ଭୁବନେଶ୍ୱର,୧୩ା୯ (ବ୍ୟୁରୋ)/ ସୁବର୍ଣ୍ଣପୁର (ନି.ପ୍ର) : କ୍ରାଇମବ୍ରାଞ୍ଚ ଏସ୍ଟିଏଫ୍ ଆଉଏକ ଆନ୍ତଃରାଜ୍ୟ ଗଞ୍ଜେଇ ଚୋରା ଚାଲାଣ ର଼୍ୟାକେଟକୁ ଧରିଛି। ରବିବାର ସୁବର୍ଣ୍ଣପୁର ଜିଲା ସୁବଳୟା ଥାନା ଅଞ୍ଚଳରୁ ୪.୭୯ କୁଇଣ୍ଟାଲ ଗଞ୍ଜେଇ ଜବତ କରିବା ସହ ର଼୍ୟାକେଟରେ ସଂପୃକ୍ତ ୪ ଅଭିଯୁକ୍ତଙ୍କୁ ଗିରଫ କରିଛି। ସେମାନଙ୍କ ନିକଟରୁ ନଗଦ ୯.୭୭ ଲକ୍ଷ, ଚୋରା ଚାଲାଣରେ ବ୍ୟବହୃତ ପିକ୍ଅପ୍ ଭ୍ୟାନ ଓ ଏକ ହୋଣ୍ଡା ସିଟି କାରକୁ ଜବତ କରିଛି। ଗିରଫ ଅଭିଯୁକ୍ତମାନେ ହେଲେ ସୁବଳୟା ଥାନା କାସଲପୁର ଅଞ୍ଚଳର ନରାୟଣ ପାତ୍ର ଓରଫ ମୁନୁ, ରେଢାଖୋଲା ଥାନା କଦଳୀଗଡ ଅଞ୍ଚଳର ସଞ୍ଜୟ ମେଶ୍ୱ, ବୀରମହାରାଜପୁର ଥାନା ହିଲୁଙ୍ଗ ଅଞ୍ଚଳର ସୌରଭ କୁମାର ବାରିକ ଓ ମଧ୍ୟପ୍ରଦେଶର ସୁଶୀଲ ମିଶ୍ର।
ସୂଚନା ମୁତାବକ, ସୁବଳୟା ଥାନାଞ୍ଚଳରୁ ବିପୁଳ ପରିମାଣ ଗଞ୍ଜେଇ ରାଜ୍ୟ ବାହାରକୁ ଚାଲାଣ ହେଉଥିବା ନେଇ ଗୋଇନ୍ଦା ଖବର ପହଞ୍ଚତ୍ଥିଲା। ଏସ୍ଟିଏଫ୍ ଟିମ୍ ପ୍ରାୟ ୨ ଦିନ ଧରି ଉକ୍ତ ଥାନାଞ୍ଚଳରେ ଗୁପ୍ତରେ ଡେରା ପକାଇବା ସହ ଅଭିଯୁକ୍ତଙ୍କୁ ଧରିବା ପାଇଁ ଜାଲ ବିଛାଇଥିଲା। ରବିବାର ଭୋର୍ରେ ହୋଣ୍ଡା ସିଟି କାର (ଡବ୍ଲ୍ୟୁ ବି୦୨ ଏକ୍ସ ୭୮୧୨ )କୁ ସନ୍ଦେହଜନକ ଅବସ୍ଥାରେ ଦେଖିବା ପରେ ତାହା ଉପରେ ଏସ୍ଟିଏଫ୍ ଅଧିକାରୀମାନେ ନଜର ରଖିଥିଲେ। ଉକ୍ତ କାର୍ଟ ପିତାମାହୁଲ ରୋଡ୍ରେ ଏକ ନମ୍ବର ବିହୀନ ପିକ୍ଅପ୍ ଭ୍ୟାନ ନିକଟରେ ଅଟକିଯିବା ପରେ ଏସ୍ଟିଏଫ୍ ଟିମ ଚାରପଟୁ ଘେରାଉ କରି ପ୍ରଥମେ ୪ ଅଭିଯୁକ୍ତଙ୍କୁ କାବୁ କରିନେଇଥିଲେ। ପିକଅପ ଭ୍ୟାନକୁ ଯାଞ୍ଚ କରିବା ପରେ ସେଥିରୁ ଗଞ୍ଜେଇ, ଟଙ୍କା ଓ ଅନ୍ୟାନ୍ୟ ସାମଗ୍ରୀ ମିଳିଥିଲା। ଏ ନେଇ ସୁବଳୟା ଥାନାରେ ଏନ୍ଡିପିଏସ୍ ଆକ୍ଟ ଅନୁଯାୟୀ ୭୦/୨୦ରେ ମାମଲା ରୁଜୁ କରାଯିବା ସହ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କୁ ଧରିବା ପାଇଁ ତଦନ୍ତ ଜାରି ରଖିଛି।
