ଭୁବନେଶ୍ୱର,୧ା୪(ବ୍ୟୁରୋ): ଖଣି ଓ ବାଲି ମାଫିଆଙ୍କ ଟାର୍ଗେଟରେ ଥିବା ବିରୋଧୀ ଦଳର ୨୭ଜଣ ବିଧାୟକ ସେମାନଙ୍କ ଜୀବନ ପ୍ରତି ବିପଦ ଥିବା ଆଶଙ୍କା କରି ବାଚସ୍ପତିଙ୍କ ନିକଟରେ ସୁରକ୍ଷା ଦାବି କରିଛନ୍ତି। ଗୁରୁବାର ଶୂନ୍ୟକାଳରେ ବିରୋଧୀ ଦଳ ମୁଖ୍ୟ ସଚେତକ ମୋହନ ଚରଣ ମାଝି କହିଲେ, ଖଣି ମାଫିଆଙ୍କ ଟାର୍ଗେଟରେ ବିରୋଧୀ ଦଳର ୨୭ ଜଣ ସଦସ୍ୟ ରହିଛନ୍ତି। ହଜାର ହଜାର ଟ୍ରକ୍ ବାଲି ବିନା ଟ୍ରାଞ୍ଜିଟ୍ ପାସ୍ରେ ଚୋରା ଚାଲାଣ ହେଉଛି। ଦୈନିକ ପ୍ରାୟ ୩୫ ହଜାର କୋଟି ଟଙ୍କାର ବାଲିପଥର, ମୋରମ, ମାଟି ଆଦି ଚୋରା ଚାଲାଣ ହେଉଛି। କେତେତଣ ସରକାରୀ ଅଧିକାରୀ ବାଲି ମାଫିଆଙ୍କ ସହ ମିଶି ରାଜ୍ୟକୁ ଲୁଟ୍ କରୁଛନ୍ତି । ସରକାରଙ୍କୁ ରାଜସ୍ବ ହାନି ହେଉଛି। ବିରୋଧୀ ଦଳ ସଦସ୍ୟମାନେ ଏହି ପ୍ରସଙ୍ଗ ଗୃହରେ ବାରମ୍ବାର ଉଠାଉଥିଲେ ମଧ୍ୟ କାୈଣସି ପଦକ୍ଷେପ ନିଆଯାଉ ନାହିଁ। ବିଧାୟକମାନଙ୍କୁ ମାରିଦେବାକୁ ଧମକ ମିଳୁଛି। ବାଚସ୍ପତି ଏ ନେଇ ରୁଲିଂ ଦେବା ସହ ବାଲି ମାଫିଆଙ୍କ ସହ ହାତ ମିଶାଇଥିବା ଅଧିକାରୀଙ୍କୁ ଦଣ୍ଡିତ କରିବାକୁ ସେ ଦାବି କରିଥିଲେ। ସେହିପରି କଂଗ୍ରେସ ସଦସ୍ୟ ତାରା ପ୍ରସାଦ ବାହିନୀପତି ମଧ୍ୟ ଏହି ପ୍ରସଙ୍ଗ ଉଠାଇ ବାଚସ୍ପତିଙ୍କଠାରୁ ସୁରକ୍ଷା ଲୋଡ଼ିଥିଲେ।
ଏଥିସହ ପେଟ୍ରୋଲ, ଡିଜେଲ ଦରବୃଦ୍ଧିକୁ ନେଇ ବିରୋଧୀ ଦଳର ସଦସ୍ୟମାନେ ଉଦ୍ବେଗ ପ୍ରକାଶ କରିଥିଲେ। କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ବଢୁଥିବା ତୈଳ ଦରକୁ ନେଇ ଉଭୟ ରାଜ୍ୟ ଓ କେନ୍ଦ୍ର ସରକାର ଉପରେ ବର୍ଷିଛନ୍ତି। ଏ ନେଇ ସରକାର ଗୃହରେ ବିବୃତି ଦିଅନ୍ତୁ ନଚେତ ଯେଉଁ ନିଅଁା ଜଳିବ ସେଥିରେ ରାଜ୍ୟ ଓ କେନ୍ଦ୍ର ସରକାର ଛାରଖାର ହୋଇଯିବେ ବୋଲି ସେ କହିଛନ୍ତି। କଂଗ୍ରେସ ସଭ୍ୟ ସନ୍ତୋଷ ସିଂ ସାଲୁଜା କହିଥିଲେ, ଭୁବନେଶ୍ୱରରେ ପେଟ୍ରୋଲ ଲିଟର ପିଛା ୧୦୭ ଟଙ୍କା ୯୦ ପଇସା ହୋଇଥିବା ବେଳେ ଡିଜେଲ ଲିଟର ପିଛା ୯୭ଟଙ୍କା ୫୨ ପଇସାରେ ପହଞ୍ଚତ୍ଲାଣି। ରାଜ୍ୟ ସରକାର ଡିଜେଲ ଉପରେ ୨୪ ଟଙ୍କା ଓ ପେଟ୍ରୋଲ ଉପରେ ୨୮ ଟଙ୍କା ଟିକସ ନେଉଛନ୍ତି। ୧୦୦୦ ଟଙ୍କାରୁ ଊର୍ଦ୍ଧ୍ୱ ହେଲାଣି ଗ୍ୟାସ ଦର। ଦରଦାମ ଏତେ ବଢ଼ିଲାଣି ଯେ ଗରିବ ଲୋକଙ୍କ ପାଇଁ ଚଳିବା ମୁସ୍କିଲ ହୋଇ ପଡ଼ିଲାଣି। ରାଜ୍ୟ ସରକାର ଟିକସ ଛାଡ଼ କରିବା ସହ କେନ୍ଦ୍ର ସରକାର ତେଲ ଦର କମାନ୍ତୁ ବୋଲି ସାଲୁଜା ଦାବି କରିଥିଲେ। କଂଗ୍ରେସ ସଭ୍ୟ ତାରା ପ୍ରସାଦ ବାହିନୀପତି ମଧ୍ୟ ତୈଳ ଦର ବୃଦ୍ଧିକୁ ନେଇ ଉଦ୍ବେଗ ପ୍ରକାଶ କରିବା ସହ ଟିକସ ହ୍ରାସ କରିବାକୁ ଦାବି କରିଥିଲେ।
