ରାୟଗଡ଼ା,୨୩ା୩(ଆଶିଷ ରଞ୍ଜନ ପଣ୍ଡା): ବେଆଇନ ଭାବେ ଚାଲିଥିବା ଚିଟ୍ଫଣ୍ଡ ସ୍କିମ୍ ଓ ସୁଧ କାରବାର ଉପରେ କୌଣସି ଅଙ୍କୁଶ ଲଗାଯାଇ ନ ଥିବାରୁ ଦିନକୁ ଦିନ ଏହି ବ୍ୟବସାୟ ବଢ଼ିବାରେ ଲାଗିଛି। ଫଳରେ କିଛି ଖଳ ପ୍ରକୃତିର ଲୋକ ଏହାର ସୁଯୋଗ ନେଇ ଲୋକଙ୍କୁ ଭୁଆଁ ବୁଲାଇ ଲକ୍ଷାଧିକ ଟଙ୍କା ଠକି ନେଉଛନ୍ତି। ଏଭଳି ଏକ ଘଟଣା ଦେଖିବାକୁ ମିଳିଛି ରାୟଗଡ଼ା ସହରରେ। ରାୟଗଡ଼ା ସହରର ଜଣେ ମହିଳା ଚିଟ୍ଫଣ୍ଡ ନାଁରେ ୫୦ରୁ ଊର୍ଦ୍ଧ୍ୱ ମହିଳାଙ୍କ ପ୍ରାୟ ୫କୋଟିରୁ ଊର୍ଦ୍ଧ୍ୱ ଟଙ୍କା ନେଇ ଫେରାର ହୋଇଯାଇଥିବା ଘଟଣା ଶୁକ୍ରବାର ସାମ୍ନାକୁ ଆସିଛି। ଠକାମିର ଶିକାର ହୋଇଥିବା ମହିଳାମାନେ ଶୁକ୍ରବାର ସନ୍ଧ୍ୟାରେ ଜିଲା ପୋଲିସ କାର୍ଯ୍ୟାଳୟକୁ ଯାଇ ଅଭିଯୋଗ କରିଛନ୍ତି। ରାୟଗଡ଼ା ଟାଉନ ଥାନା ଅଧିକାରୀ କେକେବିକେ କହଁର ଏ ନେଇ ଏକ ମାମଲା ରୁଜୁ କରିବା ସହ ତଦନ୍ତ ଆରମ୍ଭ କରିବାକୁ ନିର୍ଦ୍ଦେଶ ଦିଆଯାଇଛି।
ଘଟଣାରୁ ପ୍ରକାଶ ଯେ, ରାୟଗଡ଼ା ସହର ରିଂରୋଡ୍ ନିବାସୀ ତୃପ୍ତିରାଣୀ କର ପ୍ରାୟ ୩ ବର୍ଷ ହେବ ରାୟଗଡ଼ାରେ ରିଂରୋଡ୍, କୋଅପରେଟିଭ କଲୋନି ଓ ଏହାର ଆଖପାଖ ଅଞ୍ଚଳର ମହିଳାଙ୍କ ସହ ସମ୍ପର୍କ ସ୍ଥାପନକରି ଚିଟ୍ଫଣ୍ଡ ଆରମ୍ଭ କରିଥିଲେ। ପରେ ଉକ୍ତ ମହିଳାମାନଙ୍କଠାରୁ ସେ ଟଙ୍କା ସୁଧରେ ନେଇଥିଲେ। ପ୍ରଥମେ କମ୍ ରକମର ଚିଟ୍ଫଣ୍ଡ ଆରମ୍ଭକରି ମହିଳାମାନଙ୍କ ବିଶ୍ୱାସ ଜମାଇ ପରବର୍ତ୍ତୀ ସମୟରେ ବଡ଼ କାରବାର ଆରମ୍ଭ କରିଥିଲେ। ଏଥିସହ ସୁଧ ଦେବା ନାଁରେ ସେମାନଙ୍କଠାରୁ ନଗଦ ଟଙ୍କା ଋଣ ମଧ୍ୟ ନେଇଥିଲେ। ଏବେ ସେ ରହୁଥିବା ଘର ବିକ୍ରିକରି ସମସ୍ତଙ୍କ ଟଙ୍କା ନେଇ କେଉଁଆଡ଼େ ଫେରାର ହୋଇଯାଇଛନ୍ତି। ମିଳିଥିବା ସୂଚନା ଅନୁସାରେ ଶାନ୍ତି ବାରିକଙ୍କର ୭ଲକ୍ଷ ୫୦ହଜାର, ସୁଚିଶ୍ରୀ ବାରିକଙ୍କ ୧୩ଲକ୍ଷ ୫୦ହଜାର, ସଞ୍ଜୁଦୁବି ଜୈନଙ୍କର ୧୫ଲକ୍ଷ, ଜେ.କଳାବତୀଙ୍କର ୪ଲକ୍ଷ, ରୁବିନା ମହାରଣାଙ୍କ ୨ଲକ୍ଷ, ଲିଲି ଦାସଙ୍କ ୭ଲକ୍ଷ, ଲକ୍ଷ୍ମୀପ୍ରିୟା ସିଂଙ୍କ ୧୦ଲକ୍ଷ ଏବଂ ରୀତାଞ୍ଜଳି ସାମନ୍ତରାୟଙ୍କର ୧୩ଗ୍ରାମ ସୁନା ସମେତ ପ୍ରାୟ ୫୦ରୁ ଊର୍ଦ୍ଧ୍ୱ ମହିଳାଙ୍କର ଲକ୍ଷ ଲକ୍ଷ ଟଙ୍କା ନେଇ ଫେରାର ହୋଇଯାଇଛନ୍ତି ତୃପ୍ତିରାଣୀ। ଅଭିଯୋଗକାରୀ ମହିଳାଙ୍କ କହିବାନୁସାରେ, ପ୍ରାୟ ୫କୋଟିରୁ ଊର୍ଦ୍ଧ୍ୱ ଟଙ୍କା ନେଇ ତୃପ୍ତିରାଣୀ ଫେରାର ହୋଇଯାଇଛନ୍ତି। ତାଙ୍କ ମୋବାଇଲକୁ ଫୋନ୍ କଲେ ମଧ୍ୟ ଫୋନ୍ ଉଠାଉ ନ ଥିବା ଏବଂ ପରେ ବନ୍ଦ କରିଦେଇଥିବା ଠକେଇର ଶିକାର ହୋଇଥିବା ମହିଳାମାନେ କହିଛନ୍ତି। ତେବେ ଏହି ଘଟଣାରେ ପୋଲିସ କିଭଳି ପଦକ୍ଷେପ ନେଉଛି ଏବଂ ତୃପ୍ତିରାଣୀଙ୍କୁ ଖୋଜି ପାଉଛି କି ନାହିଁ ତାହା ଦେଖିବାକୁ ବାକି ରହିଲା।
