ଲକ୍ଷ୍ନୌ,୬।୧: ଦିଲ୍ଲୀରେ ଜଣେ ଯୁବତୀଙ୍କ ସ୍କୁଟିକୁ ଏକ କାର୍ ଧକ୍କା ଦେଇ ୧୩ କିଲୋମିଟର ଘୋଷାଡ଼ି ନେବା ଘଟଣା ସାରା ଦେଶରେ ଆଲୋଡ଼ନ ସୃଷ୍ଟି କରିଥିବାବେଳେ ଏହାର ପୁନରାବୃତ୍ତି ଘଟିଛି ଉତ୍ତରପ୍ରଦେଶରେ। ବନ୍ଦା ଜିଲାର ମାଓ୍ବାଇ ବୁଜୁର୍ଗ ଗ୍ରାମରେ ସ୍କୁଟିରେ ଯାଉଥିବା ଜଣେ ୩୨ ବର୍ଷୀୟ ମହିଳାଙ୍କୁ ଟ୍ରକ୍ ଧକ୍କା ଦେବା ସହ ମୃତଦେହକୁ ୩.୫ କିଲୋମିଟର ପର୍ଯ୍ୟନ୍ତ ଘୋଷାଡ଼ି ନେଇଛି। ମୃତଦେହ ସହ ସ୍କୁଟି ଚେସିସ୍ରେ ଲାଖିରହି ଘର୍ଷଣ ଯୋଗୁ ଟ୍ରକ୍ରେ ନିଆଁ ଲାଗିଯାଇଥିଲା। ମହିଳାଙ୍କ ସ୍କୁଟି ମଧ୍ୟ ଜଳିଯାଇଛି। ମୃତା ପୁଷ୍ପା କୃଷି ବିଶ୍ୱବିଦ୍ୟାଳୟରେ କିରାଣି ଥିଲେ। ୨୦୨୦ରେ ସ୍ବାମୀ ରଞ୍ଜିତ କୁମାରଙ୍କ ମୃତ୍ୟୁ ପରେ ପୁଷ୍ପାଙ୍କୁ ତାଙ୍କ ସ୍ଥାନରେ ନିଯୁକ୍ତି ଦିଆଯାଇଥିଲା। ସେ ବୁଧବାର ସନ୍ଧ୍ୟାରେ ପରିବା କିଣିବାକୁ ବଜାର ଯାଉଥିବାବେଳେ ଦୁର୍ଘଟଣାର ସମ୍ମୁଖୀନ ହୋଇଥିଲେ। ଡ୍ରାଇଭର ଅଖିଳେଶ ଯାଦବଙ୍କୁ ଧରିବା ଲାଗି ପୋଲିସ ଟିମ୍ ଗଠନ କରାଯାଇଥିବା କୋଟଓ୍ବାଲି ଏସ୍ଏଚ୍ଓ ଶ୍ୟାମବାବୁ ଶୁକ୍ଳା କହିଛନ୍ତି। ମହିଳାଙ୍କ ଶରୀର ଜଳିଯାଇଥିବାବେଳେ ପୋଷାକ ଓ ଗାଡ଼ିରୁ ତାଙ୍କୁ ଚିହ୍ନଟ କରାଯାଇଥିଲା। ଏଭଳି ମର୍ମନ୍ତୁଦ ଦୁର୍ଘଟଣାକୁ ନେଇ ଉକ୍ତ ଅଞ୍ଚଳରେ ଉତ୍ତେଜନା ଦେଖାଦେଇଛି। ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ ଏବଂ ଉକ୍ତ ରାସ୍ତାରେ ହମ୍ପ୍ସ ନିର୍ମାଣ ଦାବିରେ ଗ୍ରାମବାସୀ ଓ ଛାତ୍ରୀଛାତ୍ର ବିକ୍ଷୋଭ ପ୍ରଦର୍ଶନ କରିଛନ୍ତି।
