କେନ୍ଦୁଝର,୨୩ା୯(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ଘଟଗାଁ ବ୍ଲକ୍ ଢେଙ୍କିକୋଟ ମୁସଲିମ ସାହିର ସାପ ଧରାଳି ଅବଦୁଲ ନାଦିର ଅନ୍ସାରୀ(୨୪)। ଅଞ୍ଚଳରେ ସାପ ମଣିଷ ଭାବେ ପରିଚୟ ଲାଭ କରିଥିବା ଏହି ଯୁବକ ଗତ ୨ ମାସ ମଧ୍ୟରେ ୨ ଶହରୁ ଊର୍ଦ୍ଧ୍ୱ ସାପ ଧରିଲେଣି। ଲୋକଙ୍କ ଘରବାଡ଼ିରେ ସାପ ବାହାରିଲେ ସର୍ବଦା ତାଙ୍କୁ ଖୋଜାପଡ଼େ। ବିଶେଷ କରି ବର୍ଷାଦିନେ ଜଙ୍ଗଲ ଘେରା କେନ୍ଦୁଝର ଜିଲାରେ ସାପ କାମୁଡ଼ାରେ ମୃତ୍ୟୁ ସଂଖ୍ୟା ଅଧିକ ରହୁଛି। ଘଟଗଁା ଅଞ୍ଚଳରେ ମଧ୍ୟ ପ୍ରାୟତଃ ସାପ କାମୁଡ଼ା ମାମଲା ଆସୁଛି। ଏ ନେଇ ଖବର ମିଳିବା ମାତ୍ରେ ଘଟଣାସ୍ଥଳରେ ପହଞ୍ଚତ୍ ସାପ ଉଦ୍ଧାର କରିଥାନ୍ତି। ଏନେଇ କୌଣସି ପାରିଶ୍ରମିକ ମିଳୁ ନ ଥିଲେ ମଧ୍ୟ ନିଜର ଖୁସି ଓ ସେବା ମନୋବୃତ୍ତିରେ କରୁଥିବା ସେ କହିଛନ୍ତି।
ନାଦିର କହିଛନ୍ତି, ଅର୍ଥାଭାବରୁ ୬ଷ୍ଠରୁ ପାଠ ଛାଡ଼ି ଘରେ ରହିଥିଲେ। ୧୫ ବର୍ଷରୁ ସେ ସାପ ଧରିବା କୌଶଳ ଶିଖିଥିଲେ। ଏଥିପାଇଁ ଖଣ୍ଟଘର ଗ୍ରାମର ବବି ଭାଇ ସହାୟତା କରିଛନ୍ତି। ପ୍ରଥମେ ବିଷ ନ ଥିବା ସାପକୁ ଧରିବା କୌଶଳ ଶିଖିବା ପରେ ବିଷାକ୍ତ ସାପ ଧରିବା ଶିଖିଲେ। ସାପ କାହାର କ୍ଷତି କରେ ନାହିଁ। ନିଜର ପ୍ରତିରକ୍ଷା ପାଇଁ କାମୁଡ଼ିଦେଇଥାଏ। ଏଣୁ ସାପ ନ ମାରି ତାଙ୍କୁ ସୂଚିତ କରିବାକୁ ଲୋକଙ୍କୁ ପରାମର୍ଶ ଦେଇଥାନ୍ତି। ଦିନରାତି ଯେ କୌଣସି ସମୟରେ ଖବର ମିଳିଲେ ଘଟଣାସ୍ଥଳରେ ପହଞ୍ଚତ୍ ସାପକୁ ଧରି ପାଖ ଜଙ୍ଗଲରେ ଛାଡ଼ି ଦିଅନ୍ତି। ପୂର୍ବରୁ ଅନେକ ସାପ ଧରିଥିବା ବେଳେ ଗତ ୨ ମାସରେ ଉକ୍ତ ଅଞ୍ଚଳରୁ ଗୋଖର, ଚିତି, ରଣା, ଡାଳୁଅ ନାଗ ଭଳି ବହୁ ବିଷାକ୍ତ ଓ ଅଜଗର, ଢମଣା ଭଳି ବିଷ ନ ଥିବା ୨ଶହରୁ ଊର୍ଦ୍ଧ୍ୱ ସାପ ଧରିଥିବା କୁହନ୍ତି। ସାପ ଧରିବା ସମୟରେ ସେ ବହୁ ଥର ସାପ କାମୁଡ଼ାର ଶିକାର ମଧ୍ୟ ହୋଇଥିବା କହିଛନ୍ତି। ଏଥିପାଇଁ ସେଭଳି କୌଣସି ପ୍ରଶାସନିକ ସ୍ତରରେ ସହାୟତା ଓ ସମ୍ମାନ ମିଳିନାହିଁ। ବେଳେ ବେଳେ କେତେଜଣ ଲୋକ ଖୁସିରେ କିଛି ଆର୍ଥିକ ସହାୟତା କରିଥାନ୍ତି। ଏଥିପାଇଁ ତାଙ୍କୁ ବିଭିନ୍ନ ସ୍ଥାନରୁ ଶୁଭେଚ୍ଛା ବାର୍ତ୍ତା ଆସିବା ସହ ବିଭିନ୍ନ ସଙ୍ଗଠନ ପକ୍ଷରୁ ସମ୍ବର୍ଦ୍ଧିତ କରାଯାଇଛି। ଘରେ ବାପା ଏମ୍ଡି ତହୁର ଅନସାରୀ, ଭାଇ ଅବଦୁଲ କାଦିର ଅନସାରୀ ଥିବା ବେଳେ ୧୦ ବର୍ଷ ବୟସରେ ମା’ଙ୍କୁ ହରାଇଥିବା କୁହନ୍ତି। ଭାଇ ଫୁଟ୍ପାଥରେ କପଡ଼ା ଦୋକାନ କରି ପରିବାର ଚଳାନ୍ତି। ସେ ଲୋକଙ୍କ ସେବା କରିବା ସହ ଭାଇଙ୍କୁ ବ୍ୟବସାୟରେ ସହଯୋଗ କରନ୍ତି। ଏଥିସହ ଏକ ନ୍ୟୁଜ୍ ପୋର୍ଟାଲ ଚ୍ୟାନେଲରେ ଖବରଦାତା ଭାବେ କାର୍ଯ୍ୟ କରୁଥିବା କହିଛନ୍ତି। ପ୍ରଶାସନିକ ସ୍ତରରେ ଯୁବକଙ୍କୁ ସହାୟତା ଦେବା ଉଚିତ ବୋଲି ସାମାଜିକ କର୍ମୀ ତପନ କୁମାର ବେହେରା କହିଛନ୍ତି।
