ସୁନ୍ଦରଗଡ଼,୩୦।୭(ଡି.ଏନ୍.ଏ.): ସୁନ୍ଦରଗଡ଼ ସହର ନିକଟ କିରେଇସ୍ଥିତ ଉତ୍କଳ ଗ୍ରାମ୍ୟବ୍ୟାଙ୍କରୁ ଗତ ୨୭ ତାରିଖରେ ବନ୍ଧୁକ ଦେଖାଇ ୪ଜଣ ଡକାୟତ ଲକ୍ଷାଧିକ ଟଙ୍କା ଲୁଟି ନେବା ଘଟଣାରେ ସୁନ୍ଦରଗଡ଼ ପୋଲିସକୁ ମିଳିଛି ସଫଳତା। ବ୍ୟାଙ୍କରୁ ଟଙ୍କା ଲୁଟ୍ ହେବାର ୪୮ଘଣ୍ଟା ମଧ୍ୟରେ ବିହାର ଓ ଝାଡଖଣ୍ଡ ପୋଲିସ ସହାୟତାରେ ସୁନ୍ଦରଗଡ଼ ପୋଲିସ ୪ଜଣ ଆନ୍ତଃରାଜ୍ୟ ଡକାୟତଙ୍କୁ ଝାଡ଼ଖଣ୍ଡ ରାଜ୍ୟ ଖୁଣ୍ଟିଠାରୁ ଗିରଫ କରିଛି। ଶୁକ୍ରବାର ଜିଲା ପୋଲିସ ମୁଖ୍ୟାଳୟରେ ଖବରଦାତା ସମ୍ମିଳନୀରେ ସୁନ୍ଦରଗଡ଼ ଏସ୍ପି ସାଗରିକା ନାଥ ଏହି ସୂଚନା ଦେଇଛନ୍ତି।
ଗିରଫ ୪ ଡକାୟତ ବିହାର ରାଜ୍ୟର ବୋଲି ଏସ୍ପି ପ୍ରକାଶ କରିଛନ୍ତି। ଏହି ଲୁଟ୍ ଘଟଣାରେ ୪ଜଣଙ୍କ ବ୍ୟତୀତ ଅନ୍ୟମାନଙ୍କ ସମ୍ପୃକ୍ତି ଅଛି କି ନାହିଁ ସେ ନେଇ ଅଧିକ ତଦନ୍ତ ଜାରି ରହିଥିବାରୁ ପୋଲିସ ଗିରଫ ୪ଜଣଙ୍କ ନାମ ପ୍ରକାଶ କରିନାହିଁ। ପୋଲିସ ସେମାନଙ୍କ ନିକଟରୁ ୪ଟି ପିସ୍ତଲ, ନମ୍ବର ବିହୀନ ୨ଟି ବାଇକ୍, ନଗଦ ୩୨ହଜାର ୧୪୦ ଟଙ୍କା, ୪ଟି ମୋବାଇଲ ଫୋନ୍ ଜବତ କରିଛି। ଗିରଫ ପରେ ସେମାନଙ୍କୁ ବିହାର ବନିହାର ଥାନାରେ ଅଟକ ରଖାଯାଇ ଅଧିକ ପଚରାଉଚୁରା କରାଯାଉଛି।
ବିହାର ପୋଲିସ ପାଇଁ ମୋଷ୍ଟ ଓ୍ବେଣ୍ଟେଡ ଥିବା ଗିରଫ ୪ଜଣ ଡକାୟତଙ୍କ ନାମରେ ବିହାର, ଝାଡ଼ଖଣ୍ଡ ରାଜ୍ୟର ବିଭିନ୍ନ ଥାନାରେ ଦେଢଶହରୁ ଊର୍ଦ୍ଧ୍ୱ ଲୁଟ୍, ବ୍ୟାଙ୍କ ଡକାୟତି ଓ ହତ୍ୟା ମାମଲା ରହିଛି। ଏମାନଙ୍କ ନାମରେ ବିହାର ପୋଲିସ ପକ୍ଷରୁ ୫୦ହଜାର ଟଙ୍କା ପୁରସ୍କାର ରାଶି ଘୋଷଣା କରାଯାଇଥିଲା। ଏହି ୪ଜଣ ଡକାୟତ ୨ଟି ବାଇକ୍ରେ ସୁନ୍ଦରଗଡ଼ ଆସି କିରେଇସ୍ଥିତ ବିଜୁ ଏକ୍ସପ୍ରେସ ଓ୍ବେ ପାର୍ଶ୍ୱରେ ଥିବା ଉତ୍କଳ ଗ୍ରାମ୍ୟ ବ୍ୟାଙ୍କରେ ପଶି ରିଭଲଭର ଦେଖାଇ କର୍ମଚାରୀ ଓ ମ୍ୟାନେଜରଙ୍କୁ ଭୟଭୀତ କରି ବ୍ୟାଙ୍କ ଲକର ଓ କ୍ୟାଶ କାଉଣ୍ଟରରୁ ୨ଲକ୍ଷ ୮୭ ହଜାର ୪୧୦ ଟଙ୍କା ଓ ଜଣେ ଗ୍ରାହକଙ୍କଠାରୁ ୫ହଜାର ଟଙ୍କା, ଜଣେ ବ୍ୟାଙ୍କ କର୍ମଚାରୀଙ୍କ ଠାରୁ ସୁନା ଚେନ୍ ଓ କର୍ମଚାରୀମାନଙ୍କ ମୋବାଇଲ ଫୋନ୍ ଲୁଟି ଫେରାର୍ ହୋଇଯାଇଥିଲେ।
