ନୂଆଦିଲ୍ଲୀ, ୧୫।୧୨: କେନ୍ଦ୍ର ସରକାର ନିର୍ବାଚନୀ ସଂସ୍କାର ପାଇଁ ଚଳିତ ଶୀତ ଅଧିବେଶନରେ ଏକ ବିଲ୍ ଆଣିବାକୁ ଯାଉଛନ୍ତି। ଉକ୍ତ ବିଲ୍କୁ ବୁଧବାର କେନ୍ଦ୍ର କ୍ୟାବିନେଟ ମଞ୍ଜୁରୀ ପ୍ରଦାନ କରିଥିବା ଜଣାପଡ଼ିଛି। ବିଲ୍ ଗୃହୀତ ହେଲେ ଭୋଟର ପରିଚୟପତ୍ରରେ ଆଧାର ନମ୍ବର ସଂଯୋଗ ଲାଗି ନିର୍ବାଚନ କମିଶନଙ୍କୁ ଅନୁମତି ମିଳିବ। ଏହା ବ୍ୟତୀତ ସେନାରେ ନିୟୋଜିତ ବ୍ୟକ୍ତି (ସର୍ଭିସ ଭୋଟର)ମାନଙ୍କ ଲାଗି ନିର୍ବାଚନୀ ଆଇନ ଲିଙ୍ଗଗତ ନିରପେକ୍ଷ ହେବ। ବିଲ୍ର ଅନ୍ୟ ଏକ ବ୍ୟବସ୍ଥା ଅନୁଯାୟୀ ନୂଆ ଭୋଟର ବର୍ଷକୁ ୪ଟି ଭିନ୍ନ ଭିନ୍ନ ତାରିଖରେ ସେମାନଙ୍କ ନାମ ଭୋଟର ତାଲିକାରେ ସଂଯୋଗ କରିବା ସୁଯୋଗ ପାଇବେ।
ନିର୍ବାଚନ କମିଶନଙ୍କ ସୁପାରିସ୍ କ୍ରମେ ସରକାର ନିର୍ବାଚନ ପ୍ରକ୍ରିୟାରେ ସଂସ୍କାର ପାଇଁ କେତେକ ସଂଶୋଧନ କରିବାକୁ ଯାଉଛନ୍ତି। ଭୋଟର ତାଲିକାକୁ ବଳିଷ୍ଠ କରିବା, ଭୋଟଦାନ ପ୍ରକ୍ରିୟାରେ ଅଧିକ ଲୋକଙ୍କୁ ସାମିଲ କରିବା, ନିର୍ବାଚନ କମିଶନଙ୍କୁ ଅଧିକ କ୍ଷମତା ପ୍ରଦାନ ଏବଂ ଜାଲିଆତି ରୋକିବା ପାଇଁ ଏହି ସଂସ୍କାର ଅଣାଯାଉଥିବା ସରକାର କହିଛନ୍ତି। ସେହି ଅନୁଯାୟୀ ପାନ୍-ଆଧାର ଲିଙ୍କ୍ ଭଳି ଭୋଟର ଆଇଡି ବା ଇଲେକ୍ଟୋରାଲ କାର୍ଡ ସହ ଆଧାର ସଂଯୋଗ ହେବ। ତେବେ ଏହାକୁ ବାଧ୍ୟତାମୂଳକ କରାଯିବ ନାହିଁ। ଏହା ଉପରେ କରାଯାଇଥିବା ପାଇଲଟ ପ୍ରୋଜେକ୍ଟ ସଫଳ ହୋଇଛି। ଏହା ଜାଲିଆତି ହଟାଇବା ସହ ଭୋଟର ତାଲିକାକୁ ବଳିଷ୍ଠ କରିବ ବୋଲି ନିର୍ବାଚନ କମିଶନ କହିଛନ୍ତି। ଭୋଟର ତାଲିକାରେ ନାମ ଯୋଡ଼ିବା ଲାଗି ବର୍ଷକୁ ୪ ଥର ସୁଯୋଗ ମିଳିବ। ବର୍ତ୍ତମାନର ବ୍ୟବସ୍ଥା ଅନୁସାରେ ଏଥିପାଇଁ ବର୍ଷକୁ ଗୋଟିଏ ଥର ସୁଯୋଗ ମିଳୁଥିଲା। କିନ୍ତୁ ଆସନ୍ତା ବର୍ଷ ଜାନୁଆରୀ ୧ରୁ ୧୮ ବର୍ଷରେ ପହଞ୍ଚୁଥିବା ନୂଆ ଭୋଟର ବର୍ଷର ୪ଟି ଭିନ୍ନ ଭିନ୍ନ ସମୟରେ ନିଜ ନାମ ପଞ୍ଜୀକରଣ କରିପାରିବେ।
