ଭୁବନେଶ୍ୱର,୨୦। ୯(ବ୍ୟୁରୋ): କରୋନା ମହାମାରୀ ସ୍ବାସ୍ଥ୍ୟ ସେବା ସହିତ ଆର୍ଥିକ ଅବସ୍ଥାକୁ କ୍ଷତିଗ୍ରସ୍ତ କରିଛି। ଲୋକମାନଙ୍କର ଆର୍ଥିକ ସ୍ଥିତିକୁ ଦୋହଲାଇ ଦେଇଥିବା ବେଳେ ରାଜକୋଷ ଉପରେ ଏହାର ପ୍ରଭାବ ପଡିଛି। ମାର୍ଚ୍ଚ ମାସ ଲକ୍ଡାଉନ ପରଠାରୁ ଯାନବାହନ ବିକ୍ରି ଏକ ପ୍ରକାର ସ୍ଥାଣୁ ପାଲଟି ଯାଇଛି । ରାଜ୍ୟରେ ଯାନବାହନ ବିକ୍ରି ପ୍ରାୟ ୩୦ ପ୍ରତିଶତ ହ୍ରାସ ପାଇଛି। ଏଥିସହିତ ଘରୋଇ ବସ୍ଗୁଡିକ ଉପରୁ ରାଜ୍ୟ ସରକାର ୩ ମାସ ସମ୍ପୂର୍ଣ୍ଣ ଓ ଆଉ ୩ ମାସ ଆଂଶିକ ଟିକସ ଛାଡ଼ କରିଛନ୍ତି। ଏଥିଯୋଗୁ ରାଜସ୍ବ ଆଦାୟ ୪୨ ପ୍ରତିଶତ କମିଯାଇଛି। ଗତ ୫ ମାସରେ ଯାନବାହନ ଟିକସ ବାବଦରେ ସରକାରଙ୍କୁ ପ୍ରାୟ ୨୮୨ କୋଟି ଟଙ୍କା ହରାଇବାକୁ ପଡିଛି।
ମିଳିଥିବା ସୂଚନା ଅନୁଯାୟୀ ରାଜ୍ୟରେ ୨୦୧୯ ଅଗଷ୍ଟରେ ୪୫,୫୫୫ ଦୁଇଚକିଆ ଯାନ ବିକ୍ରି ହୋଇଥିବା ବେଳେ ଚଳିତ ବର୍ଷ ଏହା ୩୨ ହଜାର ୧୬୫କୁ ଖସି ଆସିଛି। ଅର୍ଥାତ ଦୁଇଚକିଆ ଯାନରେ ୨୯ ପ୍ରତିଶତ ବିକ୍ରି କମିଥିବା ବେଳେ ୩ ଚକିଆରେ ୬୯ ପ୍ରତିଶତ, ୪ ଚକିଆ ଯାନ ପ୍ରାୟ ୬୦ ପ୍ରତିଶତ କମିଯାଇଛି। କେବଳ ଟ୍ରାକ୍ଟର ବିକ୍ରିରେ ୪୦ ପ୍ରତିଶତ ବୃଦ୍ଧି ଘଟିଛି। ରାଜ୍ୟରେ ଅଗଷ୍ଟରେ ହାରାହାରି ୩୦ ପ୍ରତିଶତ ଯାନବାହନ ବିକ୍ରି ହ୍ରାସ ପାଇଛି।
ରାଜ୍ୟ ସରକାର ଚଳିତ ବଜେଟରେ ଯାନବାହନ ଟିକସ ବାବଦରେ ପ୍ରାୟ ୨ ହଜାର କୋଟି ଟଙ୍କା ଆଦାୟ କରିବାକୁ ଲକ୍ଷ୍ୟ ରଖିଥିଲେ। କରୋନା ଯୋଗୁ ଏହି ଲକ୍ଷ୍ୟ ହାସଲ ଏକ ପ୍ରକାର ବାଟବଣା ହୋଇ ଯାଇଛି। ପରିବହନ ବିଭାଗ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଏପ୍ରିଲରୁ ଅଗଷ୍ଟ ମଧ୍ୟରେ ପରିବହନ ଟିକସ ୬୭୦ କୋଟି ଆଦାୟ ହେବା ଜାଗାରେ ହୋଇଛି ମାତ୍ର ୩୮୮ କୋଟି ୬୦ ଲକ୍ଷ ଟଙ୍କା। ଅର୍ଥାତ୍ ଲକ୍ଷ୍ୟର ମାତ୍ର ୫୮ ପ୍ରତିଶତ ଆଦାୟ ସମ୍ଭବ ହୋଇପାରିଛି। ଗତ ଆର୍ଥିକ ବର୍ଷ ତୁଳନାରେ ଚଳିତ ବର୍ଷ ୪୨ ପ୍ରତିଶତ ଟିକସ ହରାଇବାକୁ ପଡିଛି। ଚଳିତ ଆର୍ଥିକ ବର୍ଷରେ ଟିକସ ଅଭିବୃଦ୍ଧି ୧୧ ପ୍ରତିଶତ ରଖାଯାଇଥିଲା। ତେବେ ସେହି ଲକ୍ଷ୍ୟ ହାସଲ ସହଜ ହେବ ନାହିଁ। କରୋନା ଯୋଗୁ ମଧ୍ୟବିତ୍ତ ବର୍ଗର ଲୋକାମାନେ ଯାନବାହନ କିଣିବାରେ ଅର୍ଥ ବ୍ୟୟ କରିବାକୁ ପଛଘୁଞ୍ଚା ଦେଉଛନ୍ତି। ଆଗାମୀ ଦିନରେ ସେମାନଙ୍କର ଆୟକୁ ନେଇ ଆଶା ଓ ଆଶଙ୍କାରେ ରହିଛନ୍ତି। ଯାହା କିଛି ସଞ୍ଚିତ ଅର୍ଥ ଅଛି ତାହାକୁ ଯାନବାହନ କିଣିବା କ୍ଷେତ୍ରରେ ନିବେଶ କରିବାକୁ ଆଗ୍ରହ ଦେଖାଉ ନାହାନ୍ତି। ଆଗାମୀ ଦିନର କାରବାର ଅସ୍ପଷ୍ଟ ରହିଥିବାରୁ ଯାତ୍ରୀବାହୀ କିମ୍ବା ମାଲ୍ବାହୀ ଯାନ ପରିବହନ କ୍ରୟ ଉପରେ ଲୋକମାନେ ପୁଞ୍ଜି ନିବେଶ କରିବାକୁ ଚାହୁଁ ନ ଥିବା ଯୋଗୁ ଯାନବାହନ ବିକ୍ରି ପ୍ରଭାବିତ ହେଉଛି। ଏଥିଯୋଗୁ ରାଜସ୍ବ ବଢି ପାରୁ ନାହିଁ । ଆଗାମୀ ଦିନରେ ଏଥିରେ ସୁଧାର ଆସିଲେ ମଧ୍ୟ ଲକ୍ଷ୍ୟ ହାସଲ ସେତେଟା ସହଜ ହେବ ନାହିଁ ବୋଲି ପରିବହନ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି।
