ନୟାଗଡ଼,୮।୩(ଲୋକନାଥ ମିଶ୍ର): ଉଠାଜଳସେଚନ ବିଭାଜନର ନିର୍ବାହୀଯନ୍ତ୍ରୀଙ୍କ ମନମାନି ଓ ଅସହଯୋଗ କାରଣରୁ ଜିଲାରେ ୧୨୦ ଗଭୀର ନଳକୂପ ପ୍ରକଳ୍ପ କାର୍ଯ୍ୟକ୍ଷମ ହୋଇ ନ ପାରି ଅନିଶ୍ଚିତତା ଘେରରେ ରହିଛି। ଚାଷୀଙ୍କ ବାରମ୍ବାର ପ୍ରତିବାଦ, ୩ ବର୍ଷ ହେଲା ଆନ୍ଦୋଳନ ପରେ ବି ସୁଫଳ ମିଳୁନି। ଏଭଳିସ୍ଥଳେ ଚାଷୀ ଉଠାଜଳସେଚନ ବିଭାଜନର ମୁଖ୍ୟଫାଟକରେ ତାଲା ମାରି ଗୁରୁବାର ଆନ୍ଦୋଳନ କରିଥିଲେ। ୧୨୦ ଅଗଭୀର ନଳକୂପକୁ ନିଜ ଚାଷ ଜମିରେ ଖନନ ପାଇଁ ୨୦୧୭ରେ ୧୨୦ ଚାଷୀ ୨୦ ହଜାର ଟଙ୍କା ଲେଖାଏଁ ଡିପୋଜିଟ୍ କରିଥିଲେ। ଆବେଦନର ୩ ବର୍ଷ ପରେ ୨୦୨୦ରେ ଗଭୀର ନଳକୂପ ଖନନ ହୋଇଥିଲା। ୨୦୨୧ରେ ବିଦ୍ୟୁତ୍ ଖୁଣ୍ଟ ପଡିଥିଲା। ତେବେ ବିଦ୍ୟୁତ୍ ତାର ଟଣା ଯାଇ ପାରିଲା ନାହିଁ କି ବିଦ୍ୟୁତ୍ ସଂଯୋଗ ଦିଆଯାଇ ପାରିଲ ନାହିଁ। ଏଣୁ ଚାଷୀ ଜମିରେ ଫସଲ କରିବା ପାଇଁ ଯେଉଁ ସ୍ବପ୍ନ ଦେଖିଥିଲା ତାହା ସ୍ବପ୍ନରେ ରହି ଯାଇଛି। ଏନେଇ ଚାଷୀ ସଂଯୁକ୍ତା ଭଟ, ଦିଲୀପ ପାତ୍ର, ମାୟା ସାହୁ, ବୀର ପ୍ରଧାନ କୁହନ୍ତି, ଓଡ଼ଗାଁ ବ୍ଲକ ଅଞ୍ଚଳରେ ହନୁମନ୍ତିଆ ୧୧, ଗିରିଡିପଲ୍ଲୀ ୪, ପଥରପଲ୍ଲୀ ୩, ଧାନଝରି ୩, ଭାଡିକିଳା ୧୨, ଲିଙ୍ଗରାଜପ୍ରସାଦରେ ୭, କେନ୍ଦୁପଲ୍ଲୀ ୬, ରଘୁନାଥପୁର ୪, କୁରାଳରେ ୫ ଏପରି ମୋଟରେ ୫୫ ଗଭୀର ନଳକୂପ ଖନନ ହୋଇଛି। ଗଭୀର ନଳକୂପ ଖନନ ପରେ ୨୦୨୧ରେ କେବଳ ବିଦ୍ୟୁତ୍ ଖୁଣ୍ଟ ପୋତି ଠିକାଦାର ଆଉ କାର୍ଯ୍ୟ କରି ନାହାନ୍ତି। ଏହା ପରେ ପ୍ରକଳ୍ପ କାମ ଆଉ ହେଉନି। ଇତିମଧ୍ୟରେ ୧୦ରୁ ୧୬ ଥର ଉଠାଜଳସେଚନ ବିଭାଜନର ନିର୍ବାହୀଯନ୍ତ୍ରୀଙ୍କୁ ପ୍ରକଳ୍ପ କାର୍ଯ୍ୟ ଶେଷ କରିବାକୁ ବାରମ୍ବାର ଭେଟିଛୁ। ଗତ ଫେବୃଆରୀ ୬ରେ ପୁଣି ଭେଟିବାକୁ ଅପେକ୍ଷା କରିଥିଲୁ। ଉଠାଜଳସେଚନ ବିଭାଜନର ନିର୍ବାହୀଯନ୍ତ୍ରୀ ଅନୁପସ୍ଥିତ ଥିବାରୁ ବିକ୍ଷୋଭ କଲୁ। କିଛି ସୁଫଳ ନ ପାଇ ଫେରିଲୁ। କିଛି ଦିନ ପରେ ପୁଣି ଗୁରୁବାର ତାଲା ପକାଇ ଆନ୍ଦୋଳନ କରିଥିଲେ।
ଡିଭିଜିନରେ ଟେଣ୍ଡର ପରେ ବି ମିଳିଲାନି ସୁଫଳ
ଗଭୀର ନଳକୂପର ଟେଣ୍ଡର ରାଜ୍ୟସ୍ତରରେ ହେଉଥିଲା। ଉଠାଜଳସେଚନ ବିଭାଗର ଚେୟାରମ୍ୟାନଙ୍କ ହସ୍ତକ୍ଷେପ ପରେ ଟେଣ୍ଡର ପ୍ରକ୍ରୀୟା ନୟାଗଡ ଡିଭିଜନ ସ୍ତରକୁ ଆସିଥିଲା। ବିଦ୍ୟୁତ୍ ସମ୍ବଦ୍ଧିୟ ଟେଣ୍ଡର ଡିଭିଜନସ୍ତରରେ ହୋଇଥିଲା। ଇତି ମଧ୍ୟରେ ଟେଣ୍ଡର ୪ଥର ହୋଇ ସାରିଲାଣି। ଟେଣ୍ଡର ବାରମ୍ବାର ହେଉଥିଲେ ମଧ୍ୟ କିଛି ସୁଫଳ ମିଳୁନି। ଉଠାଜଳସେଚନ ବିଭାଜନର ନିର୍ବାହୀଯନ୍ତ୍ରୀ ଦୁଃଶାସନ ଜେନା କୁହନ୍ତି, ଜିଲାର ଗଭୀର ନଳକୂପର ଟେଣ୍ଡର ରାଜ୍ୟସ୍ତରରେ ୪ଥର ହୋଇ ସାରିଲାଣି। ହେଲେ ସଫଳତା ମିଳୁନି। ବିଦ୍ୟୁତ୍ ସଂଯୋଗ ପରେ ଚାଷୀ ଜମିରେ ଜଳସେଚନ କରିପାରିବେ। ରାଜ୍ୟରୁ ଡିଭିଜନସ୍ତରକୁ ଟେଣ୍ଡର ପ୍ରକ୍ରିୟା ଆସିବା ପରେ ବି ସଫଳତା ମିଳିଲା ନାହିଁ। ଗୁରୁବାର ଚାଷୀଙ୍କ ଆନ୍ଦୋଳନ ହେବା ପରେ ଆଲୋଚନା ହେଲା ଚାଷୀମାନେ ଭୁବନେଶ୍ୱର ଯାଇ ଉଚ୍ଚପଦସ୍ଥ ଅଧିକାରୀଙ୍କ ସହ ଆଲୋଚନା କରିବେ। ଉଠାଜଳସେଚନ ବିଭାଗ ପକ୍ଷରୁ ସହଯୋଗ କରାଯିବ। କିପରି ଚାଷୀଙ୍କ ଜମିରେ ଶୀଘ୍ର ଜଳସେଚିନର ସୁବିଧା ମିଳିବ ସେନେଇ ଆମେ ସହଯୋଗ କରିବୁ ବୋଲି ଆନ୍ଦୋଳନକାରୀଙ୍କୁ ପ୍ରତିଶ୍ରୁତି ଦେଇଛୁ ବୋଲିି କହିଛନ୍ତି।
