ଭୁବନେଶ୍ୱର, ୨୪।୭(ବ୍ୟୁରୋ): ପଞ୍ଚ୍ମ୍ୟାନ ଭାବେ ପରିଚିତ ସତ୍ୟପୀର ପ୍ରଧାନ ଆଉଏକ ବିଶ୍ୱ ରେକର୍ଡ ଅପେକ୍ଷାରେ। ସ୍ଲୋଭାକିଆର ମୁଷ୍ଟିଯୋଦ୍ଧା ପାଭେଲ୍ ରୁଷୋଭ୍ଙ୍କ ଗିନିଜ୍ ବୁକ୍ ଅଫ୍ ଓ୍ବାଲର୍ଡ ରେକର୍ଡକୁ ଭାଙ୍ଗି ଭାରତ ତଥା ଓଡ଼ିଶା ପାଇଁ ଗୌରବ ଆଣିବେ ବୋଲି ଦାବି କରିଛନ୍ତି। ପୂର୍ବରୁ ପାଭେଲ୍ ୧ ମିନିଟ୍ରେ ସର୍ବାଧିକ ୩୩୪ଥର ମୁଷ୍ଟି ଘାତ କରି ଗିଜିନ୍ ବୁକ୍ରେ ସ୍ଥାନ ପାଇଥିଲେ। ଏବେ ସତ୍ୟପୀର ୩୪୮ଥର ମୁଷ୍ଟି ପ୍ରଘାତ କରି ନୂଆ ରେକର୍ଡ କରିବାକୁ ଯାଉଛନ୍ତି। ଶୁକ୍ରବାର ବୁଦ୍ଧମନ୍ଦିର ପରିସରରେ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମରେ ସେ ସର୍ବାଧିକ ମୁଷ୍ଟିଘାତ କରି ଦେଖାଇଛନ୍ତି। ସତ୍ୟପୀର ଏଥିପାଇଁ ମାସକ ତଳେ ଆବେଦନ କରିଥିବାବେଳେ ଗତ ୭ ତାରିଖରେ ଅନୁମତି ପାଇଥିଲେ। ରେକର୍ଡର ସମସ୍ତ ତଥ୍ୟ ଓ ଆବଶ୍ୟକ ସୂଚନା ଗିନିଜ୍ ବିଶ୍ୱ ରେକର୍ଡକୁ ପଠାଯିବ। କାର୍ଯ୍ୟକ୍ରମରେ ଏକ୍ସପର୍ଟ ୱିଟ୍ନେଶ ଭାବରେ ସୁଧୀର ଚନ୍ଦ୍ର ଛତ୍ରିଆ, ପଞ୍ଚ୍ ପ୍ୟାଡ୍ କିପର୍ ଭାବେ ସୁଜ୍ଞାନ କେଶରୀ ପ୍ରଧାନ, ଟାଇମ କିପର ଭାବରେ କ୍ରୀଡାବିତ୍ ସସ୍ମିତା ରାଉତରାଏ ଓ ଗଜେନ୍ଦ୍ର ବାରିକ ଉପସ୍ଥିତ ଥିଲେ। ସୂଚନାଯୋଗ୍ୟ, ସତ୍ୟପୀର ପୂର୍ବରୁ ୨୦୧୭ ଓ ୨୦୧୮ରେ ଗୋଟିଏ ହାତରେ ମୁଷ୍ଟି ପ୍ରଘାତ କରି ଦୁଇଟି ଗିନିଜ୍ ଓ୍ବାଲର୍ଡ ରେକର୍ଡରେ ନିଜ ନାମ ସ୍ଥାନିତ କରିଛନ୍ତି। ବିଭିନ୍ନ କୀର୍ତ୍ତି ପାଇଁ ମିଳିତ ଜାତସଂଘ (ୟୁଏନ୍) ତରଫରୁ ଦିଲ୍ଲୀ ଆଇଆଇଟିରେ ତାଙ୍କୁ ‘କର୍ମବୀର ପୁରସ୍କାର’ ମିଳିଛି। ଏଥିସହ ଦେଶ ତଥା ଦେଶ ବାହାରେ ମଧ୍ୟ ଅନେକ ସମ୍ମାନରେ ସମ୍ମାନିତ ହୋଇଛନ୍ତି।
