ନୂଆଦିଲ୍ଲୀ: ରିଜର୍ଭ ବ୍ୟାଙ୍କର ମୁଦ୍ରାନୀତି କମିଟି(ଏମ୍ପିସି)ରେ ୩ ମନୋନୀତ ସଦସ୍ୟଙ୍କୁ ସରକାର ମଙ୍ଗଳବାର ନିଯୁକ୍ତ କରିଛନ୍ତି। ସେପ୍ଟେମ୍ବରରେ ପୂର୍ବରୁ କାର୍ଯ୍ୟ କରୁଥିବା ୩ ସଦସ୍ୟଙ୍କ କାର୍ଯ୍ୟକାଳ ଶେଷ ହେବା ପରେ ପଦବୀଗୁଡିକ ଖାଲି ପଡିଥିଲା। ଧାର୍ଯ୍ୟ ସମୟ ମଧ୍ୟରେ ସରକାର ଏହି ସ୍ଥାନ ପୂରଣ କରିବାକୁ ସକ୍ଷମ ନ ହେବାରୁ ମୁଦ୍ରାନୀତି କମିଟି ବୈଠକ ହୋଇପାରି ନ ଥିଲା। ନିଯୁକ୍ତି ଲାଭ କରିଥିବା ୩ ସଦସ୍ୟଙ୍କ ମଧ୍ୟରେ ଇନ୍ଦିରା ଗାନ୍ଧୀ ଇନ୍ଷ୍ଟିଚ୍ୟୁଟ ଅଫ୍ ଡେଭଲପମେଣ୍ଟ ରିସର୍ଚ୍ଚର ପ୍ରଫେସର ଅସୀମା ଗୋୟଲ, ଇଣ୍ଡିଆନ ଇନ୍ଷ୍ଟିଚ୍ୟୁଟ ଅଫ୍ ମ୍ୟାନେଜମେଣ୍ଟ, ଅହମ୍ମଦାବଦାର ପ୍ରଫେସର ଜୟନ୍ତ ଆର୍ ବର୍ମା ଏବଂ ନ୍ୟାଶନାଲ କାଉନ୍ସିଲ ଅଫ୍ ଆପ୍ଲାଏଡ ଇକୋନୋମିକ୍ସ ରିସର୍ଚ୍ଚର ବରିଷ୍ଠ ପରାମର୍ଶଦାତା ଶଶାଙ୍କ ଭିଡେ ରହିଛନ୍ତି। ବର୍ତ୍ତମାନ ମୁଦ୍ରାନୀତି କମିଟିରେ ଗଭର୍ନର ଶକ୍ତିକାନ୍ତ ଦାସ, ଡେପୁଟି ଗଭର୍ନର ମାଇକେଲ ପାତ୍ର, କାର୍ଯ୍ୟନିର୍ବାହୀ ନିର୍ଦ୍ଦେଶକ ମ୍ରିଦୁଲ ସାଗର କାର୍ଯ୍ୟ କରୁଥିବା ବେଳେ ନୂତନ ଭାବେ ନିଯୁକ୍ତ ୩ ସଦସ୍ୟ ସରକାରଙ୍କ ନୋମିନି ଭାବେ କାର୍ଯ୍ୟ କରିବେ। ପୂର୍ବରୁ ସରକାରଙ୍କ ମନୋନୀତ ୩ ସଦସ୍ୟ ରବୀନ୍ଦ୍ର ଢୋଲାକିଆ, ପମି ଦୁଆ ଏବଂ ଚେତନ ଘାଟେଙ୍କ କାର୍ଯ୍ୟକାଳ ସେପ୍ଟେମ୍ବରେ ଶେଷରେ ସମ୍ପୂର୍ଣ୍ଣ ହୋଇଛି।
ଅସୀମା ଗୋୟଲ ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା ପରିଷଦର ସଦସ୍ୟ ଅଛନ୍ତି। ନୂଆ ନିଯୁକ୍ତି ପରେ ସେ ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା ପରିଷଦରୁ ଇସ୍ତଫା ଦେଇଛନ୍ତି। ପୂର୍ବରୁ ସେ ଆର୍ବିଆଇର ମୁଦ୍ରାନୀତି ପରାମର୍ଶଦାତା କମିଟିର ସଦସ୍ୟ ଭାବେ କାର୍ଯ୍ୟ କରିଆସିଛନ୍ତି। ବର୍ତ୍ତମାନ ସେ ଏଡେଲଓ୍ବିସ ଫାଇନାନ୍ସିଆଲ ସର୍ଭିସ, ଆଇଡିବିଆଇ ବ୍ୟାଙ୍କ ଏବଂ ଏସ୍ବିଆଇ ଜେନେରାଲ ଇନ୍ସ୍ୟୁରାନ୍ସରେ ସ୍ବାଧୀନ ନିର୍ଦ୍ଦେଶକ ଭାବେ ମଧ୍ୟ କାର୍ଯ୍ୟରତ ଅଛନ୍ତି। ସେହିଭଳି ବର୍ମା ଜଣେ ଫାଇନାନ୍ସିଆଲ ମାର୍କେଟର ଜଣେ ବିଶେଷଜ୍ଞ। ଆର୍ଥତ୍କ କ୍ଷେତ୍ର ସଂସ୍କାର, ବ୍ୟାଙ୍କଗୁଡିକର କାର୍ଯ୍ୟଧାରା, ବିଦେଶୀ ମୁଦ୍ରା ପରିଚାଳନା ଏବଂ ସମସ୍ୟା ଭଳି କ୍ଷେତ୍ର ଗବେଷଣା କ୍ଷେତ୍ରରେ ତାଙ୍କର ବିଶେଷ ଯୋଗଦାନ ରହିଛି। ଏହାବାଦ କୃଷି ଏବଂ ମୁଦ୍ରାସ୍ଫୀତି କ୍ଷେତ୍ରରେ ସେ ଜଣେ ବିଶେଷଜ୍ଞ ଭାବେ ବେଶ୍ ଜଣାଶୁଣା। ଆର୍ବିଆଇ ଆଇନ ଅନୁସାରେ ଅର୍ଥନୀତି, ବ୍ୟାଙ୍କିଙ୍ଗ୍, ଫାଇନାନ୍ସ ଏବଂ ମୁଦ୍ରାନୀତି କ୍ଷେତ୍ରରେ ବିଶେଷ ଯୋଗଦାନ ରଖିଥିବା ବ୍ୟକ୍ତିବିଶେଷଙ୍କୁ ଏମ୍ପିସି ସଦସ୍ୟ ଭାବେ ନିଯୁକ୍ତ କରାଯାଇ ପାରିବ।
