ଭୁବନେଶ୍ୱର, ୨୪।୧୨(ବ୍ୟୁରୋ): ଲୋକସେବା ଭବନରେ ଶୁକ୍ରବାର ବାଣୀବିହାର ରେଲ୍ଓ୍ବେ ଓଭର ବ୍ରିଜ୍ (ଆରଓବି) ଏବଂ ଭୁବନେଶ୍ୱର ରେଳଷ୍ଟେଶନ କାର୍ଯ୍ୟ ସମୀକ୍ଷା କରାଯାଇଛି। ହକି ବିଶ୍ୱକପ୍ ପରେ ଅର୍ଥାତ ଆସନ୍ତା ଫେବୃୟାରୀରୁ ପ୍ରସ୍ତାବିତ ୩ ଲେନ ବିଶିଷ୍ଟ ବାଣୀବିହାର ଆରଓବି କାର୍ଯ୍ୟ ଆରମ୍ଭ କରିବାକୁ ରେଳ ବିକାଶ ନିଗମ ଲିମିଟେଡର ଅଧିକାରୀଙ୍କୁ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ନିର୍ଦ୍ଦେଶ ଦେଇଛନ୍ତି। ହକି ବିଶ୍ୱକପ୍ ସମୟରେ ଟ୍ରାଫିକ୍ ଭିଡ଼କୁ ନଜରରେ ଏହି ନିଷ୍ପତ୍ତି ନିଆଯାଇଛି।
ମୋଟ ୫୮୧ କୋଟି ଟଙ୍କା ବ୍ୟୟରେ ଖୋର୍ଦ୍ଧା-ବାରଙ୍ଗ ରୁଟ୍ ତୃତୀୟ ରେଲ୍ଓ୍ବେ ଟ୍ରାକ୍ ନିର୍ମାଣ କାର୍ଯ୍ୟ ଚାଲିଛି। ୩୨ କିଲୋମିଟର ବିଶିଷ୍ଟ ଏହି ରେଳପଥର ୨୬ କିମି କାମ ଶେଷ ହୋଇଛି। ଭୁବନେଶ୍ୱର-ମଞ୍ଚେଶ୍ୱର ମଧ୍ୟରେ ୬ କି.ମି. ରେଳପଥ ସମ୍ପ୍ରସାରଣ ଲାଗି ବାଣୀବିହାର ଆରଓବିକୁ ଭାଙ୍ଗିବା ପାଇଁ ନିଷ୍ପତ୍ତି ନିଆଯାଇଛି। ଇତିମଧ୍ୟରେ ବିକଳ୍ପ ରାସ୍ତା ଭାବେ ପୁରୁଣା ଆର୍ଓବିକୁ ଲାଗି ନୂତନ ଦୁଇଲେନ୍ ବିଶିଷ୍ଟ ଆର୍ଓବି ନିର୍ମାଣ କାର୍ଯ୍ୟ ଶେଷ ହୋଇଛି। ଗତ ୧୫ ତାରିଖଠାର ସେହି ରାସ୍ତା ଦେଇ ଯାନବାହନ ଚଳାଚଳ କରୁଛି। ପୁରୁଣା ଆରଓବି ଭାଙ୍ଗିବା ପରେ କାମ ତ୍ୱରାନ୍ବିତ ହେବ ବୋଲି ରେଳ ବିକାଶ ନିଗମ ଲିମିଟେଡ୍ର ମୁଖ୍ୟ ପ୍ରକଳ୍ପ ମ୍ୟାନେଜର ପ୍ରଦୀପ ମହାନ୍ତି ସୂଚନା ଦେଇଛନ୍ତି। ବର୍ଷକ ମଧ୍ୟରେ ଏହି କାର୍ଯ୍ୟ ଶେଷ ହେବ। ୩ ଲେନ୍ ବିଶିଷ୍ଟ ଆରଓବି କାର୍ଯ୍ୟ ଶେଷ ହେଲେ ଏହା ସବୁଦିନିଆ ରାସ୍ତା ଭାବେ ବ୍ୟବହୃତ ହେବ। ନବନିର୍ମିତ ଦୁଇ ଲେନ୍ ବିଶିଷ୍ଟ ଆରଓବି ରସୁଲଗଡ଼କୁ ସଂଯୋଗ କରୁଥିବା ରାସ୍ତା ଭାବେ ବ୍ୟବହାର କରାଯିବ।
ଏହି ଅବସରରେ ଭୁବନେଶ୍ୱର ରେଳଷ୍ଟେଶନ ନିକଟବର୍ତ୍ତୀ କଳ୍ପନା ଏବଂ ମାଷ୍ଟର କ୍ୟାଣ୍ଟିନ ପାର୍ଶ୍ୱ ଆଧୁନିକୀକରଣ କାର୍ଯ୍ୟର ମଧ୍ୟ ମୁଖ୍ୟ ଶାସନ ସଚିବ ସମୀକ୍ଷା କରିଥିଲେ। ତେବେ ନୂତନ ପ୍ରକଳ୍ପ ନିର୍ମାଣ ପୂର୍ବରୁ ବିଡିଏ ସହ ପରାମର୍ଶ କରିବାକୁ ସେ ପୂର୍ବତଟ ରେଳଓ୍ବେ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ରେଲଓ୍ବେ ସମନ୍ବୟ କମିଶନର ମନୋଜ କୁମାର ମିଶ୍ର, ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ, ବିଏମ୍ସି କମିଶନର ବିଜୟ ଅମୃତ କୁଲାଙ୍ଗେ, ବିଡିଏ ଉପାଧ୍ୟକ୍ଷ ବଲୱନ୍ତ ସିଂ, ଖୋର୍ଦ୍ଧା ରୋଡ୍ ଡିଭିଜନ ଡିଆରଏମ୍ ରିଙ୍କେଶ ରୟ, ପୂର୍ବତଟ ରେଳବାଇ ମୁଖ୍ୟଯନ୍ତ୍ରୀ ପ୍ରମୁଖ ଉପସ୍ଥିତ ଥିଲେ।
