ବଲାଙ୍ଗୀର,୨୧ା୧୦(ବୀରେନ୍ଦ୍ର କୁମାର ଝାଙ୍କର): କଫ ସିରପ୍ ଚୋରାଚାଲାଣ କରୁଥିବା ଏକ ଗୋଷ୍ଠୀକୁ ବଲାଙ୍ଗୀର ଟାଉନ୍ ପୋଲିସ ଟିମ୍ ଶୁକ୍ରବାର ଭୋର ୬ଟାରେ କାବୁ କରିଛି। ସେମାନଙ୍କଠାରୁ ୪ ହଜାର ବୋତଲ କଫ ସିରପ୍ ଜବତ କରାଯାଇଛି। ଏଥିସହ ପୋଲିସ ୬ ଅଭିଯୁକ୍ତଙ୍କୁ ଗିରଫ କରିବା ସହ ସେମାନଙ୍କଠାରୁ କଫ ସିରପ୍ ବୋଝେଇ ଏକ ମହିନ୍ଦ୍ରା ପିକ୍ଅପ୍ (ଓଡି ୧୭ ଏସ୍ ୧୮୯୩), ଏକ କାର (ଓଡି ୧୭ ଡି ୦୮୮୮) ଏବଂ ଏକ ବାଇକ୍ (ଓଡି ୩୧ ଏ ୭୩୯୨)କୁ ଜବତ କରିଛନ୍ତି। ଗିରଫ ଅଭିଯୁକ୍ତମାନେ ହେଲେ ପୁଇଁତଲା ଥାନା ଭୁର୍ଷିପାଲି ଗଁାର ରଞ୍ଜନ ସ୍ବାଇଁ, ରମାକାନ୍ତ ସ୍ବାଇଁ, କୁଲଥିପାଲି ଗାଁର ପଦ୍ମନାଭ ଓରଫ୍ ପିଙ୍କୁ ପ୍ରଧାନ, ଟାଉନ୍ ଥାନା ହାତୀଶାଳପଡ଼ାର ପରମେଶ୍ୱର ଖର୍ସେଲ, ସୁବାଶିଷ ବଘାର ଓରଫ୍ ଶୁଭ, ଲୋଇସିଂହା ଥାନା ବୁର୍ଡା ଗଁାର ଶିବାଶିଷ ଅଭିଜିତ୍ ବଘାର। ଟାଉନ୍ ଥାନାରେ ଏନେଇ ଏକ ମାମଲା (ନଂ. ୫୭୦/୨୩) ରୁଜୁ କରାଯାଇଛି।
ବଲାଙ୍ଗୀର ଏସ୍ପି ଋଷିକେଶ ଡି ଖିଲାରି ଅପରାହ୍ନରେ ଟାଉନ୍ ଥାନାରେ ଏକ ଖବରଦାତା ସମ୍ମିଳନୀ ଡାକି କଫ ସିରପ୍ ଚୋରାଚାଲାଣ ସମ୍ପର୍କରେ ସୂଚନା ଦେଇଛନ୍ତି। ବଲାଙ୍ଗୀର ସହରର ଏହି ଗୋଷ୍ଠୀ କଫ ସିରପ୍ ଚୋରାଚାଲାଣ କରୁଥିବା ନେଇ ପୋଲିସକୁ ନିର୍ଭରଯୋଗ୍ୟ ସୂତ୍ରରୁ ଖବର ମିଳିଥିଲା। ଗାଡ଼ିରେ କଫ ସିରପ୍ ଚୋରାଚାଲାଣ ହେଉଥିବା ଜାଣିବା ପରେ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଥିଲା। ଟାଉନ୍ ଥାନା ଆଇଆଇସି ବିଶ୍ୱଜିତ ମନବୋଧଙ୍କ ନେତୃତ୍ୱରେ ପୋଲିସ ଟିମ୍ ସମ୍ବଲପୁର ରାସ୍ତାର ରିଲାଏନ୍ସ ପେଟ୍ରୋଲ ପମ୍ପ୍ ପଟକୁ ଧାଇଁ ସେଠାରେ ମହିନ୍ଦ୍ରା ପିକ୍ଅପ୍ ଗାଡ଼ି ସହ ଏକ କାର ଏବଂ ଏକ ବାଇକ୍କୁ ସନ୍ଦେହରେ ଅଟକାଇଥିଲା। ପରେ ସେହି ଗାଡ଼ିରୁ ୪ ହଜାର ବୋତଲ କଫ ସିରପ୍ ଜବତ କରାଯାଇଥିଲା। ବଲାଙ୍ଗୀରରୁ ବରଗଡ଼ ଓ ସମ୍ବଲପୁର ଜିଲାକୁ ଏହି କଫ ସିରପ୍ ଚାଲାଣ ହେଉଥିବା ଜଣାପଡ଼ିଛି। ବଲାଙ୍ଗୀର ଏସ୍ପି ସୂଚନା ଦେଇଛନ୍ତି ଯେ, କଫ ସିରପ୍ ଓ ଅନ୍ୟାନ୍ୟ ନିଶା କାରବାର ବିରୋଧରେ ପୋଲିସର ଅଭିଯାନ ଜାରି ରହିବ। କିଭଳି ବଲାଙ୍ଗୀର ଜିଲା ମଧ୍ୟକୁ କଫ ସିରପ୍ ଚୋରାଚାଲାଣ ବନ୍ଦ ହେବ, କେଉଁ ଜିଲାରୁ ଏଠାକୁ କଫ ସିରପ୍ ଆସୁଛି ତା’ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି। ନିଶା ସେବନରୁ ଯୁବତୀ ଯୁବକ ଏବଂ ଜନସାଧାରଣ କିଭଳି ଦୂରରେ ରହିବେ ଏବଂ ସ୍କୁଲ କଲେଜରେ କିଭଳି ପୋଲିସ ପ୍ରଶାସନ ପକ୍ଷରୁ ସଚେତନତା କାର୍ଯ୍ୟକ୍ରମ କରାଯିବ ସେନେଇ ଏସ୍ପି ଖିଲାରି ସୂଚନା ଦେଇଥିଲେ।
