାଇଛି। କୋଭିଡ ଟିକାକରଣଜନିତ ଏଇଏଫ୍ଆଇଗୁଡ଼ିକର ରିପୋର୍ଟିଂ ଲାଗି ଓ୍ବେବ୍ ଆପ୍ଲିକେଶନ୍ ଏସ୍ଏଏଫ୍ଇଭିଏସି ବା ସେଫ୍ଭାକ୍କୁ କୋ-ଓ୍ବିନ୍ ସହ ସମନ୍ବିତ କରାଯାଇଥାଏ। ସେହିପରି ଜିଲା ପ୍ରତିଷେଧନ ଅଧିକାରୀ ଏବଂ ହିତାଧିକାରୀମାନେ ଏଇଏଏଫ୍ଆଇର ରିପୋର୍ଟିଂ କୋ-ଓ୍ବିନ୍ ଏବଂ ସେଫ୍ଭାକ୍ ଜରିଆରେ କରିଥାଆନ୍ତି।
