ଓ୍ବାଶିଂଟନ,୧୧ା୧୧:ଆମେରିକାର ମିଡ୍ଟମର୍ସରେ ଡେମୋକ୍ରାଟିକ୍ ପାର୍ଟିର ରେକର୍ଡ ସଂଖ୍ୟକ ୫ ଭାରତୀୟ ବଂଶୋଦ୍ଭବ ଆଇନ ପ୍ରଣେତା ହାଉସ୍ ଅଫ୍ ରିପ୍ରେଜେଣ୍ଟେଟିଭ୍କୁ ନିର୍ବାଚିତ ହୋଇଛନ୍ତି। ରାଜା କ୍ରିଷ୍ଣାମୂର୍ତ୍ତି, ରୋ ଖାନ୍ନା, ପ୍ରମିଳା ଜୟପାଲ ଓ ଆମି ବେରା ପ୍ରତିନିଧି ସଭାକୁ ନିର୍ବାଚିତ ହୋଇଥିବାବେଳେ ଆଉ କେତେଜଣ ଭାରତୀୟ-ଆମେରିକୀୟ ରାଜ୍ୟ ବିଧାନସଭାଗୁଡ଼ିକରେ ପ୍ରତିନିଧିତ୍ୱର ସୁଯୋଗ ପାଇଛନ୍ତି। ବ୍ୟବସାୟୀରୁ ରାଜନେତା ପାଲଟିଥିବା ୬୭ ବର୍ଷୀୟ ଡେମୋକ୍ରାଟ୍ ଶ୍ରୀ ଥାନେଦାର ତାଙ୍କ ରିପବ୍ଲିକାନ୍ ପ୍ରତିଦ୍ୱନ୍ଦ୍ୱୀ ମାର୍ଟେଲ ବିଭିଙ୍ଗ୍ସ୍ଙ୍କୁ ପରାସ୍ତ କରିଛନ୍ତି। ସେହିପରି ଇଲିନୋଇସ୍ର ଅଷ୍ଟମ କଂଗ୍ରେସନାଲ ଡିଷ୍ଟ୍ରିକ୍ଟ ନିର୍ବାଚନରେ ୪୯ ବର୍ଷୀୟ ରାଜା କ୍ରିଷ୍ଣାମୂର୍ତ୍ତି ଲଗାତର ଚତୁର୍ଥ ଥର ପାଇଁ ନିର୍ବାଚିତ ହୋଇଛନ୍ତି। ସେ ରିପବ୍ଳିକାନ୍ ପ୍ରତିଦ୍ୱନ୍ଦ୍ୱୀ କ୍ରିସ୍ ଡର୍ଗିସ୍ଙ୍କୁ ପରାସ୍ତ କରିଛନ୍ତି। ସିଲିକନ୍ ଭ୍ୟାଲିରେ ଅନୁଷ୍ଠିତ କାଲିଫର୍ନିଆର ସପ୍ତଦଶ କଂଗ୍ରେସନାଲ ଡିଷ୍ଟ୍ରିକ୍ଟ ନିର୍ବାଚନରେ ୪୬ ବର୍ଷୀୟ ରୋ ଖାନ୍ନା ରିପବ୍ଲିକାନ୍ ପ୍ରାର୍ଥୀ ରିତେଶ ଟଣ୍ଡନଙ୍କୁ ହରାଇଛନ୍ତି। ଚେନ୍ନାଇ ଜନ୍ମିତ କଂଗ୍ରେସଓମ୍ୟାନ୍ ପ୍ରମିଳା ଜୟପାଲ ଗ୍ରାଣ୍ଡ ଓଲ୍ଡ ପାର୍ଟି ପ୍ରତିଦ୍ୱନ୍ଦ୍ୱୀ କ୍ଲିଫ୍ ମୁନ୍ଙ୍କୁ ପଛରେ ପକାଇ ବିଜୟ ହାସଲ କରିଛନ୍ତି। ୨୦୧୩ରୁ କାଲିଫର୍ନିଆର ସପ୍ତମ କଂଗ୍ରେସନାଲ ଡିଷ୍ଟ୍ରିକ୍ଟରେ ପ୍ରତିନିଧିତ୍ୱ କରୁଥିବା ୫୭ ବର୍ଷୀୟ ଆମି ବେରା ରିପବ୍ଲିକାନ୍ ତାମିକା ହାମିଲ୍ଟନଙ୍କୁ ପରାସ୍ତ କରିଛନ୍ତି। ରାଜ୍ୟ ବିଧାନସଭା ନିର୍ବାଚନରେ ମଧ୍ୟ ଭାରତୀୟ ବଂଶୋଦ୍ଭବଙ୍କ ପ୍ରାଧାନ୍ୟ ବଢ଼ିଛି। ପେନ୍ସିଲଭାନିଆରେ ଅରବିନ୍ଦ ଭେଙ୍କଟ, ତାରିକ ଖାନ୍, ଟେକ୍ସାସ୍ରେ ସଲମାନ ଭୋଜାନି, ସୁଲେମାନ ଲଲାନି, ମିଶିଗାନ୍ରେ ସାମ୍ ସିଂ, ରବୀନ୍ଦ୍ର ପୁରୀ, ଇଲିଓନିସ୍ରେ ନବିଲା ସୟଦ, ମେଗାନ୍ ଶ୍ରୀନିବାସ, କଭିନ୍ ଓଲିକାଲ, ଜର୍ଜିଆରେ ନବ୍ଲିସ୍ ଇସ୍ଲାମ, ଫାରୁକ୍ ମୋଗଲ, ଓହିଓରେ କୁମାର ଭାର୍ବେ ଏବଂ ଅନିତା ସମାନି ପ୍ରମୁଖ ବିଜୟୀ ହୋଇଛନ୍ତି। ମେରିଲାଣ୍ଡରେ ଅରୁଣା ମିଲର(୫୮) ପ୍ରଥମ ଭାରତୀୟ ବଂଶୋଦ୍ଭବ ଲ୍ୟୁଟ୍ନାଣ୍ଟ ଗଭର୍ନର ଭାବେ ବିଜୟୀ ହୋଇ ଇତିହାସ ରଚିଛନ୍ତି। ଭାରତ ମୂଳର ଏତେ ସଂଖ୍ୟକ ଯୁବ ପ୍ରାର୍ଥୀ ମଧ୍ୟବର୍ତ୍ତିକାଳୀନ ନିର୍ବାଚନରେ ବିଜୟ ହାସଲ କରିବା ୩୩.୧୯ କୋଟି ଜନସଂଖ୍ୟା ବିଶିଷ୍ଟ ଆମେରିକାରେ ବସବାସ କରୁଥିବା ୧% ଭାରତୀୟଙ୍କ ଲୋକପ୍ରିୟତାକୁ ସୂଚାଉଛି।
