ପାଟନା,୧୩।୧୨ : ବିହାରରୁ ବଡ ଖବର ଆସିଛି। ରାଜ୍ୟ ମୁଖ୍ୟମନ୍ତ୍ରୀ ନୀତୀଶ କୁମାର ଏକ ବଡ଼ ଘୋଷଣା କରିଛନ୍ତି। ନୀତୀଶ ସ୍ପଷ୍ଟ ଶବ୍ଦରେ କହିଛନ୍ତି ଯେ ଉପ ମୁଖ୍ୟମନ୍ତ୍ରୀ ତେଜସ୍ବୀ ଯାଦବଙ୍କ ନେତୃତ୍ୱରେ ରାଜ୍ୟରେ ୨୦୨୫ରେ ବିଧାନସଭା ନିର୍ବାଚନ ମିଳିତ ମେଣ୍ଟ ପକ୍ଷରୁ ଲଢ଼ାଯିବ।
ଏହା ସହିତ ସ୍ପଷ୍ଟ କରିଛନ୍ତି ଯେ ସେ ପ୍ରଧାନମନ୍ତ୍ରୀ ପଦ ପାଇଁ ପ୍ରାର୍ଥୀ ନୁହଁନ୍ତି। ସମସ୍ତଙ୍କ ସହ ମିଶି ସେ ଭାଜପା ହଟାଇବାକୁ ଚାହୁଁଛନ୍ତି। ମହାମେଣ୍ଟ ବିଧାନସଭା ପାର୍ଟିର ବୈଠକ ଶେଷ ହେବା ପରେ ମୁଖ୍ୟମନ୍ତ୍ରୀ ନୀତୀଶ କୁମାର ଏହି ଆଶ୍ଚର୍ଯ୍ୟଜନକ ତଥା ବଡ ବିବୃତ୍ତି ଦେଇଛନ୍ତି। ମୁଖ୍ୟମନ୍ତ୍ରୀ ନୀତୀଶଙ୍କ ଏଭଳି ମନ୍ତବ୍ୟ ରାଜ୍ୟ ରାଜନୀତିକୁ ସରଗରମ କରିପାରେ ବୋଲି ଚର୍ଚ୍ଚା ହେଉଛି।
ମଙ୍ଗଳବାର ରାଜ୍ୟ ରାଜଧାନୀ ପାଟନାରେ ମହାମେଣ୍ଟ ବିଧାନସଭା ପାର୍ଟିର ଏକ ବୈଠକ ଡକାଯାଇଥିଲା। ବୈଠକ ଶେଷ ହେବା ପରେ ମୁଖ୍ୟମନ୍ତ୍ରୀ ନୀତୀଶ କୁମାର କହିଛନ୍ତି, ୨୦୨୫ ମସିହାରେ ହେବାକୁ ଥିବା ବିହାର ବିଧାନସଭା ନିର୍ବାଚନରେ ତେଜସ୍ବୀ ଯାଦବଙ୍କ ନେତୃତ୍ୱରେ ଲଢ଼େଇ ହେବ। ମୁଁ ପ୍ରଧାନମନ୍ତ୍ରୀ ପଦ ପାଇଁ ପ୍ରାର୍ଥୀ ନୁହେଁ। ଆମେ ସମସ୍ତେ କେବଳ ଭାଜପାକୁ ହଟାଇବାକୁ ଚାହୁଁଛୁ। ଏହା ସହିତ ନୀତୀଶ ବୈଠକରେ ମଦ ବିକ୍ରି ନିଷେଧାଦେଶକୁ ନେଇ ଜାରି ରହିଥିବା ଆରୋପ ପ୍ରତ୍ୟାରୋପ ନେଇ ଅସନ୍ତୋଷ ବ୍ୟକ୍ତ କରିଛନ୍ତି।
ସେ ଏନେଇ ବିଧାନସଭା ପାର୍ଟି ନେତା ଅଜିତ ଶର୍ମା ଏବଂ ଅନ୍ୟ ବିଧାୟକମାନଙ୍କୁ ମଧ୍ୟ ପରାମର୍ଶ ଦେଇଛନ୍ତି। ନୀତୀଶ କହିଛନ୍ତି, ଯେଉଁମାନେ ନିଷେଧାଦେଶ ଉପରେ ନିର୍ବୋଧ କଥା କହୁଛନ୍ତି, ସେମାନେ ଜାଣନ୍ତି ନାହିଁ ଯେ ସମସ୍ତଙ୍କ ସମ୍ମତି ପରେ ଏହି ନିଷେଧାଦେଶ ଲାଗୁ କରାଯାଇଛି। ନିଷେଧାଦେଶ ଉପରେ ଏଭଳି କଥା କହିବା ଅପେକ୍ଷା ଏହାକୁ କିପରି ପ୍ରଭାବଶାଳୀ କରାଯିବ ତାହା ଉପରେ କାର୍ଯ୍ୟ କରିବା ଭଲ ବୋଲି ସେ କହିଛନ୍ତି।
