ଜୁନାଗଡ଼,୨୩।୬(ଡି.ଏନ୍.ଏ.): କଳାହାଣ୍ଡି ଜିଲା ଜୁନାଗଡ଼ ସହର ଗୋତିପଡ଼ା ରାମମନ୍ଦିର ଛକନିକଟରେ ଏସ୍ିଡ ମାଡ଼ରେ ୨ଜଣ ବ୍ୟକ୍ତି ଗୁରୁତର ଆହତ ହୋଇଛନ୍ତି। ସେମାନେ ହେଲେ ଗୋତିପଡ଼ାର ମୋହନଲାଲ ବିଶି ଓ ନିଳାମ୍ବର ମାଝୀ। ଘଟଣାରେ ସମ୍ପୃକ୍ତ ଥିବା ଅଭିଯୁକ୍ତ ସାନ୍ତନୁ ବିଶିଙ୍କୁ ପୋଲିସ ଗିରଫ କରି ଗୁରୁବାର କୋର୍ଟ ଚାଲାଣ କରିଛି।
ମିଳିଥିବା ସୂଚନା ଅନୁଯାୟୀ, ଜୁନାଗଡ଼ ସହର ଗୋତିପଡ଼ାର ମୋହନଲାଲ, ନିଳାମ୍ବର ଓ ଅଭିଯୁକ୍ତ ଶାନ୍ତନୁ ସାଙ୍ଗରେ ପ୍ଲମ୍ବର କାମ କରନ୍ତି। ହେଲେ ବିଭିନ୍ନ ସମୟରେ ଶାନ୍ତନୁ ମଦ୍ୟ ପାନ କରି ମୋହନଲାଲ ଓ ନିଳାମ୍ବରଙ୍କ ସହ ପାଟିତୁଣ୍ଡ କରୁଥିଲେ। ଏଥିଯୋଗୁ ଶାନ୍ତନୁଙ୍କୁ ସେମାନେ ସାଙ୍ଗରେ ନେବାକୁ ମନା କରିଦେଇଥିଲେ।
ଏଥିରେ ଉତ୍କ୍ଷିପ୍ତ ହୋଇ ଶାନ୍ତନୁ ବୁଧବାର ପୂର୍ବାହ୍ନରେ ଗୋତିପଡ଼ା ରାମମନ୍ଦିର ଛକ ନିକଟରେ ମୋହନଲାଲ ଓ ନିଳାାମ୍ବରଙ୍କୁ ଏସ୍ଡି ମାଡ କରିଥିଲେ। ଫଳରେ ଉଭୟେ ଗୁରୁତର ଆହତ ହୋଇଛନ୍ତି। ସେମାନଙ୍କୁ ଜୁନାଗଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ଚିକତ୍ସିତ ହେବା ପରେ ସେମାନେ ଏବେ ଘରକୁ ଫେରିଥିବା ଜଣାପଡିଛି। ଏସିଡ୍ ମାଡରେ ମୋହନଲାଲଙ୍କ ମୁହଁ ଓ ହାତ ପୋଡିଯାଇଥିବା ବେଳେ ନିଳାମ୍ବରଙ୍କ ପିଠି ପୋଡିଯାଇଛି। ସେହି ସମୟରେ ତାଙ୍କ ନିକଟରେ ଥିବା ଅନ୍ୟଜଣେ ବ୍ୟକ୍ତି ଅଶୋକ ବୈଠାରୁଙ୍କ ଗୋଡରେ ମଧ ଏସିଡ୍ ପଡି ଗୁରୁତର ଆହତ ହୋଇଛନ୍ତି। ଏନେଇ ଥାନାରେ ଏକ ଅଭିଯୋଗ ହୋଇଛି। ପୋଲିସ ଏକ ମାମଲା(ନଂ.୨୭୭/୨୨) ରୁଜୁ କରି ଘଟଣାରେ ସମ୍ପୃକ୍ତ ଥିବା ଶାନ୍ତନୁଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି ବୋଲି ଥାନା ଏସ୍ଆଇ ସୋନୁ ଖାଲୋକୋ କହିଛନ୍ତି।
