ଖଇରା,୩୦।୭(ଡି.ଏନ.ଏ.)-ବାଲେଶ୍ୱର ଜିଲା ଖଇରା ବ୍ଲକ ନନ୍ଦୁର ଗ୍ରାମ ପଞ୍ଚାୟତ ଅଧୀନ ମଠନୂଆଗାଁ ଗ୍ରାମକୁ ବାହ୍ୟ ମଳମୁକ୍ତ ଗ୍ରାମ ଭାବେ ସରକାର ଘୋଷଣା କରିଛନ୍ତି। ଏଥିସହ ଜିଲା ଜଳ ପରିମଳ ମିଶନ ତରଫରୁ ଜୁଲାଇ ୨୨ ତାରିଖରେ ଗ୍ରାମରେ ସୂଚନାଫଳକ ଲଗାଇ ଦିଆଯାଇଛି। ଏହି ଘଟଣା ଗ୍ରାମବାସୀଙ୍କୁ ଆଶ୍ଚର୍ଯ୍ୟ କରିଛି। ଗ୍ରାମରେ ଆହୁରି ୨୫ପରିବାର ସ୍ବଚ୍ଛ ଭାରତ ଯୋଜନାରେ ପାଇଖାନା ପାଇବାରୁ ବଞ୍ଚିତ ଥିବା ବେଳେ ରେକର୍ଡ ପତ୍ରରେ ଶତପ୍ରତିଶତ ସଫଳତା ଦେଖାଇ ବାଃ ବାଃ ନେବାକୁ ଉଦ୍ୟମ କରାଯାଇଛି। ଏଭଳି ଘଟଣା ପଞ୍ଚାୟତିରାଜ ତଥା ଜଳ ପରିମଳ ବିଭାଗର ସ୍ବଚ୍ଛତା ଉପରେ ପ୍ରଶ୍ନ ଉଠାଇଛି। ଘଟଣା ସମ୍ପର୍କରେ ସମସ୍ତ ଗ୍ରାମବାସୀ ଖଇରା ବିଡିଓ ଦେବେନ୍ଦ୍ର ବଳଙ୍କୁ ଲିଖିତ ଭାବେ ଅଭିଯୋଗ କରିବା ସହ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି।
ଉକ୍ତ ଗ୍ରାମର ପରିବାର ସଂଖ୍ୟା ୬୦। ଲୋକସଂଖ୍ୟା ପାଖାପାଖି ୩ଶହ। ୬୦ ପରିବାର ମଧ୍ୟରୁ ବର୍ଷେ ତଳେ ୧୫ଜଣଙ୍କର ପାଇଖାନା ନିର୍ମାଣ କରାଯାଇଥିଲା। ୨ମାସ ତଳେ ୨୦ଜଣ ନିଜସ୍ବ ଉଦ୍ୟମରେ ପାଇଖାନା ନିର୍ମାଣ କରିଥିଲେ। ଏଥିମଧ୍ୟରୁ ୧୦ଜଣଙ୍କୁ ଅର୍ଥ ମିଳି ସାରିଥିବା ବେଳେ ବାକି ୧୦ଜଣ ଦୌଡି ଦୌଡି ନୟାନ୍ତ ହୋଇଥିଲେ ମଧ୍ୟ ବିଲ୍ ପାଇନାହାନ୍ତି। ବାକି ୨୫ଜଣଙ୍କୁ ଏପର୍ଯ୍ୟନ୍ତ ପାଇଖାନା ମିଳିନାହିଁ। ଏଭଳି ପରିସ୍ଥିତିରେ ଶହେ ପ୍ରତିଶତ ନିର୍ମାଣ ହୋଇଥିବା ନେଇ ତଥ୍ୟକୁ ଗ୍ରାମର ଲକ୍ଷ୍ମଣ ବେହେରା ସମାଲୋଚନା କରିଛନ୍ତି। ଏହାର ତଦନ୍ତ କରାଗଲେ କେତେ ପରିବାର ନାମରେ କେତେ ଟଙ୍କା ହଡପ କରାଯାଇଛି ତାହା ଜଣାପଡିବ ବୋଲି ଗ୍ରାମର ପ୍ରଦୀପ ସାମଲ, ବିଦ୍ୟାଧର ପରିଡା, ଲକ୍ଷ୍ମୀକାନ୍ତ ମହାନ୍ତି ଅଭିଯୋଗ କହିଛନ୍ତି। ସରକାରଙ୍କ ଗାଇଡ୍ଲାଇନ ମୁତାବକ ଶତପ୍ରତିଶତ ପାଇଖାନା ନିର୍ମାଣ ହେବା ପରେ ବାହ୍ୟ ମଳମୁକ୍ତ ଗ୍ରାମ ଘୋଷଣା ହେବା କଥା। ହେଲେ ୪୦ପ୍ରତିଶତ ପରିବାରକୁ ପାଇଖାନା ମିଳି ନ ଥିବା ବେଳେ ସେମାନେ ମଳତ୍ୟାଗ ପାଇଁ ଖୋଲା ପଡିଆ ଉପରେ ନିର୍ଭର କରୁଛନ୍ତି। ଏଭଳି ଘୋଷଣା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ଗ୍ରାମର ପର୍ଶୁରାମ ମହାନ୍ତି ଓ ଉପେନ୍ଦ୍ର ପରିଡ଼ା ଅଭିଯୋଗ କରିଛନ୍ତି। ଲଗାଯାଇଥିବା ସୂଚନାଫଳକ ଗ୍ରାମର ଶୋଭା ନଷ୍ଟ କରୁଥିବାରୁ ତାହାକୁ ହଟାଇବାକୁ ଗ୍ରାମବାସୀ ଦାବି କରିଛନ୍ତି। ଏ ସମ୍ପର୍କରେ ବିଡିଓ ଦେବେନ୍ଦ୍ର ପ୍ରସାଦ ବଳଙ୍କୁ ଯୋଗାଯୋଗ କରିବାରେ ଏବେ ଯୋଜନା କାର୍ଯ୍ୟକ୍ଷମ ନ ଥିବାରୁ ବାକି ପାଇଖାନା ନିର୍ମାଣ କରାଯିବା ସମ୍ଭବପର ନୁହେଁ ବୋଲି କହିଛନ୍ତି। ସେହିଭଳି ଏହି ପଞ୍ଚାୟତର ଅସୁରିଆ ଗ୍ରାମରେ ସମାନ ପରିସ୍ଥିତି ଉପୁଜିଥିବା ସମ୍ପୃକ୍ତ ଗ୍ରାମବାସୀ ଅଭିଯୋଗ କରିଛନ୍ତି।
