ନୂଆଦିଲ୍ଲୀ,୧୬ ।୧୨: ଭବିଷ୍ୟତରେ ମା’ ଗର୍ଭ ପରିବର୍ତ୍ତେ ମାନବ ସନ୍ତାନ କାରଖାନା ବା ଫ୍ୟାକ୍ଟ୍ରିରେ ଜନ୍ମନେବେ । ବିଜ୍ଞାନ କ୍ଷେତ୍ରରେ ବୈଜ୍ଞାନିମାନଙ୍କ ଏହି ନୂତନ ଆବିଷ୍କାର ସମସ୍ତଙ୍କୁ ଚମକାଇ ଦେଇଛି । ଆକ୍ଟୋଲାଇଫ ନାମକ ଏକ କମ୍ପାନୀ ସେହିଭଳି ମହିଳା ପୁରୁଷଙ୍କୁ ସାହାଯ୍ୟ କରିବାକୁ ଚାହୁଁଛି ଯେଉଁମାନେ କୌଣସି କାରଣରୁ ମାତାପିତା ହୋଇ ପାରୁ ନାହାନ୍ତି । ବିଶ୍ୱର ପ୍ରଥମ କୃତ୍ରିମ ଗର୍ଭ ସୁବିଧା ସହ କାରଖାନାରେ ପ୍ରତିବର୍ଷ ୩୦ ହଜାର ଶିଶୁ ଜନ୍ମ ନେବେ ବୋଲି କମ୍ପାନୀ ପକ୍ଷରୁ ଦାବି କରାଯାଇଛିି ।
ଅକ୍ଟୋଲାଇଫର ବୈଜ୍ଞାନିକମାନେ ମଧ୍ୟ ଦାବି କରିଛନ୍ତି ଯେ ମାତାପିତା ଚାହିଁଲେ ଶିଶୁର ଜିନ୍ ମଧ୍ୟ ପରିବର୍ତ୍ତନ କରିପାରିବେ । ଶିଶୁର ଯେ କୌଣସି ଚରିତ୍ର ଯେପରିକି, କେଶର ରଙ୍ଗ, ଉଚ୍ଚତା, ବୁଦ୍ଧି ଓ ଚର୍ମ ରଙ୍ଗ ୩୦୦ରୁ ଅଧିକ ଜିନ୍ ମାଧ୍ୟମରେ ଜେନେଟିକ ପରିବର୍ତ୍ତନ କରାଯାଇପାରେ । ଏହି ପ୍ରକ୍ରିୟା ଆରମ୍ଭ କରିଥିବା ଏକ୍ଟୋଲାଇଫର ବୈଜ୍ଞାନିକ ହାସିମ ଅଲ ଗାୟଲୀ ଫେସବୁକରେ ଏକ ଭିଡିଓ ପୋଷ୍ଟ କରିଛନ୍ତି । ଏଥିରେ ଶିଶୁର ବିକାଶ ଦେଖାଯାଇଛି ।
ଆକ୍ଟୋଲାଇଫ ନିକଟରେ ଉଚ୍ଚ ମାନର ଯନ୍ତ୍ରପାତି ସହ ୭୫ଟି ଲାବୋରୋଟେରୀ ରହିଛି । ପ୍ରତି ଲାବୋରୋଟୋରୀରେ ୪୦୦ ପଣ୍ଡ ରହିଛି ଯେଉଁଠାରେ ଶିଶୁ ଗର୍ଭାଶୟ ଭଳି ବିକଶିତ ହେବ । ପ୍ରତିଟି ପ୍ରଣ୍ଡ ମାତୃଗର୍ଭ ସହ ସମାନ ଭାବେ ଡିଜାଇନ କରାଯାଇଛି । ଏହା ମାଧ୍ୟମରେ ପ୍ରତିବର୍ଷ ୩୦,୦୦୦ ଶିଶୁ ସୁରକ୍ଷିତ ଭାବେ ପ୍ରସବ ହେବାର ସୁବିଧା ଥିବା କମ୍ପାନୀ ଦାବି କରିଛି । ମା’ ଗର୍ଭ ଭଳି ଶିଶୁମାନେ ଏଠାରେ ସୁରକ୍ଷିତ ବିକଶିତ ହୋଇପାରିବେ । ପ୍ରତି ଗ୍ରୋଥ ପଣ୍ଡରେ ସେନସର ଲାଗିଛି ଯାହା ଶିଶୁର ହୃଦସ୍ପନ୍ଦନ, ରକ୍ତଚାପ, ନିଶ୍ୱାସ ପ୍ରଶ୍ୱାସ ଓ ଅମ୍ଳଜାନ ପରି ଶିଶୁର ଗୁରୁତ୍ୱପୂର୍ଣ୍ଣ ପ୍ରକ୍ରିୟା ଉପରେ ନଜର ରଖିବ । ପ୍ରତି ପଣ୍ଡକୁ ଏକ ସ୍କ୍ରିନ ସହ ଯୋଡା ଯାଇଛି ଯେଉଁଠାରେ ମାତାପିତା ତାଙ୍କ ସନ୍ତାନର ବିକାଶକୁ ଦେଖିପାରିବେ ।
ମିଡିଆ ରିପୋର୍ଟ ଅନୁଯାୟୀ, ବାସ୍ତବରେ ଏହା ଏବେ ଉପଲବ୍ଧ ନାହିଁ । ହେଲେ ଭିଡିଓରେ ଦାବି କରାଯାଇଛି ଯେଉଁସବୁ ଦେଶରେ ଜନସଂଖ୍ୟା କମ ହେବାରେ ଲାଗିଛି ସେଠାରେ ଏହା ସାହାଯ୍ୟ କରିବ । ୦୮.୩୯ ମିନିଟର ଏହି ଆନିମେଶନ ଭିଡିଓରେ ଦାବି କରାଯାଇଛି ଯେ ଏହା ସମ୍ପୂର୍ଣ୍ଣ ଭାବେ ଅକ୍ଷୟ ଶକ୍ତିରେ ସଂଚାଳିତ । ଡବ୍ଲୁଏଚଓର ଏକ ରିପୋର୍ଟ ଅନୁଯାୟୀ, ଗର୍ଭାବସ୍ଥାରେ ସ୍ୱାସ୍ଥ୍ୟଗତ ସମସ୍ୟା ଯୋଗୁ ବିଶ୍ୱରେ ପ୍ରତିବର୍ଷ ପ୍ରାୟ ୩ ଲକ୍ଷ ମହିଳାଙ୍କ ମୃତ୍ୟୁ ହେଉଛି ।
