ନୂଆଦିଲ୍ଲୀ,୮ା୧୦: ଦିଲ୍ଲୀ ଅବକାରୀ ମନିଲଣ୍ଡରିଂ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଶୁକ୍ରବାର ଦିଲ୍ଲୀ-ଏନ୍ସିଆର୍, ପଞ୍ଜାବ ଏବଂ ହରିୟାଣାର ୩୫ଟି ସ୍ଥାନରେ ଚଢ଼ାଉ କରିଛି। ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ବିରୋଧରେ ପ୍ରମାଣ ଖୋଜି ବାହାର କରିବା ଲାଗି ୩୦୦ରୁ ଅଧିକ ସିବିଆଇ ଏବଂ ଇଡି ଅଧିକାରୀ ୨୪ ଘଣ୍ଟା କାର୍ଯ୍ୟ କରୁଛନ୍ତି। ହେଲେ ସେମାନେ କୌଣସି ଭୁଲ୍ ବାହାର କରିପାରି ନ ଥିବା ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଟୁଇଟ୍ କରିଛନ୍ତି। ସେମାନଙ୍କ କୁତ୍ସିତ ରାଜନୀତି ଲାଗି ଏତେସଂଖ୍ୟାରେ ଅଫିସରଙ୍କ ସମୟ ବରବାଦ କରାଯାଉଛି। ଦେଶ ଆଗେଇବ କିପରି ବୋଲି କେଜ୍ରିଓ୍ବାଲ ପ୍ରଶ୍ନ କରିଛନ୍ତି। ଦିଲ୍ଲୀ ଅବକାରୀ ନୀତି ୨୦୨୧-୨୨ ଗତବର୍ଷ ନଭେମ୍ବର ୧୭ରେ କାର୍ଯ୍ୟକାରୀ ହୋଇଥିଲା। ଏହା ଉପରେ ସିବିଆଇ ତଦନ୍ତ ପରେ ଚଳିତ ବର୍ଷ ଜୁଲାଇରେ କେଜ୍ରିଓ୍ବାଲ ସରକାର ଏହାକୁ ରଦ୍ଦ କରିଦେଇଥିଲେ। ଅବକାରୀ ନୀତି କାର୍ଯ୍ୟକାରିତାରେ ଅନିୟମିତତା ହୋଇଥିବା ଅଭିଯୋଗ ଉପରେ ଉପରାଜ୍ୟପାଳ ସିବିଆଇ ତଦନ୍ତ ଲାଗି ସୁପାରିସ କରିଥିଲେ।
