ବାଲେଶ୍ୱର ଅଫିସ, ୩୧।୧: ଏକ ଶିଶୁକନ୍ୟା ବଳାତ୍କାର ମାମଲାର ବିଚାର କରି ବାଲେଶ୍ୱର ସ୍ବତନ୍ତ୍ର ଜଜ୍ (ପୋକ୍ସୋ) ରଞ୍ଜନ କୁମାର ସୂତାର ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରି ୨୦ବର୍ଷ ଜେଲ୍ଦଣ୍ଡ ସହ ୧୦ହଜାର ଟଙ୍କା ଜରିମାନା ଆଦେଶ ଦେଇଛନ୍ତି। ଜରିମାନ ଅନାଦେୟ ୨ ବର୍ଷ ଅଧିକ ଜେଲ୍ଦଣ୍ଡ ଭୋଗିବାକୁ ରାୟରେ କୁହାଯାଇଛି।
ଜୁଲାଇ ୨ରେ ବାଲେଶ୍ୱର ଜିଲା ସିଂଲା ଥାନା ଅଞ୍ଚଳର ଜଣେ ୫ ବର୍ଷୀୟା ଶିଶୁ ଏକ ବିବାହରେ ଯୋଗଦେବାକୁ ତାଙ୍କ ମା’ ବାପାଙ୍କ ସହିତ ମାମୁ ଘରକୁ ଯାଇଥିଲେ। ୫ ତାରିଖ ମଧ୍ୟାହ୍ନରେ ଖଳାରେ ବାଜୁଥିବା ମାଇକ୍ ନିକଟରେ ସାଙ୍ଗମାନଙ୍କ ସହିତ ସେ ଖେଳୁଥିଲେ। ପରିବାର ଲୋକେ କାର୍ଯ୍ୟରେ ବ୍ୟସ୍ତ ଥିବା ଏବଂ ଆଖପାଖରେ କେହି ନ ଥିବା ସୁଯୋଗ ନେଇ ମାଇକ ବଜାଉଥିବା ମୁନା ହାଁସଦା (୨୨) ଶିଶୁକନ୍ୟାକୁ ପ୍ରଲୋଭନ ଦେଖାଇ ଖଳା ପଛପଟେ ଥିବା ପୁରୁଣା ଶୌଚାଳୟକୁ ଉଠାଇ ନେଇଥିଲେ। ସେଠାରେ ବଳପୂର୍ବକ ବଳାତ୍କାର କରୁଥିବା ବେଳେ ଶିଶୁକନ୍ୟାଜଣକ ଚିତ୍କାର କରିଥିଲେ। ତାଙ୍କ ମା’ ଓ ପରିବାର ଲୋକେ ଦୌଡ଼ି ଯାଇ ଶିଶୁକନ୍ୟାଙ୍କୁ ଉଦ୍ଧାର କରିବା ସହ ମୁନାଙ୍କୁ ଅଟକ ରଖିଥିଲେ। ପରେ ଶିଶୁକନ୍ୟାଙ୍କୁ ବସ୍ତା ଡାକ୍ତରଖାନାକୁ ନେଇ ଚିକିତ୍ସା କରାଇଥିଲେ। ଅପରପକ୍ଷରେ ଶିଶୁକନ୍ୟାଙ୍କ ମା’ ସିଂଲା ଥାନାରେ ମୁନାଙ୍କ ନାମରେ ଲିଖିତ ଅଭିଯୋଗ ଦେଇଥିଲେ। ଏନେଇ ସିଂଲା ଥାନାରେ ମାମଲା (ନଂ. ୧୪୯/୨୨) ରୁଜୁ କରାଯାଇ ମୁନାଙ୍କୁ ପୋଲିସ ଗିରଫ କରି କୋର୍ଟଚାଲାଣ କରିଥିଲା। ଜଜ୍ ୧୦ ସାକ୍ଷ୍ୟ ଓ ୨୪ ଦସ୍ତାବିଜ୍କୁ ଭିତ୍ତି କରି ଉପରୋକ୍ତ ଦଣ୍ଡାଦେଶ ଦେଇଛନ୍ତି। ଅନ୍ୟପକ୍ଷରେ ପୀଡ଼ିତାଙ୍କୁ ୪ଲକ୍ଷ ଟଙ୍କାର ଅନୁକମ୍ପାମୂଳକ ରାଶି ଯୋଗାଇ ଦେବା ପାଇଁ ଜିଲା ଆଇନ ସେବା ପ୍ରାଧିକରଣ ବିଭାଗକୁ ନିର୍ଦ୍ଦେଶ ଦେଇଛନ୍ତି। ସରକାରଙ୍କ ପକ୍ଷରୁ ସ୍ବତନ୍ତ୍ର ପବ୍ଲିକ ପ୍ରସିକ୍ୟୁଟର ପ୍ରଣବ କୁମାର ପଣ୍ଡା ମାମଲାର ପରିଚାଳନା କରୁଥିଲେ।
