କେସିଙ୍ଗା,୨୩।୫: କଳାହାଣ୍ଡି ଜିଲା କେସିଙ୍ଗା ବ୍ଲକ ବୋରିଆ ଗ୍ରାମ ନିକଟସ୍ଥ ଦେହେରେନ ନାଲାରୁ ସୋମବାର ବାଲି ଚାଲାଣ ହେଉଥିଲା। କୌଣସି ସୂତ୍ରରୁ ଖବର ପାଇ ଲଇତରା ରାଜସ୍ବ ନିରୀକ୍ଷକ ପ୍ରିୟବ୍ରତ ପୃଷ୍ଟି ବାଲିଘାଟରେ ଚଢ଼ାଉ କରିଥିଲେ। ଚଢ଼ାଉ ବେଳେ ରାଜସ୍ବ ନିରୀକ୍ଷକ ପୃଷ୍ଟି ଘଟଣାସ୍ଥଳରୁ ୪ଟି ହାଇଓ୍ବା ଏବଂ ଗୋଟିଏ ଜେସିବି ମେଶିନ ଜବତ କରିଥିଲେ। ଏପରି କି ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି ୪ଜଣ ଡ୍ରାଇଭରଙ୍କୁ ଥାନାକୁ ନେଇଥିଲା। ଥାନାରେ ଅଟକ ରଖି ପୋଲିସ ଅଧିକ ପଚରାଉଚରା ଚଳାଇଛି। କେସିଙ୍ଗା ପୋଲିସ ଘଟଣାସ୍ଥଳରୁ ୪ଟି ହାଇଓ୍ବା ଜବତ କରି ଥାନାରେ ରଖିଛି। ଅନ୍ୟପକ୍ଷେ ଦୀର୍ଘଦିନ ହେଲା ସମ୍ପୃକ୍ତ ଅଞ୍ଚଳରୁ ବାଲି ଚୋରା ଚାଲାଣ ହେଉଥିବା ଅଭିଯୋଗ ହେଉଥିଲା। ଏ ନେଇ ଲଇତରା ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ପକ୍ଷରୁ ଥାନାରେ ଏକ ଅଭିଯୋଗ ହୋଇଛି। ପୋଲିସ ପୃଥକ୍ ୪ଟି ମାମଲା(ନଂ.୪୦/୨୨, ୪୧/୨୨, ୪୨/୨୨, ୪୩/୨୨) ରୁଜୁ କରିଛି। ଚଢାଉରେ କେସିଙ୍ଗା ଓ ଲଇତରା ସୁପର ଭାଇଜର ଅଜୟ ରାଜ ଶିଖା, କେସିଙ୍ଗା ଆର୍ଆଇ ନିହାରିକା ଦୋରା ପ୍ରମୁଖ ସାମଲି ହୋଇଥିଲେ।
