ମସ୍କୋ,୧୨।୩: ରୁଷିଆ-ୟୁକ୍ରେନ ଯୁଦ୍ଧରେ ଏକ ବଡ଼ ଘଟଣା ଘଟିଛି। ମଙ୍ଗଳବାର ସାଉଦି ଆରବରେ ୟୁକ୍ରେନୀୟ ଏବଂ ଆମେରିକୀୟ ଅଧିକାରୀମାନେ ଶାନ୍ତି ଆଲୋଚନା କରିଥିଲେ। ଏହି ବୈଠକରେ ଆମେରିକା ଦ୍ୱାରା ପ୍ରସ୍ତାବିତ ୩୦ ଦିନିଆ ଅସ୍ତ୍ରବିରତିକୁ ଗ୍ରହଣ କରାଯାଇଛି। ୟୁକ୍ରେନୀୟ ରାଷ୍ଟ୍ରପତି ଜେଲେନ୍ସ୍କି କହିଛନ୍ତି, ଏହି ଅସ୍ତ୍ରବିରତି କେବଳ ଆକାଶ କିମ୍ବା ସମୁଦ୍ରରେ ନୁହେଁ ବରଂ ସମଗ୍ର ମୋର୍ଚ୍ଚାରେ ପ୍ରଯୁଜ୍ୟ ହେବ। ସେ କହିଛନ୍ତି, ୟୁକ୍ରେନ ଏହି ପ୍ରସ୍ତାବକୁ ଗ୍ରହଣ କରୁଛି, ଆମେ ଏହାକୁ ସକାରାତ୍ମକ ବୋଲି ବିଚାର କରୁଛୁ ଏବଂ ଏଥିପାଇଁ ପ୍ରସ୍ତୁତ। ଏବେ ଆମେରିକାକୁ ଏହି ଚୁକ୍ତିନାମାରେ ରୁଷିଆକୁ ରାଜି କରାଇବାକୁ ପଡିବ। ଏହି ଯୁଦ୍ଧବିରତି କେବଳ ସେତେବେଳେ ସମ୍ଭବ ଯଦି ରୁଷିଆ ଏଥିରେ ରାଜି ହୁଏ।
ବୈଠକ ପରେ, ଆମେରିକା ଏବଂ ୟୁକ୍ରେନ ଏକ ମିଳିତ ବିବୃତ୍ତି ଜାରି କରି କହିଛନ୍ତି ଯେ ଆମେରିକା ତୁରନ୍ତ ଗୁପ୍ତଚର ସୂଚନା ଆଦାନପ୍ରଦାନ ଉପରେ ପ୍ରତିବନ୍ଧକ ଉଠାଇବ ଏବଂ ୟୁକ୍ରେନକୁ ସୁରକ୍ଷା ସହାୟତା ପୁନଃ ଆରମ୍ଭ କରିବ। ବୈଠକ ପରେ ତୁରନ୍ତ ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ କହିଥିଲେ ଯେ ଏବେ ଯୁଦ୍ଧ ସମାପ୍ତ କରିବା ରୁଷିଆର ଦାୟିତ୍ୱ। ଆମେ ଆଶା କରୁଛୁ ସେମାନେ ଏହାକୁ ଗ୍ରହଣ କରିବେ। ଏବେ ଏହି ନିଷ୍ପତ୍ତି ତାଙ୍କ ହାତରେ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ନିଷ୍ପତ୍ତିକୁ ସ୍ବାଗତ କରିଛନ୍ତି ଏବଂ ଘୋଷଣା କରିଛନ୍ତି ଯେ ସେ ଏହି ସପ୍ତାହରେ ରୁଷିଆ ରାଷ୍ଟ୍ରପତି ପୁଟିନ୍ଙ୍କ ସହ ଯୋଜନା ବିଷୟରେ ଆଲୋଚନା କରିବେ। ଏହି ଘଟଣା ୟୁକ୍ରେନ ପାଇଁ ବହୁତ ଭଲ ଖବର।
