ମାଲକାନଗିରି,୯।୪(ଡି.ଏନ.ଏ.): ମାଲକାନଗିରି ଜିଲା ସୀମାନ୍ତ ଛତିଶଗଡ଼ର ସୁକ୍ମା ପୋଲିସ କୋମ୍ବିଂ ଅପରେଶନ ବେଳେ ୨ଜଣ ମାଓବାଦୀଙ୍କୁ ଶନିବାର ଗିରଫ କରିଛି। ସେମାନେ ହେଲେ ମୁଚାକି ସୁଖ୍ରାମ ଏବଂ ହଡମା ମାଡଭି। ସେମାନଙ୍କ ନାମରେ ପୂର୍ବରୁ ୧ ଲକ୍ଷ ଲେଖାଏ ଟଙ୍କାର ପୁରସ୍କାର ଘୋଷଣା ହୋଇଥିଲା। ମାଓବାଦୀ ଦମନ ଲାଗି ସୁକ୍ମା ପୋଲିସ କୁକାନାର ଅଞ୍ଚଳରେ କୋମ୍ବିଂ ଅପରେଶନ କରୁଥିବା ବେଳେ ମାଓବାଦୀଙ୍କ ଗତିବିଧି ନେଇ ସୂଚନା ପାଇଥିଲା। ପରେ ଜିଲା ପୋଲିସ ବାହିନୀ ଏବଂ ଡିଆରଜି ମିଳିତ ଭାବେ କୁକାନାରର କାନଭାପାରା ଏବଂ ପେଡାପାରା ଜଙ୍ଗଲରେ ମିଳିତ କୋମ୍ବିଂ ଅପରେଶନ କରିଥିଲେ। ଏହି ସମୟରେ କେତେ ଜଣ ସନ୍ଦିଗ୍ଧ ବ୍ୟକ୍ତି ଜଙ୍ଗଲକୁ ପୋଲିସ ଆସୁଥିବା ଦେଖି ଲୁଚିଯିବାକୁ ଉଦ୍ୟମ କରିଥିଲେ। ତେବେ ପୋଲିସ ତୁରନ୍ତ ସେମାନଙ୍କୁ କାବୁ କରି ପଚରାଉଚରା କରିଥିଲା। ଏହି ସମୟରେ ସେମାନେ ଉଭୟେ ମାଓବାଦୀ ବୋଲି ସ୍ବୀକାର କରିଥିଲେ। ଏହି ମାଓବାଦୀ ଦ୍ୱୟ ପୂର୍ବରୁ ଅନେକ ବଡ ବଡ ହିଂସାରେ ଜଡିତ ଥିବା ପୋଲିସ ସୂଚନା ଦେଇଛି।
