କେନ୍ଦ୍ରାପଡ଼ା ଅଫିସ,୨୬।୪: କେନ୍ଦ୍ରାପଡ଼ା ଡାକ ବିଭାଗରେ ଜାଲ ସାର୍ଟିଫିକେଟ ମାଧ୍ୟମରେ ଚାକିରି ଲିଙ୍କ୍ ଧରାପଡ଼ିଛି। ଡାକ ଅଧୀକ୍ଷକ ୨୦୧୮ରୁ ଅଦ୍ୟାବଧି ଚାକିରି କରିଥିବା କର୍ମଚାରୀଙ୍କ ସାର୍ଟିଫିକେଟ ଯାଞ୍ଚ କରି ୩ଜଣ ବ୍ରାଞ୍ଚ ପୋଷ୍ଟମାଷ୍ଟରଙ୍କୁ ମଙ୍ଗଳବାର ଚାକିରିରୁ ବହିଷ୍କୃତ କରିଛନ୍ତି। ଏଥିସହ ଜଣେ କର୍ମଚାରୀଙ୍କ ସାର୍ଟିଫିକେଟ ଅଦ୍ୟାବଧି ସନ୍ଦେହ ଘେରରେ ରହିଛି। ବହିଷ୍କୃତ କର୍ମଚାରୀଙ୍କ ନାମରେ ଟାଉନ ଥାନାରେ ମାମଲା ରୁଜୁ ହୋଇଛି।
ଏ ସମ୍ପର୍କରେ କେନ୍ଦ୍ରାପଡ଼ା ଡାକ ଅଧୀକ୍ଷକ ଦେବରାଜ ସେଠୀ କହିଛନ୍ତି ଯେ, ଜିଲାର ଧରିବିଲ ବ୍ରାଞ୍ଚର ମାମାଶ୍ରୀ ଭାରତୀ, ନରସିଂହପୁର ଡିହପଡ଼ା ବ୍ରାଞ୍ଚର ସୌମ୍ୟରଞ୍ଜନ ସେଠୀ ଓ କଦଳୀବଣ ବ୍ରାଞ୍ଚର ପ୍ରଶାନ୍ତ କୁମାର ସେଠୀଙ୍କୁ ନକଲି ଶିକ୍ଷା ସାର୍ଟିଫିକେଟ ପ୍ରଦାନ ପାଇଁ କାର୍ଯ୍ୟରୁ ବହିଷ୍କୃତ କରାଯାଇଛି। ଭଦ୍ରକ ଜିଲା ସୋରା କୁଲଣା ଗ୍ରାମର ମାମାଶ୍ରୀ ୨୦୨୧ ଜାନୁୟାରୀ ୨୯ରୁ ଏଠାରେ ଚାକିରି କରିଥିଲେ। ସେହିପରି ଭଦ୍ରକ ଜିଲା ରାଣିପଡ଼ା ଗ୍ରାମର ସୌମ୍ୟରଞ୍ଜନ ୨୦୨୨ ସେପ୍ଟେମ୍ବର ୫ ଓ ବନ୍ତ ଗ୍ରାମର ପ୍ରସନ୍ନ ୨୦୨୨ ସେପ୍ଟେମ୍ବର ୧୨ ତାରିଖଠାରୁ କେନ୍ଦ୍ରାପଡ଼ା ଜିଲାରେ ନିଯୁକ୍ତି ପାଇଥିଲେ। ସେମାନଙ୍କ ସାର୍ଟିଫିକେଟ ଉତ୍ତରପ୍ରଦେଶର ଥିବାବେଳେ ଓଡ଼ିଆ ବିଷୟରେ ୯୦ରୁ ୯୫ ପ୍ରତିଶତ ମାର୍କ ରହିଥିବା ଦେଖିବାକୁ ମିଳିଥିଲା। ଯାଞ୍ଚ ସମୟରେ ଏହାର ତଥ୍ୟ ଠିକ୍ ନ ଥିବା ଜାଣି ଚାକିରିରୁ ବହିଷ୍କୃତ ସହ ଥାନାରେ ଏ ନେଇ ଏଫ୍ଆଇଆର୍ ଦିଆଯାଇଛି। ଟାଉନ ଥାନା ଆଇଆଇସି ତପନ କୁମାର ନାୟକ କହିଛନ୍ତି, ଡାକ ଅଧୀକ୍ଷକ ସେଠୀଙ୍କ ଅଭିଯୋଗକୁ ଭିତ୍ତିକରି ମାମାଶ୍ରୀଙ୍କ ନାମରେ ନଂ.୧୩୧/୨୩, ସୌମ୍ୟରଞ୍ଜନ ଓ ପ୍ରସନ୍ନଙ୍କ ନାମରେ ନଂ. ୧୨୫/୨୩ରେ ମାମଲା ରୁଜୁ ହୋଇଛି। ଏ ନେଇ ପ୍ରାଥମିକ ତଦନ୍ତ ଆରମ୍ଭ ହୋଇଥିବା ଆଇଆଇସି ନାୟକ ପ୍ରକାଶ କରିଛନ୍ତି। ସୂଚନାଯୋଗ୍ୟ, ମାର୍ଚ୍ଚ ୨୧ ତାରିଖରେ କେନ୍ଦ୍ରାପଡ଼ା ଡାକ ମଣ୍ଡଳ ଅଧୀନରେ ଗ୍ରାମୀଣ ଡାକସେବକ ଚାକିରି ପାଇଁ ଭଦ୍ରକ ଜିଲା ଲୁଣିଆ ଗ୍ରାମର ଅନୀତା ଜେନା ନିଜର ଶିକ୍ଷାଗତ ପ୍ରମାଣପତ୍ର ଦାଖଲ କରିଥିଲେ। ଉତ୍ତରପ୍ରଦେଶ ଆଦର୍ଶ ଆରିଆ ଏସ୍ଏସ୍ ଏଚ୍ଏସ୍ଏସ୍ ତରୁଲୀ ହାର୍ଦ୍ଦୋଇ ହାଇସ୍କୁଲରୁ ୨୦୦୯ ମସିହାରେ ମାଟ୍ରିକ ପାସ୍ ପ୍ରମାଣପତ୍ରରେ ମୋଟ ୬୦୦ ନମ୍ବରରୁ ୫୭୭ ନଂ. ରଖିଥିବା ମାର୍କଲିଷ୍ଟରେ ଦେଖିବାକୁ ମିଳିଥିଲା; ଯାହା ଡାକ ବିଭାଗର ସନ୍ଦେହକୁ ଆସିଥିଲା। ଏ ନେଇ ଅଭିଯୋଗ ପରେ ଟାଉନ ଥାନା ପୋଲିସ ଅନୀତାଙ୍କ ବିରୋଧରେ ନଂ. ୧୦୧/୨୩ରେ ମାମଲା ରୁଜୁ କରିଥିଲା।
