ଝାରସୁଗୁଡ଼ା ଅଫିସ,୫ା୧୧: ଝାରସୁଗୁଡ଼ା ଜିଲା ବାଗଡିହି ରେଞ୍ଜ ଅଧୀନ ଭଉଁରା ଗ୍ରାମ ନିକଟରେ ଗୁରୁବାର ରାତିରେ ଏକ ଅଭାବନୀୟ ଘଟଣା ଘଟିଛି। ମା’ବାପାଙ୍କ ଆଗରେ ଏକ ଦନ୍ତାହାତୀ ଦୁଇ ନାବାଳକ ଭାଇଙ୍କୁ ଦଳି ମାରିଦେଇଛି। ମୃତକ ଦ୍ୱୟ ହେଲେ ଛତିଶଗଡ଼ ଶକ୍ତି ଅଞ୍ଚଳର ଅଭୟ ସତନାମୀ(୧୧) ଓ ଧନଞ୍ଜୟ ସତନାମୀ (୯)। ପିଲାଙ୍କୁ ଉଦ୍ଧାର କରିବାକୁ ଯାଇ ମା’ବାପା ଗୁରୁତର ହୋଇଛନ୍ତି। ମା’ ଲାହରା ବାଈ ସତନାମୀ(୩୪)ଙ୍କ ଡାହାଣ ହାତ ଭାଙ୍ଗିଥିବାବେଳେ ଓ ବାପା ଉମେଶ ରାମ ସତନାମୀ(୩୬)ଙ୍କ ଶରୀରର ବିଭିନ୍ନ ସ୍ଥାନରେ ଆଘାତ ଲାଗିଛି। ଉଭୟେ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି। ଲଇକେରା ପୋଲିସ ଦୁଇ ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଡାକ୍ତରଙ୍କ ଅଭିଯୋଗକୁ ଭିତ୍ତିକରି ପୋଲିସ କେସ୍ ନଂ.୨୧ ଓ ୨୨/୨୨ରେ ପୃଥକ୍ ମାମଲା ରୁଜୁକରି ତଦନ୍ତ ଚଳାଇଛି। ଦମ୍ପତିଙ୍କ ୧୬ବର୍ଷର ଝିଅ ଅର୍ମିତା ସେଦିନ ରାତିରେ ନିକଟରେ ରହୁଥିବା ସମ୍ପର୍କୀୟକଙ୍କ କୁଡିଆରେ ରହିଥିବାରୁ ବର୍ତ୍ତିଯାଇଛନ୍ତି।
ସୂଚନା ଅନୁସାରେ ଛତିଶଗଡ଼ ଶକ୍ତି ଅଞ୍ଚଳର ଏହି ଦମ୍ପତି ପରିବାର ପ୍ରତିପୋଷଣ ପାଇଁ ଝିଅ ଓ ୨ପୁଅଙ୍କୁ ସାଙ୍ଗରେ ଧରି ଇଟାଗଢ଼ିବା ପାଇଁ ଓଡ଼ିିଶାକୁ ଆସିଥିଲେ। ଏହି ଶ୍ରମିକ ପରିବାର କିର୍ମିରା ବ୍ଲକ୍ ଭଉଁରା ଗ୍ରାମ ନିକଟରେ ଏକ ପଲିଥିନ କୁଡିଆକରି ରହୁଥିଲେ। ପ୍ରତିଦିନ ଭଳି ଦମ୍ପତି ଗୁରୁବାର ଇଟା ଗଢିବା ପରେ ରାତିରେ ଖାଇପିଇ ଶୋଇଥିଲେ। ରାତି ପ୍ରାୟ ୧୦ଟାରେ ଏକ ଦନ୍ତାହାତୀ ଆସି ପ୍ରଥମେ ପଲିଥିନ କୁଡିଆକୁ ଶୁଣ୍ଢରେ ଭାଙ୍ଗିଥିଲା। ଏଥିରେ ଦମ୍ପତି ଭୟଭୀତ ହୋଇ କୁଡିଆରୁ ବାହାରି ଆସିଥିଲେ। ହେଲେ ଦୁଇ ସନ୍ତାନ ଭିତରେ ରହିଯାଇଥିଲେ। ପରେ ହାତୀଟି ସେମାନଙ୍କୁ ଦଳିଦେଇଥିଲା। ଦମ୍ପତି ପାଟିକରି ସେମାନଙ୍କୁ ଉଦ୍ଧାର କରିବାକୁ ଚେଷ୍ଟା କରି ବିଫଳ ହୋଇଥିଲେ। ପାଟି ଶୁଣି ନିକଟରେ ରହୁଥିବା ଶ୍ରମିକମାନେ ଉଠି ହାତୀକୁ ଘଉଡାଇଥିଲେ। ଖବରପାଇ ବନ କର୍ମଚାରୀ ଏକ ଆମ୍ବୁଲାନ୍ସ ଯୋଗେ ଆହତ ଦମ୍ପତି ଓ ୨ସନ୍ତାନଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ସେଠାରେ ଡାକ୍ତର ଦୁଇଭାଇଙ୍କୁ ମୃତ ଘୋଷଣା କରିଥିଲେ। ଏ ନେଇ ଡିଏଫ୍ଓ ଲଳିତ ପାତ୍ର କହିଛନ୍ତି, ଏହାର ତଦନ୍ତ କରାଯାଇ ମୃତକଙ୍କ ପରିବାରଙ୍କୁ ସରକାରଙ୍କ ତରଫରୁ କ୍ଷତିପୂରଣ ପ୍ରଦାନ କରାଯିବ। ସେ ଆହୁରି କହିଛନ୍ତି, ୨ସପ୍ତାହ ହେଲା ଏକ ହାତୀପଲ ସୁନ୍ଦରଗଡ ଓ ଝାରସୁଗୁଡା ଜିଲା ସୀମାନ୍ତରେ ଚଳପ୍ରଚଳ କରୁଛନ୍ତି। ଏହି ପଲରେ ୭ହାତୀ ରହିଛନ୍ତି। ହେଲେ ଏକ ଦନ୍ତା ବିଭିନ୍ନ ସମୟରେ ଘରଦ୍ୱାର ଭାଙ୍ଗି ଆତଙ୍କ ଖେଳାଉଛି। ୨ମାସ ତଳେ ଜଣେ ବୃଦ୍ଧା ଶୌଚକରି ଫେରୁଥିବାବେଳେ ତାଙ୍କୁ ଦନ୍ତା କଚାଡି ମାରିଥିଲା। ବନ ବିଭାଗ ହାତୀ ପଲଙ୍କ ଉପରେ ନଜର ରଖିବା ସହ ସ୍ଥାନୀୟ ଲୋକଙ୍କୁ ସଚେତନ କରାଉଛି। ଏହି ଅଞ୍ଚଳ ହାତୀ ଚଲାପଥ ହୋଇଥିବାରୁ ଏଠାରେ ରହିବା ପାଇଁ ବାରଣ କରାଯାଇଛି। ହେଲେ ଏହାକୁ ଲୋକେ ମାନୁନାହାନ୍ତି ବୋଲି ସେ କହିଛନ୍ତି।
