ଦିସ୍ପୁର: ପୁଅ ହେଉ ଅବା ଝିଅ ଘରେ ସନ୍ତାନ ଜନ୍ମ ହେଲେ ପରିବାରରେ ଆନନ୍ଦର ଲହରି ଖେଳିଯାଏ। କିନ୍ତୁ ଏହି ଆନନ୍ଦକୁ ଅନୁଭବ କରିବା ପାଇଁ ନାଜମା ଖାନମଏବଂ ତାଙ୍କ ପରିବାରକୁ ୩ ବର୍ଷ ଅପେକ୍ଷା କରିବାକୁ ପଡ଼ିଛି। ଆସାମ ବରାପେଟା ସରକାରୀ ଡାକ୍ତରଖାନାରେ ୨୦୧୯ ମେ’୩ ତାରିଖରେ ସମାନ ନାମ୍ନୀ ନଜମା ଖାନମ ଏବଂ ନଜମା ଖାତୁନ ଦୁଇଟି ପୁତ୍ର ସନ୍ତାନ ଜନ୍ମ ଦେଇଥିଲେ। ପ୍ରସବ ପରେ ଖାନମଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିଯିବା କାରଣରୁ ତାଙ୍କୁ ଆଇସିୟୁରେ ଭର୍ତ୍ତି କରାଯାଇଥିବାବେଳେ ନବଜାତକୁ ନ୍ୟୁବର୍ନ କେୟାରରେ ରଖାଯାଇଥିଲା। କିଛି ସମୟ ପରେ ଯେତେବେଳେ ଖାନମଙ୍କ ଚେତା ଫେରିଥିଲା ସେତେବେଳେ ଡାକ୍ତରଖାନା କର୍ତ୍ତୃପକ୍ଷ ମୃତ ଶିଶୁକୁ ତାଙ୍କୁ ଦେଇଥିଲେ। ତେବେ ଖାନମ କି ତାଙ୍କ ପରିବାର ଏହାକୁ ସହଜରେ ବିଶ୍ୱାସ କରିପାରି ନ ଥିଲେ। ଡାକ୍ତରଖାନାରେ ଅଭିଯୋଗ କରିଥିଲେ ମଧ୍ୟ ସେମାନେ ଏହାକୁ ଖଣ୍ଡନ କରିଥିଲେ। ପରବର୍ତ୍ତୀ ସମୟରେ ଖାନମଙ୍କ ପରିବାର ସେହି ଗୋଟିଏ ଦିନରେ ପ୍ରସବ କରିଥିବା ମହିଳାଙ୍କ ସୂଚୀ ଦେଖିଥିଲେ। ଯେଉଁଥିରେ ସେମାନଙ୍କୁ ନଜମା ଖାନମ ଏବଂ ନଜମା ଖାତୁନଙ୍କ ନାମ ପାଇଥିଲେ। ଏହାପରେ ଖାନମଙ୍କ ପରିବାର ଲୋକେ କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ମାମଲା ପ୍ରାୟ ୩ ବର୍ଷ ଧରି ବିଚାରାଧୀନ ହୋଇ ରହିବା ପରେ ଡିଏନ୍ଏ ଟେଷ୍ଟ ପାଇଁ କୋର୍ଟ ନିର୍ଦ୍ଦେଶ ଦେଲେ। ଟେଷ୍ଟ ରିପୋର୍ଟରୁ ଶିଶୁ ଜଣଙ୍କ ନାଜମା ଖାନମଙ୍କର ବୋଲି ପ୍ରମାଣିତ ହେଲା।
