ଢେଙ୍କାନାଳ ଅଫିସ୍, ୧।୪ ପୌର ନିର୍ବାଚନ ପରବର୍ତ୍ତୀ ହିଂସାରେ ଅଶାନ୍ତ ହୋଇଉଠିଛି ଢେଙ୍କାନାଳ ସହର। ପରାଜୟକୁ ସହଜରେ ଗ୍ରହଣ କରି ପାରୁ ନ ଥିବା ଏକ ଗୋଷ୍ଠୀ ବୁଧବାର ରାତିରେ ପୌରାଧ୍ୟକ୍ଷାଙ୍କ ଘର ଆଗରେ ୫ ରାଉଣ୍ଡ ଗୁଳିଚାଳନା କରିବା ସହିତ ହତ୍ୟା ଧମକ ଦେଇଛନ୍ତି। ଅଭିଯୁକ୍ତଙ୍କ ଆକ୍ରୋଶରୁ ବର୍ତ୍ତିନାହାନ୍ତି ୧୯ନଂ. ୱାର୍ଡ କାଉନ୍ସିଲରଙ୍କ ସମ୍ପର୍କୀୟ ଏବଂ ଜଣେ ସାଧାରଣ ବ୍ୟକ୍ତି। ଏ ନେଇ ଟାଉନ୍ ଥାନାରେ ଦୁଇଟି ମାମଲା (ନଂ. ୧୮୫/୨୨ ଏବଂ ୧୮୬/୨୨) ରୁଜୁ ହୋଇଛି। ଅନ୍ୟପଟେ ଅଭିଯୋଗର ତଦନ୍ତ କରି ପୋଲିସ ୨ଜଣଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ଏକ ସ୍କୁଟି, ନଗଦ ୧ଲକ୍ଷ ଟଙ୍କା, ୨ଟି ଠେଙ୍ଗା ଜବତ କରିଛି। ଅନ୍ୟ ୩ ଅଭିଯୁକ୍ତ ଫେରାର ଅଛନ୍ତି। ଗୁଳିଚାଳନା ସ୍ଥଳରେ ସାଇଣ୍ଟିଫିକ୍ ଦଳ ତଦନ୍ତ ଚଳାଇଛି। ଗୋଟିଏ ରାତିରେ ଏଭଳି ପୃଥକ୍ ଘଟଣା ପୌରାଞ୍ଚଳବାସୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି କରିଥିବାବେଳେ ସହରର ଆଇନଶୃଙ୍ଖଳା ବିଗିଡ଼ିବା ପୋଲିସ ପ୍ରଶାସନର ମୁଣ୍ଡବ୍ୟଥା ବଢ଼ାଇଛି।
ପୌରାଧ୍ୟକ୍ଷା ତଥା ଭାଜପା ନେତ୍ରୀ ଜୟନ୍ତୀ ପାତ୍ରଙ୍କ ଅଭିଯୋଗ ଅନୁଯାୟୀ, ବୁଧବାର ରାତି ପ୍ରାୟ ୧୦ଟା ୪୦ରେ ୨ଟି ବାଇକ୍ରେ ୫ଜଣ ଯୁବକ ତାଙ୍କ ଘର ସମ୍ମୁଖରେ ପହଞ୍ଚତ୍ ପାଟିତୁଣ୍ଡ କରିଥିଲେ। ସେ ବାଲ୍କୋନିକୁ ଆସି ଦେଖିବା ବେଳେ ହଠାତ୍ ସେମାନେ ୫ ରାଉଣ୍ଡ ଗୁଳିଚାଳନା କରିଥିଲେ। ଜୟନ୍ତୀ ଜୀବନ ବିକଳରେ ବାଲକୋନି କବାଟ ଦେଇ ଘର ଭିତରକୁ ପଳାଇଥିଲେ। ଏହାପରେ ସମ୍ପୃକ୍ତ ଅଭିଯୁକ୍ତମାନେ ତାଙ୍କୁ ଏବଂ ତାଙ୍କ ସ୍ବାମୀ ତଥା ରାଜ୍ୟ ଭାଜପା କୃଷକ ମୋର୍ଚ୍ଚା ଉପସଭାପତି ରାମଚନ୍ଦ୍ର ପାତ୍ରଙ୍କୁ ବୋମା ପକାଇ ହତ୍ୟା କରିବାକୁ ଧମକ ଦେଇଥିଲେ। ଢେଙ୍କାନାଳରେ ପୁଣି ଉପନିର୍ବାଚନ ହେବ ବୋଲି ସେମାନେ ଖୋଲାଖୋଲି ଚେତାବନୀ ଦେଇଥିଲେ। ପରିବାର ସଦସ୍ୟ ଅଭିଯୁକ୍ତଙ୍କୁ ଗୋଡ଼ାଇବାରୁ ସେମାନେ ଫେରାର ହୋଇଯାଇଥିଲେ। ଏଥିପୂର୍ବରୁ ରାତି ପ୍ରାୟ ସାଢ଼େ ୧୦ଟାରେ ସମ୍ପୃକ୍ତ ଅଭିଯୁକ୍ତମାନେ ୧୯ନଂ. ଓ୍ବାର୍ଡ ଅନ୍ତର୍ଗତ ସିମିଳିଆ ଗ୍ରାମରେ ଆତଙ୍କରାଜ ସୃଷ୍ଟି କରିଥିଲେ। ସେମାନେ ସମ୍ପୃକ୍ତ ଓ୍ବାର୍ଡର କାଉନ୍ସିଲରଙ୍କ ବାପା ଆର୍ତ୍ତବନ୍ଧୁ ମଲ୍ଲିକ ଏବଂ ଗ୍ରାମର ଶୈଳେନ୍ଦୁ ନାରାୟଣ ସାହୁ (୪୦)ଙ୍କୁ ଭୟଭୀତ କରାଇବା ସହ ଧମକଚମକ ଦେଇଛନ୍ତି। ଅଭିଯୁକ୍ତମାନେ ଶୈଳେନ୍ଦୁଙ୍କ ମୁଣ୍ଡରେ ବନ୍ଧୁକ ଲଗାଇ ମାଡ଼ ମାରିଥିବା ନେଇ ସେ ଥାନାରେ ଅଭିଯୋଗ କରିଛନ୍ତି। ଗୁରୁବାର ପୌରାଧ୍ୟକ୍ଷା ଜୟନ୍ତୀ, ତାଙ୍କ ସ୍ବାମୀ ରାମଚନ୍ଦ୍ର, ପୂର୍ବତନ ବିଧାୟକ କୃଷ୍ଣଚନ୍ଦ୍ର ପାତ୍ର, ନବକିଶୋର ଗୁରୁ, ମାତୃପ୍ରସାଦ ନନ୍ଦ ପ୍ରମୁଖ ଦଳୀୟ ସମର୍ଥକଙ୍କ ସହ ଏସ୍ପିଙ୍କୁ ଭେଟି ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି। ଏହି ଘଟଣାରେ ହାଉସିଂବୋର୍ଡ କଲୋନୀର ସତ୍ୟବ୍ରତ ବେହେରା (୨୬) ଏବଂ ଜୟଗୋପାଳ ସାହିର ସୋମନାଥ ସାହୁ (୨୨) ଗିରଫ ହୋଇଥିବା ଏସ୍ପି ଏଲ୍. ଦିବ୍ୟା ଭି. କହିଛନ୍ତି।
ଏ ସଂକ୍ରାନ୍ତରେ ରାମଚନ୍ଦ୍ର ପାତ୍ର କୁହନ୍ତି, ଘଟଣା ପରେ ଏସ୍ପିଙ୍କୁ ସୁରକ୍ଷା ମାଗିଛୁ। ଅଭିଯୁକ୍ତଙ୍କ ମଧ୍ୟରୁ ୩ଜଣଙ୍କ ଫଟୋ ସ୍ଥାନୀୟ ବିଧାୟକଙ୍କ ସହ ରହିଛି। ସେମାନେ ହତ୍ୟାଧମକ ଦେବା ସହ ଉପନିର୍ବାଚନ କରିବେ ବୋଲି ଚେତାବନୀ ଦେଇଛନ୍ତି। ପୂର୍ବତନ ବିଧାୟକ କୃଷ୍ଣଚନ୍ଦ୍ର ପାତ୍ର କୁହନ୍ତି, ବିଧାୟକ ନିର୍ବାଚନରେ ହାର୍କୁ ବରଦାସ୍ତ କରି ନ ପାରି ଗୁଣ୍ଡା ଲଗାଇଛନ୍ତି। ତାଙ୍କର ମତିଭ୍ରମ ହୋଇଛି। ଅଭିଯୁକ୍ତଙ୍କୁ ତୁରନ୍ତ ଗିରଫ କରା ନ ଗଲେ ଆନ୍ଦୋଳନ ତୀବ୍ରତର ହେବ ବୋଲି ସେ କହିଛନ୍ତି। ଭାଜପା ପକ୍ଷରୁ ଅଣାଯାଇଥିବା ଅଭିଯୋଗର ପ୍ରତିକ୍ରିୟାରେ ବିଧାୟକ ସୁଧୀର କୁମାର ସାମଲ କୁହନ୍ତି, ପଥର ଖଣି ଓ ବାଲି ବ୍ୟବସାୟକୁ ନେଇ ଏହି ଗଣ୍ଡଗୋଳ ଘଟିଛି। ବିଜେଡି ହିଂସାକୁ ପ୍ରଶ୍ରୟ ଦିଏନାହିଁ। ସୁଧୀର ସାମଲ କ’ଣ ତାହା ସହରବାସୀ ଜାଣିଛନ୍ତି। ଆମେ ଆଇନକୁ ସମ୍ମାନ ଜଣାଉଛୁ। ନିର୍ବାଚନ ପରେ ଗତ ୨୪ ତାରିଖ ସନ୍ଧ୍ୟାରେ ଜଣେ ବିଜେଡି କାଉନ୍ସିଲର ପ୍ରାର୍ଥୀ ଥାନାକୁ ଅଭିଯୋଗ କରିବାକୁ ଆସିଥିବାବେଳେ ଭାଜପା କର୍ମୀମାନେ ପୋଲିସ ଉପସ୍ଥିତିରେ ତାଙ୍କୁ ନିସ୍ତୁକ ମାଡ଼ ମାରିଥିଲେ। ସେମାନଙ୍କ ପିଲାମାନେ ଅରାଜକତା କରୁଛନ୍ତି। ତେଣୁ ଏଭଳି ନାଟକବାଜିର କିଛି ଲାଭ ନାହିଁ ବୋଲି ବିଧାୟକ କହିଛନ୍ତି।
