କାରିଓ, ୨୭ା୧୨: ଶାନ୍ତି ଓ ଖୁସିର ସନ୍ଧାନରେ ୟୁରୋପ ମୁହାଁ ଶରଣାର୍ଥୀଙ୍କ ଜୀବନ କେତେ ବିପଦପୂର୍ଣ୍ଣ ତାହା ଦେଖିବାକୁ ମିଳିଛି ଲିବ୍ୟା ତଟରେ। ପଶ୍ଚିମ ଲିବ୍ୟା ଖୋମସ୍ ସହର ଦୁଇ ପୃଥକ ସ୍ଥାନରେ ଶନିବାର ଜଣେ ଶିଶୁ ଏବଂ ଦୁଇ ମହିଳାଙ୍କ ସମେତ ୨୭ ଶରଣାର୍ଥୀଙ୍କ ମୃତଦେହ ମିଳିଛି। ଆଉ ୩ ଜଣଙ୍କୁ ଉଦ୍ଧାର କରାଯାଇଥିବାବେଳେ ଅନ୍ୟମାନଙ୍କୁ ସନ୍ଧାନ କରାଯାଉଛି। ରେଡ୍ କ୍ରସ୍ ଭଳି ଏକ ମୁସଲମାନ ସଙ୍ଗଠନ ରେଡ୍ କ୍ରେସେଣ୍ଟ ଭୂମଧ୍ୟସାଗରରେ ମୃତଦେହଗୁଡ଼ିକ ଭାସୁଥିବାର ଫଟୋ ପ୍ରଥମେ ପୋଷ୍ଟ କରିଥିଲା। କେତେକ ଲୋକ ମୃତଦେହଗୁଡ଼ିକୁ ବ୍ୟାଗ୍ରେ ଭର୍ତ୍ତି କରୁଥିବା ସେଥିରେ ଦେଖିବାକୁ ମିଳିଥିଲା।
ଲିବ୍ୟା ଉପକୂଳରେ ଜାହାଜ ଦୁର୍ଘଟଣା ଯୋଗୁ ଶରଣାର୍ଥୀମାନେ ବୁଡ଼ିଯାଇଥିବା କୁହାଯାଉଛି। ଏଥିରେ ହିଁ ସେମାନଙ୍କ ମୃତ୍ୟୁ ଘଟିଥାଇପାରେ। ରାଜଧାନୀ ତ୍ରିପୋଲିରେ ଶରଣାର୍ଥୀଙ୍କ ଉପରେ ଆକ୍ରମଣ, ଅତ୍ୟାଚାର ବୃଦ୍ଧି ଏବଂ ଅନେକ କଟକଣା ଯୋଗୁ ସେମାନେ ଲିବ୍ୟା ସୀମା ପାର୍ ହେବାକୁ ଅନବରତ ଉଦ୍ୟମ ଚଳାଇଛନ୍ତି। ଜାତିସଂଘର ମାଇଗ୍ରେସନ୍ ଏଜେନ୍ସି ଅନୁଯାୟୀ, ଚଳିତ ବର୍ଷ କେନ୍ଦ୍ରୀୟ ଭୂମଧ୍ୟସାଗରରେ ବହୁସଂଖ୍ୟାରେ ଜାହାଜ ଦୁର୍ଘଟଣା, ବୋଟ୍ ବୁଡ଼ି ଯୋଗୁ ପ୍ରାୟ ୧୫ଶହ ଶରଣାର୍ଥୀ ପ୍ରାଣ ହରାଇଛନ୍ତି। ଡିସେମ୍ବର ପ୍ରାରମ୍ଭରେ ଉତ୍ତର ଆଫ୍ରିକୀୟ ଦେଶରୁ ଦୁଇଟି ପୃଥକ୍ ଜାହାଜରେ ଆସୁଥିବା ୧୬୦ରୁ ଅଧିକ ଶରଣାର୍ଥୀ ଦୁର୍ଘଟଣାର ଶିକାର ହୋଇ ବୁଡ଼ି ଯାଇଥିଲେ। ମୃତକଙ୍କ ମଧ୍ୟରେ ଅନେକ ଶିଶୁ ମଧ୍ୟ ରହିଛନ୍ତି। ଏକଚ୍ଛତ୍ରବାଦୀ ଶାସକ ମୋଆମ୍ମର ଗଦ୍ଦାଫିଙ୍କ ମୃତ୍ୟୁ ପରେ ଲିବ୍ୟାରେ ଅଶାନ୍ତି ଲାଗି ରହିଛି। ୨୦୧୧ ଆରବ ବିପ୍ଳବବେଳେ ଗଦ୍ଦାଫିଙ୍କୁ ହତ୍ୟା କରାଯାଇଥିଲା। ସେବେଠାରୁ ୟୁରୋପ ମଧ୍ୟରେ ପ୍ରବେଶ ପାଇଁ ସବୁଠୁ ଜଣାଶୁଣା ଏବଂ ବିପଜ୍ଜନକ ମାର୍ଗ ପାଲଟିଛି। ଆଫ୍ରିକା ଏବଂ ମଧ୍ୟପ୍ରାଚ୍ୟ ଦେଶଗୁଡ଼ିକର ଲୋକେ ଯୁଦ୍ଧ, ହିଂସା, ଅତ୍ୟାଚାରରୁ ରକ୍ଷା ପାଇବା ପାଇଁ ଲିବ୍ୟା ଦେଇ ୟୁରୋପ ଯିବାକୁ ଉଦ୍ୟମ କରୁଛନ୍ତି। ତୈଳରେ ସମୃଦ୍ଧ ଦେଶ ଲିବ୍ୟାରେ ଲାଗି ରହିଥିବା ବିଶୃଙ୍ଖଳା ଏବଂ ୬ଟି ଦେଶ ସହ ଏହାର ସୀମୀ ସଂଲଗ୍ନ ଯୋଗୁ ମାଫିଆମାନେ ମାନବ ଚାଲାଣରେ ମାତିଛନ୍ତି। ସେମାନେ ଭୂମଧ୍ୟସାଗର ଦେଇ ଶରଣାର୍ଥୀଙ୍କୁ ବିପଜ୍ଜନକ ଅବସ୍ଥାରେ ପଠାଉଛନ୍ତି। ବର୍ତ୍ତି ଯାଉଥିବା ଲୋକଙ୍କୁ ବନ୍ଦୀ ଅବସ୍ଥାରେ ରଖାଯାଇ ସେମାନଙ୍କୁ ଜବରଦସ୍ତ ବିନା ପାରିଶ୍ରମିକରେ କାମରେ ଲଗାଯାଉଛି। ସେମାନଙ୍କ ଉପରେ ଅକଥନୀୟ ଅତ୍ୟାଚାର ସହ ମହିଳାଙ୍କୁ ଚୋରା ଚାଲାଣ, ବଳାତ୍କାର କରାଯାଉଛି।
