କେନ୍ଦୁଝର,୮ା୭(ନରେଶ ଚନ୍ଦ୍ର ପଟ୍ଟନାୟକ): ଝୁମ୍ପୁରା ବ୍ଲକ ଅନ୍ତର୍ଗତ ବଡ଼ନେଉଳି ସରକାରୀ ନୋଡାଲ ଉଚ୍ଚ ବିଦ୍ୟାଳୟରୁ ରାତିରେ ଦୁଇ ଜଣ ଛାତ୍ର ଲୁଚି ପଳେଇ ଆସିଥିବା ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। କେନ୍ଦୁଝର ସହରରେ ସ୍ଥାନୀୟ ଲୋକମାନେ ଦୁଇ ଛାତ୍ରଙ୍କୁ ଶନିବାର ସକାଳେ ଦେଖିବାକୁ ପାଇଥିଲେ। ତେବେ କେନ୍ଦୁଝର ଟାଉନରୁ ଉକ୍ତ ସ୍କୁଲ ୩୦ କିମି ବୋଲି ଜଣାପଡ଼ିଛି।
ଏହି ଘଟଣା ପରେ ଜିଲା ଶିକ୍ଷାଧିକାରୀ ପୂର୍ଣ୍ଣଚନ୍ଦ୍ର ସେଠୀ କହିଛନ୍ତି, ସେମାନେ ତିନି ଦିନ ହେଲା ସ୍କୁଲ ଯାଉଥିଲେ ଓ ହଷ୍ଟେଲରେ ରହୁଥିଲେ। ଏଣୁ କାହିଁକି ଗଲେ ତାହାର ତଦନ୍ତ ପାଇଁ ଆଦେଶ କରାଯାଇଛି। ତାଙ୍କର ବାପାଙ୍କୁ ଡକାଯାଇ କଥାବାର୍ତ୍ତା କରାଯିବ। ଯଦି ପିଲାଙ୍କୁ ଏଠାରେ ଭଲ ଲାଗୁନାହିଁ ତେବେ ଘର ପାଖ ସ୍କୁଲରେ ନାମ ଲେଖାଇବାକୁ କୁହାଯିବ।
ଅନ୍ୟପକ୍ଷରେ ରାତି ଅଧରେ ଦୁଇ ନାବାଳକ ଛାତ୍ର ସ୍କୁଲ ପରିସରରୁ ଏପରି ଲୁଚି ପଳେଇ ଆସିଥିଲେ ହେଁ କିପରି କେହି ଜାଣି ପାରିଲେ ନାହିଁ ତାହାକୁ ନେଇ ପିଲାମାନଙ୍କ ସୁରକ୍ଷାକୁ ନେଇ ଅଭିଭାବକ ପ୍ରଶ୍ନ କରୁଛନ୍ତି। ତେବେ ହଷ୍ଟେଲରେ ଓ୍ବାଡନ ରହୁଛନ୍ତି କି ନାହିଁ ତଦନ୍ତ କରିବା ସହ କେଉଁ କାରଣରୁ ଲୁଚି ପକାଇ ଆସିଥିଲେ ତାହାର ତଦନ୍ତ ଦାବି ହେଉଛି। କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି।
ପ୍ରକାଶ ଯେ, ଅନେକ ସ୍କୁଲରେ ଶିକ୍ଷକମାନେ ରହୁ ନାହାନ୍ତି। ଜଣେ ରହିଲେ ଅନ୍ୟ ଜଣେ ଦିନ ଦିନ ଧରି ଘରକୁ ପଳାଉଛନ୍ତି। ଏ ନେଇ ଦାୟିତ୍ୱରେ ଥିବା ଅଧିକାରୀମାନେ ଜାଣି ଚୁପ୍ ରହୁଛନ୍ତି। ଯଦି ଗ୍ରାମବାସୀ ଓ ପିଲାଙ୍କୁ ପଚରାଯାଏ ତେବେ ସତ୍ୟାସତ୍ୟ ଜଣାପଡ଼ିବ। ନଚେତ ପିଲାଙ୍କ ପାଠପଢ଼ା ବ୍ୟାହତ ହେବା ସହ ସୁରକ୍ଷା ବ୍ୟବସ୍ଥାରେ ସମସ୍ୟା ଉପୁଜିବ ବୋଲି ମତ ପ୍ରକାଶ ପାଉଛି।
