ତିହିଡ଼ି,୮ା୬(କାଳନ୍ଦି ବେହେରା): ଭଦ୍ରକ ଜିଲା ଧାମନଗର ବ୍ଲକ ଅନ୍ତର୍ଗତ ଖପରପଦା ପଞ୍ଚାୟତରେ ଅବସ୍ଥିତ ଐତିହାସିକ ମଡାଗଡ଼ିଆ ଲୁଣିଆ ମେଳଣ ଆଜି ଅବହେଳାର ଶିକାର ହୋଇ ପଡ଼ିଛି । ପ୍ରାୟ ୩୦୦ ବର୍ଷର ଏହି ଦାଣ୍ଡ ମେଳଣ ଅଞ୍ଚଳର ପୁରାତନ କଳା, ସଂସ୍କୃତି ଓ ପରମ୍ପରା ସହ ଜଡିତ ରହିଛି । ଧାମନଗର ଅଞ୍ଚଳର ପ୍ରସିଦ୍ଧ ଲୁଣିଆ ମେଳଣ ଭାବେ ଏହାର ସ୍ୱତନ୍ତ୍ର ପରିଚୟ ରହିଥିବାବେଳେ, ବର୍ତ୍ତମାନ ଏହାର ଉନ୍ନତି ଓ ସଂରକ୍ଷଣ ନେଇ ଚିନ୍ତା ବଢ଼ିଛି।
ମେଳଣର ଭିତ୍ତିଭୂମି ସଠିକ ବିକାଶ ହୋଇପାରୁ ନାହିଁ । ପ୍ରବେଶ ପଥରେ ନିର୍ମାଣ ହୋଇଥିବା ଗେଟ୍ ଦୀର୍ଘଦିନ ଧରି ଅଧପନ୍ତରିଆ ଅବସ୍ଥାରେ ପଡ଼ି ରହିଛି । ଏହା ସହ ମେଳଣ ପୋଖରୀର ଚାରିପାଖରେ ମାଟି ଧସିବାରୁ ପରିବେଶ ଓ ସୌନ୍ଦର୍ଯ୍ୟ ନଷ୍ଟ ହେବାକୁ ବସିଛି । ସ୍ଥାନୀୟ ଲୋକଙ୍କ କହିବା ଅନୁସାରେ, ସରକାରଙ୍କ ପକ୍ଷରୁ ପୂର୍ବରୁ କିମ୍ବା ବର୍ତ୍ତମାନ ଯେଉଁ ଅନୁଦାନ ମିଳୁଛି, ତାହା ଏହି ଐତିହ୍ୟସମ୍ପନ୍ନ ସ୍ଥାନର ସାମଗ୍ରିକ ବିକାଶ ପାଇଁ ପର୍ଯ୍ୟାପ୍ତ ନୁହେଁ।
ଧାମନଗର ବ୍ଲକର ଏକ ପ୍ରମୁଖ ମେଳଣ ହୋଇଥିବାବେଳେ ଏହି ମେଳଣ ଦୀର୍ଘ ବର୍ଷ ଧରି ଅଞ୍ଚଳର ସାଂସ୍କୃତିକ ପରିଚୟକୁ ବହନ କରିଆସୁଛି। ତେଣୁ ମଡାଗଡ଼ିଆ ଲୁଣିଆ ମେଳଣର ସଂରକ୍ଷଣ, ସୌନ୍ଦର୍ଯ୍ୟକରଣ ଓ ପର୍ଯ୍ୟଟନସ୍ଥଳୀ ଭାବେ ବିକାଶ ପାଇଁ ସଂସ୍କୃତି ବିଭାଗ ସ୍ୱତନ୍ତ୍ର ଦୃଷ୍ଟି ଦେବାକୁ ସବୁ ମହଲରୁ ଦାବି ହେଉଛି । ବିଶେଷକରି ଧାମନଗରର ବିଧାୟକ ବର୍ତ୍ତମାନ ରାଜ୍ୟର ସଂସ୍କୃତି ବିଭାଗ ମନ୍ତ୍ରୀ ଥିବାରୁ ଏହି ପୁରାତନ ଐତିହ୍ୟର ପୁନରୁଦ୍ଧାର ଦିଗରେ ଠୋସ ପଦକ୍ଷେପ ନିଆଯିବ ବୋଲି ସ୍ଥାନୀୟ ଲୋକେ ଆଶା ପ୍ରକାଶ କରିଛନ୍ତି।
ଏହି ସମ୍ପର୍କରେ ଖପରପଦା ପଞ୍ଚାୟତର ପିଏସ୍ ସଦସ୍ୟ ବିଜୟ ଦଳାଇ କହିଛନ୍ତି ଯେ, ମଡାଗଡ଼ିଆ ଲୁଣିଆ ମେଳଣ ଅଞ୍ଚଳର ଗୌରବ ଓ ସାଂସ୍କୃତିକ ପରିଚୟ। ସଂସ୍କୃତି ମନ୍ତ୍ରୀଙ୍କ ଶୁଭଦୃଷ୍ଟି ଏହି ମେଳଣ ଉପରେ ପଡ଼ୁ ଏବଂ ସରକାର ଯେଉଁ ଅନୁଦାନ ଦେବେ, ତାହାର ସଠିକ ବ୍ୟବହାର ପାଇଁ ଦଳମତ ନିର୍ବିଶେଷରେ ସମସ୍ତେ ସହଯୋଗ କରିବେ ବୋଲି ସେ କହିଛନ୍ତି।
ଲୁଣିଆ ମେଳଣ କମିଟିର ସମ୍ପାଦକ ପ୍ରତାପ ମହାନ୍ତି କହିଛନ୍ତି ଯେ, ପୂର୍ବ ସରକାର ସମୟରେ ଯେଉଁ ଅନୁଦାନ ଆସିଥିଲା ସେଥିରେ କିଛି ଉନ୍ନତି କାର୍ଯ୍ୟ ହୋଇଥିଲା। ବର୍ତ୍ତମାନ ଯେଉଁ ଅନୁଦାନ ମଞ୍ଜୁର ହୋଇଛି, ତାହାର କାର୍ଯ୍ୟ ଶୀଘ୍ର ଆରମ୍ଭ କରାଯାଉ । ସେହିପରି ସଂସ୍କୃତି ବିଭାଗ ଏହି ଐତିହାସିକ ମେଳଣର ବିକାଶ ଉପରେ ବିଶେଷ ଦୃଷ୍ଟି ଦେଲେ ଅଞ୍ଚଳର ସଂସ୍କୃତି ଓ ପରମ୍ପରା ଆଗାମୀ ପିଢ଼ି ପର୍ଯ୍ୟନ୍ତ ବଞ୍ଚି ରହିବ ବୋଲି ସେ ମତ ପ୍ରକାଶ କରିଛନ୍ତି।
ସେହିପରି ଲୁଣିଆ ମେଳଣ କମିଟିର ବରିଷ୍ଠ ସଦସ୍ୟ ଦେବାଶିଷ ପଣ୍ଡା କହିଛନ୍ତି ଯେ, ମଡାଗଡ଼ିଆ ଲୁଣିଆ ମେଳଣ କେବଳ ଏକ ମେଳଣ ନୁହେଁ, ବରଂ ଏହା ଅଞ୍ଚଳର ଏକ ଐତିହାସିକ ଓ ସାଂସ୍କୃତିକ ପିଠ। ଏହାର ଉନ୍ନତି ଓ ସଂରକ୍ଷଣ ପାଇଁ ସରକାରଙ୍କ ସହ ସମାଜର ସମସ୍ତ ବର୍ଗ ଆଗେଇ ଆସିବା ଆବଶ୍ୟକ ବୋଲି ସେ କହିଛନ୍ତି ।
