ନୂଆଦିଲ୍ଲୀ,୧୮।୧୧: ଦେଶ ମଧ୍ୟରେ ଟେଲିକମ୍ ସେବା ଦ୍ରୁତଗତିରେ ଅଗ୍ରଗତି କରୁଛି। ଏବେ ମଧ୍ୟ ଅନେକ ସ୍ଥାନ ରହିଛି ଯେଉଁଠାରେ ଏହି ସେବାଠାରୁ ଲୋକ ବହୁ ଦୂରରେ ରହିଛନ୍ତି। ଉକ୍ତ ସ୍ଥାନଗୁଡ଼ିକୁ ସେବା ଯୋଗାଣ ଲକ୍ଷ୍ୟରେ କେନ୍ଦ୍ର ସରକାର ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି। ଏହି ପ୍ରକ୍ରିୟା ଅନ୍ତର୍ଗତ ଓଡ଼ିଶାର ପ୍ରାୟ ୩,୯୩୩ ଗ୍ରାମକୁ ୪-ଜି ଟେଲିକମ୍ ସେବା ଯୋଗାଣ କରିବା ନେଇ ଲକ୍ଷ୍ୟ ରଖାଯାଇଛି।
କେନ୍ଦ୍ର ଯୋଗାଯୋଗ ମନ୍ତ୍ରଣାଳୟ ସୂଚନା ମୁତାବକ, କନ୍ଧମାଳର ୧୦୯୪ ଗ୍ରାମ, ରାୟଗଡ଼ାର ୯୬୨, କୋରାପୁଟର ୫୨୦, କଳାହାଣ୍ଡିର ୫୧୬, ଗଜପତିର ୪୬୭, ମାଲକାନଗିରିର ୩୦୬, ନବରଙ୍ଗପୁରର ୧୭୭, ନୂଆପଡାର ୨୯, ଢେଙ୍କାନାଳ ଏବଂ ବଲାଙ୍ଗୀରର ୧୧ ଲେଖାଏ ଗ୍ରାମକୁ ଏହା ମଧ୍ୟରେ ସାମିଲ କରାଯାଇଛି। ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା କେନ୍ଦ୍ର କ୍ୟାବିନେଟ ବୈଠକରେ ଦେଶର ୫ ରାଜ୍ୟର ୪୪ ଆକାଂକ୍ଷୀ ଜିଲାରେ ୪ଜି ମୋବାଇଲ ସେବାଠାରୁ ଦୂରରେ ଥିବା ଗ୍ରାମଗୁଡ଼ିକରେ ଟେଲିକମ୍ ସେବା ଉପଲବ୍ଧ କରାଇବା ପ୍ରସ୍ତାବକୁ ମଞ୍ଜୁରୀ ଦିଆଯାଇଛି। ଏହି ରାଜ୍ୟଗୁଡ଼ିକ ମଧ୍ୟରେ ଓଡ଼ିଶା ସମେତ ଆନ୍ଧ୍ର ପ୍ରଦେଶ, ଛତିଶଗଡ଼, ଝାଡ଼ଖଣ୍ଡ ଏବଂ ମହାରାଷ୍ଟ୍ର ରହିଛି।
ଗ୍ରାମଗୁଡ଼ିକରେ ମୋବାଇଲ ସେବା ପହଞ୍ଚାଇବା ଲାଗି ୟୁନିଭର୍ସାଲ ସର୍ଭିସ ଓବ୍ଲିଗେଶନ ଫଣ୍ଡ (ୟୁଏସ୍ଓଏଫ୍)ର ବ୍ୟବହାରକୁ କ୍ୟାବିନେଟ ମଞ୍ଜୁରୀ ପ୍ରଦାନ କରିଛି। ମୋଟ ୭,୨୮୭ ଗ୍ରାମରେ ଏହି ବାବଦକୁ ୬,୪୬୪ କୋଟି ଟଙ୍କା ବିନିଯୋଗ କରାଯିବ। କ୍ୟାବିନେଟ ବୈଠକ ପରେ କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ ଅନୁରାଗ ଠାକୁର କହିଛନ୍ତି, ବିଶେଷକରି ୪-ଜି ସେବାକୁ ତ୍ୱରାନ୍ବିତ ଲକ୍ଷ୍ୟ ରଖାଯାଇଛି। ୭,୨୮୭ ଗ୍ରାମରେ ଟେଲିକମ୍ ଟାଓ୍ବାର ସ୍ଥାପନ ଏବଂ ସେବାରେ ଉନ୍ନତି ଲାଗି ବିଭିନ୍ନ ପଦକ୍ଷେପ ଗ୍ରହଣ କରାଯିବା ଦ୍ୱାରା ଲୋକମାନେ ବିଶେଷ ଭାବେ ଲାଭବାନ ହୋଇପାରିବେ।
୧୮ ମାସରେ ଯୋଜନାକୁ କାର୍ଯ୍ୟକାରୀ କରାଯିବ। ଏହା ମଧ୍ୟରେ ୫ ବର୍ଷର ପରିଚାଳନା ଖର୍ଚ୍ଚ ମଧ୍ୟ ସାମିଲ ରହିଛି। ଏଭଳି ପଦକ୍ଷେପ ଦ୍ୱାରା ଡିଜିଟାଲ ସଂଯୋଗ ବୃଦ୍ଧି, ଶିକ୍ଷା ଏବଂ ସୂଚନା ପ୍ରସାରଣ, ଦକ୍ଷତା ବିକାଶ ଏବଂ ଉନ୍ନତୀକରଣ, ବିପର୍ଯ୍ୟୟ ପରିଚାଳନା ଏବଂ ଇ-ଗଭର୍ନାନ୍ସ ଭଳି ଦିଗରେ ବିକାଶ ସାଧନ ହୋଇପାରିବ। ସେହିଭଳି ଏଣ୍ଟରପ୍ରାଇଜ, ଇ-କମର୍ସ, ଡିଜିଟାଲ ଇଣ୍ଡିଆ ଏବଂ ନିଯୁକ୍ତି ସୃଷ୍ଟିକୁ ଏହା ଉତ୍ସାହିତ କରିବ ଯୋଗାଯୋଗ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି।
