ନୂଆଦିଲ୍ଲୀ,୭।୨: ଉଚ୍ଚଶିକ୍ଷା ପାଇଁ ୨୦୧୭ରୁ ୨୦୨୨ ମଧ୍ୟରେ ୩୦ ଲକ୍ଷରୁ ଊର୍ଦ୍ଧ୍ୱ ଭାରତୀୟ ବିଦେଶ ଯାଇଛନ୍ତି। ଶିକ୍ଷା ମନ୍ତ୍ରଣାଳୟ ପକ୍ଷରୁ ସୋମବାର ଲୋକ ସଭାକୁ ଏହି ସୂଚନା ଦିଆଯାଇଛି। ଜେଡିୟୁ ଏମ୍ପି ରାଜୀବ ରଞ୍ଜନ ସିଂ ଓରଫ ଲଲନ ସିଂ ଏବଂ ଅନ୍ୟମାନଙ୍କ ଲିଖିତ ପ୍ରଶ୍ନର ଉତ୍ତରରେ କେନ୍ଦ୍ର ଶିକ୍ଷା ରାଷ୍ଟ୍ରମନ୍ତ୍ରୀ ସୁଭାଷ ସର୍କାର ଏହା କହିଥିଲେ। ଭାରତୀୟମାନଙ୍କ ଆଗମନ ଓ ପ୍ରସ୍ଥାନ ସମ୍ପର୍କିତ ତଥ୍ୟ ସ୍ବରାଷ୍ଟ୍ର ମନ୍ତ୍ରଣାଳୟର ବ୍ୟୁରୋ ଅଫ୍ ଇମିଗ୍ରେଶନ ପାଖରେ ରହିଛି। ତେବେ ଉଚ୍ଚଶିକ୍ଷା ଉଦ୍ଦେଶ୍ୟରେ ବିଦେଶ ଯାଉଥିବା ଭାରତୀୟଙ୍କ ବର୍ଗ ଚିହ୍ନଟ କରିବାର କୌଣସି ସୂଚକାଙ୍କ ନାହିଁ। କେବଳ ସେମାନେ ମୌଖିକ ଭାବେ ଦେଉଥିବା ସୂଚନା ଏବଂ ଗନ୍ତବ୍ୟ ସ୍ଥଳ ଭିଜାରୁ ସେମାନଙ୍କ ଗସ୍ତର ଉଦ୍ଦେଶ୍ୟ ଜଣାପଡ଼ିଥାଏ। ୨୦୨୨ରେ ୭.୫୦ ଲକ୍ଷ ଭାରତୀୟ ଉଚ୍ଚଶିକ୍ଷା ପାଇଁ ବିଦେଶ ଯାଉଥିବା କହିଥିଲେ। ଏହା ପୂର୍ବବର୍ଷ ଅର୍ଥାତ୍ ୨୦୨୧ରେ ୪.୪ ଲକ୍ଷ ବିଦେଶ ଯାଇଥିବାବେଳେ ୨୦୨୦ରେ ୨.୫୯ ଲକ୍ଷ, ୨୦୧୯ରେ ୫.୮୬ ଲକ୍ଷ, ୨୦୧୮ରେ ୫.୧୭ ଲକ୍ଷ ଏବଂ ୨୦୧୭ରେ ୪.୫୪ ଲକ୍ଷ ଭାରତୀୟ ଉଚ୍ଚଶିକ୍ଷା ଉଦ୍ଦେଶ୍ୟରେ ବିଦେଶ ଯାଇଥିଲେ ବୋଲି ଶିକ୍ଷା ରାଷ୍ଟ୍ରମନ୍ତ୍ରୀ କହିଛନ୍ତି। ବିଦେଶରେ ଭାରତୀୟ ଛାତ୍ରୀଛାତ୍ର ବ୍ୟୟ କରୁଥିବା ଅର୍ଥ ଦେଶର ଶିକ୍ଷା ବଜେଟଠାରୁ ଅଧିକ କି ବୋଲି ବିରୋଧୀ ସଦସ୍ୟମାନେ ପ୍ରଶ୍ନ କରିବା ସହ ଏହି ଅର୍ଥକୁ ରୋକିବା ଲାଗି ଦେଶରେ ଉଚ୍ଚ ମାନର ଅନ୍ତର୍ଜାତୀୟ ବିଶ୍ୱବିଦ୍ୟାଳୟ ସ୍ଥାପନ କରିବା ପ୍ରସ୍ତାବ ରହିଛି କି ବୋଲି ପଚାରିଥିଲେ। ତେବେ ଭାରତରେ ବିଦେଶୀ ଉଚ୍ଚ ଶିକ୍ଷାନୁଷ୍ଠାନଗୁଡ଼ିକର କ୍ୟାମ୍ପସ୍ ସ୍ଥାପନ ଲାଗି ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ୟୁଜିସି) ଚିଠା ନିୟମାବଳୀ ପ୍ରସ୍ତୁତ କରିଥିବା ମନ୍ତ୍ରୀ କହିଛନ୍ତି। ଏହା ଉପରେ ବିଭିନ୍ନ ଷ୍ଟେକ୍ହୋଲ୍ଡରଙ୍କଠାରୁ ଗତ ଜାନୁୟାରୀ ୧୮ ସୁଦ୍ଧା ମତାମତ ଓ ପ୍ରସ୍ତାବ ଆହ୍ବାନ କରାଯାଇଥିଲା। ଏହି ସମୟସୀମାକୁ ଫେବୃୟାରୀ ୨୦ ପର୍ଯ୍ୟନ୍ତ ବୃଦ୍ଧି କରାଯାଇଥିବା ମନ୍ତ୍ରୀ ସୂଚନା ଦେଇଛନ୍ତି।
