କୋରାପୁଟ,୨୭ା୧୨(ଅମିତାଭ ବେହେରା): କୋରାପୁଟ ଜିଲାର କୋଟିଆ ପଞ୍ଚାୟତରେ ଜିଲା ପ୍ରଶାସନର କୋରାପୁଟ ଆଇଟିଡିଏର ସହାୟତାରେ ପ୍ରଥମେ ପରୀକ୍ଷାମୂଳକ ଭାବେ ୫ ଏକର ଜମିରେ ବିଦେଶୀ ଫଳ ଷ୍ଟ୍ରବେରୀ ଚାଷ ଆରମ୍ଭ କରାଯାଇଥିଲା। ଏହାର ସଫଳତା ଅନୁକରଣ କରି ଜିଲାର ଦଶମନ୍ତପୁର ବ୍ଲକର କାଉଗୁଡ଼ା ଗ୍ରାମରେ ଏବେ ଷ୍ଟ୍ରବେରୀ ଚାଷ ଆରମ୍ଭ କରାଯାଇଛି, ଜିଲା ପ୍ରଶାସନର ଉଦ୍ୟାନ ବିଭାଗ ଓ ସିଓ୍ବାଇଏସ୍ଡିର ମିଳିତ ସହଯୋଗରେ କାଉଗୁଡ଼ା ଗ୍ରାମରେ ପ୍ରାୟ ୧୦ ହେକ୍ଟର ଜମିରେ ଷ୍ଟ୍ରବେରୀ ଚାଷ କରିବାକୁ ଗ୍ରାମବାସୀ ଏକ ପ୍ରକାର ଶପଥ ନେଇଛନ୍ତି। ଗ୍ରାମର ପ୍ରାୟ ୨୫ ଏକର ଜମିରେ ଲାଭଜନକ ବିଦେଶୀ ଫଳ ଷ୍ଟ୍ରବେରୀ ଫଳାଇବା ପାଇଁ ଦୃଢ଼ ସଂକଳ୍ପ କରି କଠୋର ପରିଶ୍ରମ ଜାରି ରଖିଛନ୍ତି ଗ୍ରାମର ୩୦ ଜଣ ଆଦିବାସୀ ଚାଷୀ।
କାଉଗୁଡ଼ା ଗ୍ରାମରେ ପ୍ରାୟ ଶତାଧିକ ଆଦିବାସୀ ପରିବାର ବାସ କରୁଥିବାବେଳେ। ସେମାନଙ୍କ ନିକଟରେ ଥିବା ଚାଷଜମି କେବଳ ବର୍ଷାଦିନେ ଗୋଟିଏ ଥର ଧାନ ଚାଷ କରୁଥିବା ବେଳେ ଅନ୍ୟ ଦିନରେ ଏହା ଶୁଖିଲା ପଡ଼ିରହୁଥିଲା। କୋରାପୁଟ କୃଷି ଶିଳ୍ପ ନିଗମର ସହାୟତାରେ ଗ୍ରାମରେ ଗତ ୨ ମାସ ପୂର୍ବେ ୨ଟି ସୋଲାର ପମ୍ପ୍ ସେଟ ଲଗାଯିବା ପରେ ଏବେ ଗ୍ରାମବାସୀ ତାଙ୍କ ଜମିରେ ଏହି ଷ୍ଟ୍ରବେରୀ ଚାଷ ପାଇଁ ଆଗଭର ହୋଇଛନ୍ତି। ସିଓ୍ବାଇଏସ୍ଡି ପକ୍ଷରୁ ଗ୍ରାମବାସୀଙ୍କୁ ଷ୍ଟ୍ରବେରୀ ଚାଷ ପାଇଁ ସଚେତନ କରିଥିଲେ। କିଛି ଦିନ ଧରି ବୈଠକ ମାଧ୍ୟମରେ ସଚେତନ କରାଇବା ପରେ ପ୍ରଥମେ ଗ୍ରାମର ଧନୁର୍ଜୟ ଗାଦବା ଓ ମାଳତି ଗାଦବା ଆଗକୁ ଆସି ଷ୍ଟ୍ରବ୍ରେରୀ ଚାଷ ପାଇଁ ପଣ କରିବା ସହିତ ଅନ୍ୟ ୨୮ ଜଣ ଗ୍ରାମବାସୀଙ୍କୁ ପ୍ରଭାବିତ କରି ପାରିଥିଲେ। ଏଥିପାଇଁ କୋରାପୁଟ ଉଦ୍ୟାନ ବିଭାଗ ପକ୍ଷରୁ ପ୍ରତି ହେକ୍ଟର ପିଛା ୧୨.୫ ଲକ୍ଷ ଟଙ୍କା ଯୋଗାଇଥିଲେ। ପୁନେରୁ ଷ୍ଟ୍ରବେରୀ ଚାରା ଅନ୍ୟ ଆର୍ଥିକ ସହାୟତା ପ୍ରଦାନ କରିଥିବା ଜିଲା ଉଦ୍ୟାନ ବିଭାଗ ଉପନିର୍ଦ୍ଦେଶକ ସୁଦାମ ବିଶ୍ୱାଳ ପ୍ରକାଶ କରିଛନ୍ତି।
ସେହିପରି ସିଓ୍ବାଇଏସ୍ଡି ପକ୍ଷରୁ ଚାଷୀଙ୍କୁ ସମସ୍ତ ଯାନ୍ତ୍ରିକ ସହାୟତା ପ୍ରଦାନ ସହ ସେମାନଙ୍କୁ ଗଛ ଲଗାଇବା ନେଇ ତାଲିମ ପ୍ରଦାନ କରାଯାଉଥିବା ସିଓ୍ବାଇଏସ୍ଡି୍ର ଦଶମନ୍ତପୁର ବ୍ଲକ ସଂଯୋଜକ ଆନନ୍ଦ ମଲ୍ଲିକ ପ୍ରକାଶ କରିଛନ୍ତି। ଗତ ୧୫ ଦିନ ତଳେ ଜମି ପ୍ରସ୍ତୁତ କରି ସେଥିରେ ଷ୍ଟ୍ରବେରୀ ଚାରା ଲଗାଇବା ଆରମ୍ଭ କରିଛନ୍ତି। ବର୍ତ୍ତମାନ ସୁଦ୍ଧା ଗ୍ରାମର ୩୦ ଜଣ ଚାଷୀ ପ୍ରାୟ ୨୦ ଏକର ଜମିରେ ଚାରା ଲଗାଇ ସାରିଲେଣ। ଆସନ୍ତା ସପ୍ତାହକ ମଧ୍ୟରେ ଚାରା ରୋପଣ କାର୍ଯ୍ୟ ଶେଷ ହେବା ପରେ ଗଛରେ ଜୈବିକ ସାର ସିଞ୍ଚନ ସମେତ ଜମି ଚତୁଃପାର୍ଶ୍ୱରେ ଅସ୍ଥାୟୀ ବାଡ଼ କରାଯିବ ବୋଲି ଗ୍ରାମର ଚାଷୀ ହରି ଗଦବା, ରମେଶ ଗଦବା ଆଦି ଅନ୍ୟ ଚାଷୀମାନେ ପ୍ରକାଶ କରିଛନ୍ତି। ଷ୍ଟ୍ରବେରୀ ଅମଳ ପରେ ସିଓ୍ବାଇଏସ୍ଡିର ଏପିସି ଓ ଡଙ୍ଗର ରାଣୀ ପ୍ରଡ୍ୟୁସର ଏଫ୍ପିଓ ମାଧ୍ୟମରେ ଏହା ବିକ୍ରୟ କରାଯିବ ବୋଲି ନିଷ୍ପତ୍ତି ହୋଇଥିବା ବ୍ଲକ ସଂଯୋଜକ ଆନନ୍ଦ ମଲ୍ଲିକ ସୂଚନା ଦେଇଛନ୍ତି। ଏହା ଆସନ୍ତା ୩ ମାସ ପରେ ଅମଳ ହେବ କେଜି ପ୍ରତି ପ୍ରାୟ ୪ ଶହରୁ ୫ଶହ ଟଙ୍କାରେ ବିକ୍ରି କରାଯିବ, ଚଷୀଙ୍କୁ କେଜିପ୍ରତି ୨ଶହ ରୁ ୩ ଶହ ଟଙ୍କା ପର୍ଯ୍ୟନ୍ତ ଲାଭ ପାଇବେ ବୋଲି ସିଓ୍ବାଇଏସ୍ଡି ପକ୍ଷରୁ କୁହାଯାଇଛି।
