କୋହିମା, ୪।୯ : ଆସନ୍ତା ବର୍ଷ ଆରମ୍ଭରେ ନାଗାଲାଣ୍ଡରେ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ରାଜ୍ୟର ପୂର୍ବ ଭାଗକୁ ଅଲଗା କରି ଏକ ନୂତନ ରାଜ୍ୟ ଗଠନ ପାଇଁ ଦାବି ଜୋର ଧରିଛି। ୨୦ ଜଣ ବିଧାୟକ ମଧ୍ୟ ଦାବି ପୂରଣ ନହେବା ପର୍ଯ୍ୟନ୍ତ କୌଣସି ନିର୍ବାଚନରେ ଯୋଗ ନ ଦେବାକୁ କରାଯାଉଥିବା ଆହ୍ବାନକୁ ସମର୍ଥନ କରିଛନ୍ତି। ୬ ଟି ଜିଲ୍ଲା – ସୋମ, ତୁଏନସାଙ୍ଗ, କିଫିରେ, ଲୋଙ୍ଗଲେଙ୍ଗ, ନୋକଲାକ ଏବଂ ଶାମାଟର ଆଦି ୬ଟି ଜିଲା ପୂର୍ବ ନାଗାଲାଣ୍ଡ ଅଧୀନରେ ଆସନ୍ତି। ଏଠାରେ ଚାଙ୍ଗ, ଖିଆମନିଙ୍ଗନ, କୋନ୍ୟାକ, ଫୋମ, ସାଙ୍ଗତନ, ତିଖିର ଏବଂ ୟିମଖିଓଙ୍ଗ ଆଦି ସାତଟି ଜନଜାତିର ଲୋକ ଏସବୁ ଜିଲାରେ ବାସ କରନ୍ତି।
ଏହି ଅଞ୍ଚଳର ଏକ ପ୍ରଭାବଶାଳୀ ସଂଗଠନ ଇଷ୍ଟର୍ଣ୍ଣ ନାଗାଲାଣ୍ଡ ପିପୁଲ୍ସ ଅର୍ଗାନାଇଜେସନ (ଇଏନପିଓ) ଅଗଷ୍ଟ ୨୬ ରେ ଦିମାପୁରରେ ନେତା, ସଂଗଠନ ଏବଂ ଏହି ଅଞ୍ଚଳର ଅନ୍ୟ ସଂଗଠନମାନଙ୍କ ସହ ଏକ ବୈଠକ କରି କୌଣସି ନିର୍ବାଚନରେ ଭାଗ ନେବେ ନାହିଁ ବୋଲି ନିଷ୍ପତ୍ତି ନେଇଥିଲା। ଯେପର୍ଯ୍ୟନ୍ତ, ଏକ ପୃଥକ ସୀମାନ୍ତ ନାଗାଲାଣ୍ଡ ରାଜ୍ୟ ପାଇଁ ସେମାନଙ୍କର ଦାବି ପୂରଣ ନ ହୋଇଛି। ଆନ୍ଦୋଳନ ଜାରି ରହିବ ବୋଲି ଯୋଜନା ପ୍ରସ୍ତୁତ ହୋଇଛି।
ପୂର୍ବାଞ୍ଚଳ ନାଗାଲାଣ୍ଡ ବିଧାନସଭା ୟୁନିଅନର ଜମି ସମ୍ବଳର ସଚିବ ତଥା ପରାମର୍ଶଦାତା ସି.ଏଲ ଜନ କହିଛନ୍ତି ଯେ ଏହି ଅଞ୍ଚଳର ୨୦ ଜଣ ବିଧାୟକ ଲୋକଙ୍କ ଇଚ୍ଛା ବିରୁଦ୍ଧରେ ଯାଇପାରିବେ ନାହିଁ। ଏକ ଅଲଗା ରାଜ୍ୟ ଗଠନର ଦାବି ହେଉଛି ଏକ ଜନ ଆନ୍ଦୋଳନ ଏବଂ ଆମେ ଲୋକଙ୍କ ସହିତ ଅଛୁ। ନାଗାଲାଣ୍ଡ ପିପୁଲ୍ସ ଫ୍ରଣ୍ଟ (ଏନପିଏଫ) କହିଛି ୨୦୧୦ ମସିହାରୁ ଏକ ପୃଥକ ରାଜ୍ୟ ପାଇଁ ଦାବି ନେଇ ଆନ୍ଦୋଳନ ଚାଲିଛି ଏବଂ ଇଏନପିଓ ପକ୍ଷରୁ ବହୁଥର ଏ ବାବଦରେ କେନ୍ଦ୍ରକୁ ଏକ ସ୍ମାରକପତ୍ର ପ୍ରଦାନ କରାଯାଇଛି । ମାତ୍ର ଏ ସମ୍ପର୍କରେ କୌଣସି ଉତ୍ତର ନ ମିଳିବାରୁ ଲୋକମାନେ କେନ୍ଦ୍ର ସରକାରଙ୍କ ଉପରେ ଅସନ୍ତୁଷ୍ଟ ଅଛନ୍ତି।
