ବ୍ରହ୍ମପୁର ଅଫିସ,୧୧ା୧୦:ଜଣେ ଡାକ୍ତର ସାଇବର ଠକେଇର ଶିକାର ହୋଇଛନ୍ତି। ସେ ହେଲେ ଗଜପତି ଜିଲା ଆର୍.ଉଦୟଗିରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ କାର୍ଯ୍ୟରତ ସର୍ଜରି ବିଭାଗର ଡା.ଲକ୍ଷ୍ମୀକାନ୍ତ ଚାନ୍ଦ। ଗତ ଶନିବାର ତାଙ୍କ ଏସ୍ବିଆଇ ଆକାଉଣ୍ଟ ଜମାଖାତାରୁ ଅନ୍ଲାଇନ୍ରେ ପ୍ରାୟ ୩.୨୫ଲକ୍ଷ ଟଙ୍କା କେହି ଦୁର୍ବୃତ୍ତ ଲୁଟି ନେବା ସମ୍ପର୍କରେ ବ୍ରହ୍ମପୁର ସାଇବର ଓ ଅର୍ଥନୈତିକ ଅପରାଧ ଶାଖାରେ ସେ ଅଭିଯୋଗ କରିଥିବା ଜଣାପଡ଼ିଛି। ସୂଚନା ମୁତାବକ, ଡା.ଚାନ୍ଦଙ୍କ ମୋବାଇଲକୁ ବାରମ୍ବାର ୟୋନୋ ହୋମ୍ପେଜ୍ର ଏକ ମେସେଜ୍ ଆସିଥିଲା। ସେ ଏହାକୁ କ୍ଲିକ୍ କରି ଦେଖିବାରୁ ଅପ୍ଡେଟ୍ ପାଇଁ ୟୁଜର ଆଇଡି ଏବଂ ପାସ୍ୱାର୍ଡ ପଠାଇବାକୁ ନିର୍ଦ୍ଦେଶ ଥିଲା। ଏହାକୁ ସେ ସତ ଭାବି ନିଜର ଆଇଡି ଏବଂ ପାସ୍ୱାର୍ଡ ଦେବା ପରେ ଆସିଥିବା ଓଟିପିକୁ ମଧ୍ୟ ପଠାଇ ଦେଇଥିଲେ। ଏହାପରେ ତାଙ୍କ ଆକାଉଣ୍ଟରୁ ପ୍ରଥମେ ୨,୯୯,୯୯୯ଟଙ୍କା ଏବଂ ଦ୍ୱିତୀୟ ଥର ୨୪,୯୮୭ଟଙ୍କା ଏଭଳି ମୋଟ ୩ଲକ୍ଷ ୨୪ହଜାର ୯୮୬ଟଙ୍କା ଟଙ୍କା କଟିଯାଇଥିଲା। ତାଙ୍କ ଏସ୍ବିଆଇ ଜମା ଖାତାରେ କେବଳ ବଳକା ୪ହଜାର ଟଙ୍କା ରହିଥିଲା। ଏଥିରୁ ସେ ସାଇବର ଠକେଇର ଶିକାର ହୋଇଥିବା ଜାଣିବାକୁ ପାଇ ସାଇବର ଓ ଅର୍ଥନେତିକ ଅପରାଧ ଥାନାର ଦ୍ୱାରସ୍ଥ ହୋଇଛନ୍ତି। ପୋଲିସ ଘଟଣାର ତଦନ୍ତ କରୁଥିବା କହିଛି।
