ନୂଆଦିଲ୍ଲୀ,୧୭।୯: ଅଷ୍ଟ୍ରେଲିଆର ଅଭିଜ୍ଞ ୱିକେଟ୍କିପର-ବ୍ୟାଟର ମାଥ୍ୟୁ ୱେଡ୍ ବିଗ୍ ବାଶ୍ ଲିଗ୍ (BBL)ରୁ ଅବସର ଘୋଷଣା କରିଛନ୍ତି । ଏହା ପୂର୍ବରୁ ସେ ଅନ୍ତର୍ଜାତୀୟ କ୍ରିକେଟ୍ରୁ ମଧ୍ୟ ବିଦାୟ ନେଇସାରିଛନ୍ତି । ୨୦୨୪ ଟି-୨୦ ବିଶ୍ୱକପ୍ ପରେ ଅନ୍ତର୍ଜାତୀୟ କ୍ରିକେଟ୍କୁ ଅଲବିଦା କହିଥିବା ୱେଡ୍ ଏବେ ପୂର୍ଣ୍ଣକାଳୀନ କୋଚ୍ ଭାବେ ନୂଆ ଇନିଂସ୍ ଆରମ୍ଭ କରିବେ। ୱେଡ୍ ଅଷ୍ଟ୍ରେଲିଆର ହ୍ୱାଇଟ୍-ବଲ୍ ଟିମ୍ରେ ବ୍ୟାଟିଂ କୋଚ୍ ଭୂମିକାରେ ଦେଖାଯିବେ । BBLରେ ଖେଳିବା ସମୟରେ ମଧ୍ୟ ସେ ଅଷ୍ଟ୍ରେଲିଆ ଜାତୀୟ ଦଳ ସହ ପରାମର୍ଶଦାତା ଭାବେ ଜଡ଼ିତ ଥିଲେ।
ଅନ୍ତର୍ଜାତୀୟ କ୍ରିକେଟ୍ରୁ ଅବସର ନେବା ପୂର୍ବରୁ ୱେଡ୍ ଅଷ୍ଟ୍ରେଲିଆ ପାଇଁ ତିନୋଟି ଫର୍ମାଟ୍ରେ ମୋଟ ୨୨୭ଟି ମ୍ୟାଚ୍ ଖେଳିଥିଲେ । ତାଙ୍କ ନାମରେ ମୋଟ ୪୬୮୨ ରନ୍ ରହିଛି । ୩୮ ବର୍ଷୀୟ ୱେଡ୍ଙ୍କ BBL କ୍ୟାରିୟର ମଧ୍ୟ ଦୀର୍ଘ ରହିଛି । ୨୦୧୧ରୁ ୨୦୨୬ ପର୍ଯ୍ୟନ୍ତ ସେ ମେଲବର୍ଣ୍ଣ ଷ୍ଟାର୍ସ, ମେଲବର୍ଣ୍ଣ ରେନେଗେଡ୍ସ ଓ ହୋବାର୍ଟ ହରିକେନ୍ସ ପାଇଁ ଖେଳିଥିଲେ। ଗତ ୯ଟି ସିଜନ୍ ଧରି ସେ ହରିକେନ୍ସର ଅଂଶ ଥିଲେ। BBLରେ ୧୧୯ଟି ମ୍ୟାଚ୍ ଖେଳି ୱେଡ୍ ୨୯୭୮ ରନ୍ ସଂଗ୍ରହ କରିଛନ୍ତି। ଏଥିରେ ଗୋଟିଏ ଶତକ ଓ ୧୯ଟି ଅର୍ଦ୍ଧଶତକ ରହିଛି। ୱିକେଟ୍କିପର ଭାବେ ସେ ୭୦ଟି ଡିସ୍ମିସାଲ୍ ମଧ୍ୟ କରିଛନ୍ତି।
BBL ୨୦୨୫-୨୬ ସିଜନ୍ ୱେଡ୍ଙ୍କ ପାଇଁ ବିଶେଷ ସଫଳ ରହିନଥିଲା। ସେ ୧୧ଟି ମ୍ୟାଚ୍ରେ ମାତ୍ର ୧୬୧ ରନ୍ କରିଥିଲେ ଏବଂ ଗୋଟିଏ ବି ଅର୍ଦ୍ଧଶତକ ହାସଲ କରିପାରିନଥିଲେ । ତେବେ ହୋବାର୍ଟ ହରିକେନ୍ସ ସହ ତାଙ୍କର ଦୀର୍ଘ କ୍ୟାରିୟରରେ ସେ ଏକ ବଡ଼ ସଫଳତା ହାସଲ କରିଥିଲେ। ୨୦୨୪-୨୫ ସିଜନ୍ରେ ହରିକେନ୍ସ ସହ ସେ BBL ଟାଇଟଲ୍ ଜିତିଥିଲେ। ୱେଡ୍ଙ୍କ ଅନ୍ତର୍ଜାତୀୟ କ୍ୟାରିୟରର ସବୁଠାରୁ ସ୍ମରଣୀୟ ମୁହୂର୍ତ୍ତ ମଧ୍ୟରୁ ୨୦୨୧ ଟି-୨୦ ବିଶ୍ୱକପ୍ର ସେମିଫାଇନାଲ୍ ଅନ୍ୟତମ। ପାକିସ୍ତାନ ବିପକ୍ଷ ଏହି ମ୍ୟାଚ୍ରେ ୱେଡ୍ ଦ୍ରୁତ ବ୍ୟାଟିଂ କରି ଶାହିନ୍ ଶାହ ଆଫ୍ରିଦିଙ୍କୁ ଲଗାତାର ୩ଟି ଛକା ମାରିଥିଲେ। ଏହି ଦମଦାର ଫିନିଶ୍ ଅଷ୍ଟ୍ରେଲିଆକୁ ମ୍ୟାଚ୍ ଜିତାଇବା ସହ ଫାଇନାଲ୍ରେ ପହଞ୍ଚାଇଥିଲା।
