ଖଇରା,୨।୬(ଡି.ଏନ.ଏ.): ବାଲେଶ୍ୱର ଜିଲା ଖଇରା ଓ ସିମୁଳିଆ ୨ ବ୍ଲକକୁ ସଂଯୋଗ କରୁଥିବା ଓଝାପୋଖରୀ-ଅଡା ଭାୟା ସାରଡାଙ୍ଗ ରାସ୍ତା ନିର୍ମାଣକୁ ନେଇ ସରକାରଙ୍କ ୨ବିଭାଗ ମଧ୍ୟରେ ଟଣାଓଟରା ଲାଗି ରହିଛି। ଗ୍ରାମ୍ୟ ଉନ୍ନୟନ ବିଭାଗ ବଦଳରେ ପୂର୍ତ୍ତ ବିଭାଗ ଦ୍ୱାରା ରାସ୍ତା ସମ୍ପର୍ଣ୍ଣ କରାଯିବାକୁ ଓଝାପୋଖରୀ, ନନ୍ଦୁର, ଅସୁରିଆ, ସାରଡାଙ୍ଗ, ମିର୍ଜାପୁର, ଭୋଗୁପୁର ଓ ଅଡା ଆଦି ଗ୍ରାମର ବାସିନ୍ଦା ଦାବି କରିଛନ୍ତି। ଯଦି ସମ୍ପୃକ୍ତ ଠିକାଦାର ତରବରିଆ ଭାବେ କାର୍ଯ୍ୟ ଜାରି ରଖନ୍ତି, ତେବେ ଶହ ଶହ ଗ୍ରାମବାସୀ ଅନଶନରେ ବସିବାକୁ ଚେତାବନୀ ଦେଇଛନ୍ତି।
୨୦୨୨ ଡିସେମ୍ବରରେ ଗ୍ରାମ ଉନ୍ନୟନ ବିଭାଗ ଅଧୀନରେ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନାରେ ଅନ୍ତର୍ଭୁକ୍ତ ଉକ୍ତ ରାସ୍ତାର ପ୍ରଶସ୍ତୀକରଣ ଓ ଉନ୍ନତିକରଣ ପାଇଁ ୪ କୋଟି ୮୮ଲକ୍ଷ ଟଙ୍କା ମଞ୍ଜୁରୀ ମିଳିଥିଲା। ଡିସେମ୍ବର ୧୨ତାରିଖରେ ଏହି ରାସ୍ତାର ଶିଳାନ୍ୟାସ ହୋଇଥିଲା। ଶିଳାନ୍ୟାସର କିଛିଦିନ ମଧ୍ୟରେ ଠିକାଦାର କାର୍ଯ୍ୟ ଆରମ୍ଭ କରିଥିଲେ। ଭୋଗୁପୁରଠାରୁ ସାରଡାଙ୍ଗ ମଧ୍ୟରେ ଚାଲିଥିବା ଏହି କାର୍ଯ୍ୟ ଅତ୍ୟନ୍ତ କଦର୍ଯ୍ୟ ଓ ନିମ୍ନମାନର ହେଉଥିବା ଅଭିଯୋଗ ଆଣି ସାରଡାଙ୍ଗ ଗ୍ରାମର ମନୋରଞ୍ଜନ ପଣ୍ଡା ଜାନୁୟାରୀ ୯ତାରିଖରେ ଜିଲାପାଳଙ୍କ ଅଭିଯୋଗ ପ୍ରକୋଷ୍ଠରେ ଅଭିଯୋଗ କରିବା ପରେ ତଦନ୍ତ ପାଇଁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଥିଲା। ସେହିଦିନଠାରୁ ଠିକାଦାରଙ୍କୁ ଆଉ ଆଗକୁ କାର୍ଯ୍ୟ କରିବା ଉପରେ ଅଙ୍କୁଶ ଲଗାଯାଇଥିଲା। ୫ମାସ ଧରି କାମ ବନ୍ଦ ରହିଥିଲା। ସେପଟେ ଗ୍ରାମବାସୀ ଭଲ କାମ ପାଇଁ ପୂର୍ତ୍ତ ବିଭାଗକୁ ହସ୍ତାନ୍ତର ପାଇଁ ଦାବି କରିବା ପରେ ବିଧାୟକ ଜ୍ୟୋତି ପ୍ରକାଶ ପାଣିଗ୍ରାହୀଙ୍କ ପ୍ରଚେଷ୍ଟା ପରେ ଏବେ ନିକଟରେ ୧୯କି.ମି. ରାସ୍ତା ପୂର୍ତ୍ତ ବିଭାଗ ଅଧୀନକୁ ଆସିବା ପରେ ଟେଣ୍ଡର ପ୍ରକ୍ରିୟା ଆରମ୍ଭ ହୋଇଛି। ଉକ୍ତ ରାସ୍ତା ହାତରୁ ଖସିଯିବା ଭୟରେ ଗ୍ରାମ୍ୟ ଉନ୍ନୟନ ବିଭାଗ ଠିକାଦାରଙ୍କ ଉପରେ ଚାପ ପକାଇ ୧୦ଦିନ ତଳୁ ତରବରିଆ ଭାବେ କାର୍ଯ୍ୟ ଆରମ୍ଭ କରିଛନ୍ତି। ପୁଣିଥରେ କାମ ନିମ୍ନମାନର ହେଉଥିବା ନେଇ ସାରଡାଙ୍ଗ ଗ୍ରାମର ଜ୍ୟୋତିପ୍ରକାଶ କର, ରଘୁନାଥ ଘଡେଇ, ସନ୍ତୋଷ କୁମାର ନାୟକ, ଧୀରେନ କୁମାର ସେଣ୍ଡ ପ୍ରମୁଖ ଅଭିଯୋଗ କରିଛନ୍ତି। ଉକ୍ତ କାର୍ଯ୍ୟକୁ ତୁରନ୍ତ ବନ୍ଦ କରି ପୂର୍ତ୍ତବିଭାଗକୁ ହସ୍ତାନ୍ତର ପାଇଁ ଦାବି କରିଛନ୍ତି। ଗ୍ରାମ୍ୟ ଉନ୍ନୟନ ବିଭାଗର ନିର୍ବାହୀଯନ୍ତ୍ରୀ ପ୍ରତିରଞ୍ଜନ ସାମଲଙ୍କୁ ଯୋଗାଯୋଗ କରିବାରେ ରାସ୍ତାର ଯେତିକି ଅଂଶ ପ୍ରଧାନମନ୍ତ୍ରୀ ସଡକ ଯୋଜନାରେ ଅନ୍ତର୍ଭୁକ୍ତ ତାହା ବିଭାଗ ଦ୍ୱାରା ସମ୍ପୂର୍ଣ୍ଣ ହେବ। ବାକି ଅଂଶ ପୂର୍ତ୍ତ ବିଭାଗ ଦ୍ୱାରା ହେବ ବୋଲି କହିଛନ୍ତି।
