ଜେନେଭା, ୨୪।୬ : ମିଳିତ ଜାତିସଂଘ ଦ୍ୱାରା ପ୍ରକାଶିତ ସର୍ବଶେଷ ରିପୋର୍ଟ ଅନୁଯାୟୀ, ଭୋକ ଉପାସ କାରଣରୁ ସାରା ବିଶ୍ୱରେ ପ୍ରତିଦିନ ୨୫ ହଜାର ଲୋକଙ୍କ ମୃତ୍ୟୁ ଘଟୁଛି। ସେଥିମଧ୍ୟରୁ ସର୍ବାଧିକ ସଂଖ୍ୟକ ଶିଶୁ ଅଛନ୍ତି। ଜାତିସଂଘର ରିପୋର୍ଟରେ କୁହାଯାଇଛି ଯେ ପ୍ରତିଦିନ ଦଶ ହଜାର ଶିଶୁଙ୍କର ଭୋକରେ ଜୀବନ ଯାଉଛି। ଏଥି ସହିତ, ବିଶ୍ୱର ପ୍ରାୟ ୮୫୪ ନିୟୁତ ଲୋକ ପୁଷ୍ଟିହୀନତାର ଶିକାର ହୋଇଛନ୍ତି ବୋଲି ଆକଳନ କରାଯାଇଛି। ଅନୁମାନ କରାଯାଇଛି ଯେ ଖାଦ୍ୟ ସାମଗ୍ରୀର ଦରଦାମରେ ଦ୍ରୁତ ଗତିରେ ବୃଦ୍ଧି ହେତୁ ଏହି ସଂଖ୍ୟା ଖୁବ୍ ଶୀଘ୍ର ୧୦୦ ନିୟୁତ ଛୁଇଁବାର ଆଶଙ୍କା ରହିଛି। ରିପୋର୍ଟରେ କୁହାଯାଇଛି ଯେ ସହରାଞ୍ଚଳର ଗରିବ, ବିସ୍ଥାପିତ ଜନସଂଖ୍ୟା, ଗ୍ରାମାଞ୍ଚଳର ଭୂମିହୀନଙ୍କ ସମେତ ଅଧିକାଂଶ ଛୋଟ ଚାଷୀ ପୁଷ୍ଟିହୀନତାର ଶିକାର ହେବାର ଆଶଙ୍କା ଅଧିକ ରହିଛି।
ଏହି କ୍ଷୁଧା ସଙ୍କଟ ସମ୍ପର୍କରେ ଜାତିସଂଘ ଦାବି କରିଛି ଯେ ଗତ ଦୁଇ ଦଶନ୍ଧି ମଧ୍ୟରେ ଜନସଂଖ୍ୟା ବୃଦ୍ଧି, ଆୟର ଉନ୍ନତି ଏବଂ ଖାଦ୍ୟର ବିବିଧତା ଖାଦ୍ୟର ଚାହିଦା କ୍ରମାଗତ ଭାବେ ବୃଦ୍ଧି ପାଇଛି। ୨୦୦୦ ପୂର୍ବରୁ ରେକର୍ଡ ପରିମାଣର ଖାଦ୍ୟଶସ୍ୟ ଉତ୍ପାଦନ ଯୋଗୁ ଖାଦ୍ୟ ମୂଲ୍ୟରେ ହ୍ରାସ ଘଟିଥିଲା। ଅବଶ୍ୟ, ସେହି ସମୟରେ କୃଷି କ୍ଷେତ୍ରରେ ସରକାରୀ ତଥା ବେସରକାରୀ ପୁଞ୍ଜି ବିନିଯୋଗରେ ହ୍ରାସ ଘଟିଥିଲା ଏବଂ ବିଶେଷ ଭାବରେ ମୁଖ୍ୟ ଖାଦ୍ୟ ଉତ୍ପାଦନରେ ଅଧିକାଂଶ ବିକାଶଶୀଳ ଦେଶରେ ଫସଲ ଅମଳ କମ ହୋଇଥିଲା।
ରିପୋର୍ଟରେ ଖାଦ୍ୟ ମୂଲ୍ୟରେ ବୃଦ୍ଧି ହେବାର ଅନ୍ୟ ଏକ କାରଣ ହେଉଛି ସହରୀକରଣ ସହ କୃଷି ଜମିକୁ ଅଣ କୃଷି ବ୍ୟବହାରରେ ପରିଣତ କରିବାକୁ ଲାଗି ରହିଥିବା ପ୍ରତିଯୋଗୀତା । ଫଳସ୍ବରୂପ ଖାଦ୍ୟଶସ୍ୟର କମ ବିକ୍ରି ଦାମ କୃଷକମାନଙ୍କୁ ବିକଳ୍ପ ଖାଦ୍ୟ ଏବଂ ଅଣ-ଖାଦ୍ୟ ଫସଲ ଚାଷ କରିବାକୁ ଉତ୍ସାହିତ କରିଛି। ଜାତିସଂଘ ଏହାର ନୂତନ ରିପୋର୍ଟରେ ବିଶ୍ୱ ଖାଦ୍ୟ ସଙ୍କଟକୁ ନେଇ ଉଦ୍ବେଗ ପ୍ରକାଶ କରିଛି। ଏହି ରିପୋର୍ଟ ଦେଶ ଏବଂ ଅଞ୍ଚଳ ଉପରେ ପର୍ଯ୍ୟବେସିତ। ଖାଦ୍ୟ ସଙ୍କଟର ଗମ୍ଭୀରତା ସ୍ଥାନୀୟ ସମ୍ବଳ ଏବଂ ସାମର୍ଥ୍ୟଠାରୁ ବହୁଗୁଣିତ ଅଟେ ବୋଲି ରିପୋର୍ଟରେ ଉଲ୍ଲେଖ କରାଯାଇଛି। ବିଶେଷଜ୍ଞମାନେ କହିଛନ୍ତି ଯେ ଗତ ଦୁଇ ବର୍ଷ ମଧ୍ୟରେ କରୋନା ମହାମାରୀ ଯୋଗୁ ଲକ୍ଷ ଲକ୍ଷ ଲୋକ ବେରୋଜଗାର ହୋଇଥିଲେ। ଏଭଳି ପରିସ୍ଥିତିରେ ଏହି ଲୋକଙ୍କୁ ବଞ୍ଚାଇବା ଏବଂ ଅନାହାର ମୃତ୍ୟୁକୁ ଏଡାଇବା ପାଇଁ ତୁରନ୍ତ କାର୍ଯ୍ୟାନୁଷ୍ଠାନ ଆବଶ୍ୟକ ବୋଲି ରିପୋର୍ଟରେ ଉଲ୍ଲେଖ କରାଯାଇଛି।
