ଭୋପାଳ, ୧୧।୮: ମଧ୍ୟପ୍ରଦେଶର ରେୱାରେ ସ୍ବାସ୍ଥ୍ୟ ବିଭାଗର ଏକ ବଡ଼ ଅବହେଳା ଦେଖିବାକୁ ମିଳିଛି। ଏଠାରେ ଥିବା ଏକ ଡାକ୍ତରଖାନାରେ ଜଣେ ୨୨ ବର୍ଷ ବର୍ଷୀୟ ଯୁବକଙ୍କ ମୃତ୍ୟୁ ଘଟିଥିଲା, କିନ୍ତୁ ୬୨ ବର୍ଷ ବୃଦ୍ଧ ବ୍ୟକ୍ତିଙ୍କ ମୃତଦେହ ପରିବାରକୁ ହସ୍ତାନ୍ତର କରାଯାଇଥିଲା। ଅବହେଳାର ଏହି ବଡ ଘଟଣା ପ୍ରକାଶ ପାଇବା ମାତ୍ରେ ପ୍ରଶାସନ କାର୍ଯ୍ୟାନୁଷ୍ଠାନ ଗ୍ରହଣ କରି ସେଥିରେ ସମ୍ପୃକ୍ତ ଡାକ୍ତରଙ୍କୁ ନିଲମ୍ବିତ କରାଯାଇଛି। ଏହି ଚରମ ଅବହେଳା ହେତୁ ମୃତକଙ୍କ ପରିବାର ଡାକ୍ତରଖାନା ବାହାରେ ଉତ୍ତେଜନା ସୃଷ୍ଟି କରି ମୃତଦେହ ନେବାକୁ ମନା କରିଦେଇଥିଲେ। ପରିବାର ସଦସ୍ୟ ଏହାକୁ ବିରୋଧ କରିଥିଲେ ଯେ ସେମାନଙ୍କୁ ଅନ୍ୟର ମୃତଦେହ ହସ୍ତାନ୍ତର କରାଯାଇଛି। ମୃତ ଯୁବକଙ୍କ ପିତା ରାମବିଳାସ କୁଶୱାହା କହିଛନ୍ତି ଯେ, ତାଙ୍କ ପୁଅଙ୍କ ଶବଦାହ କରାଯାଇଛି ବୋଲି ଜିଲା ମୁଖ୍ୟ ଚିକିତ୍ସା ଓ ସ୍ବାସ୍ଥ୍ୟ ଅଧିକାରୀ (ସିଏମଏଚଓ) ସୂଚନା ଦେଇଛନ୍ତି। ଏହି ଅବହେଳା ପ୍ରକାଶ ପାଇବା ପରେ ଡାକ୍ତରଖାନାର ଡାକ୍ତରଙ୍କୁ ନିଲମ୍ବିତ କରାଯାଇଛି।
ଶରୀରରେ ଯନ୍ତ୍ରଣା ହେବାରୁ ୨୨ ବର୍ଷୀୟ ଯୁବକଙ୍କୁ ଅଗଷ୍ଟ ୩ରେ ସଞ୍ଜୟ ଗାନ୍ଧୀ ଡାକ୍ତରଖାନାର ଆଇସିୟୁରେ ଭର୍ତ୍ତି କରାଯାଇଥିଲା। ଯନ୍ତ୍ରଣା ହେବା ପରେ ତାଙ୍କୁ ପ୍ରଥମେ ମୌଗଞ୍ଜରେ ପ୍ରାଥମିକ ଚିକିତ୍ସା କରାଯାଇଥିଲା। ପରେ ଡାକ୍ତରମାନେ ଯୁବକଙ୍କୁ କୋଭିଡ କେନ୍ଦ୍ରକୁ ପଠାଇଥିେଲେ। ମୃତ ଯୁବକଙ୍କ ପିତା କହିଛନ୍ତି ଯେ, ତାଙ୍କ ପୁଅ ଯେବେଠାରୁ ହସ୍ପିଟାଲରେ ଭର୍ତ୍ତି ହୋଇଥିଲେ ଡାକ୍ତରମାନେ ତାଙ୍କ ବିଷୟରେ କୌଣସି ସୂଚନା ଦେଇ ନ ଥିଲେ। ୩-୪ ଦିନ ପରେ ପରିବାର ଲୋକେ ପୁଅ ବିଷୟରେ ଜାଣିବା ପାଇଁ ଚାହିଁଲେ ସେବେ ଡାକ୍ତର ତାଙ୍କର ମୃତ୍ୟୁ ହୋଇଥିବା କହିଥିଲେ। ହସ୍ପିଟାଲକୁ ଆସି ମୃତଦେହ ଚିହ୍ନି ନେବାକୁ କହିଥିଲେ। ମୃତ ପୁଅର ଟ୍ୟାଗ୍ ଲାଗିଥିବା ବ୍ୟାଗ୍ ଖୋଲିବାରୁ ଜଣେ ବୃଦ୍ଧଙ୍କ ମୃତଦେହ ଦେଖିବାକୁ ମିଳିଥିଲା ବୋଲି ସେ କହିଛନ୍ତି।
