ଯାଜପୁର ଅଫିସ,୧।୬: ଯାଜପୁର ଜିଲା ଧର୍ମଶାଳା ତହସିଲ ଅନ୍ତର୍ଗତ ବେଆଇନ କଳାପଥର ଖାଦାନ ମରଣଯନ୍ତା ପାଲଟିଛି। ରାଜସ୍ବ ବିଭାଗ, କେତେଜଣ ପୋଲିସ ଅଧିକାରୀ ବେଆଇନ ଖାଦାନ ମାଲିକଙ୍କ ବିରୋଧ କାର୍ଯ୍ୟାନୁଷ୍ଠାନ ନେବା ବଦଳରେ ଓଲଟା ସହଯୋଗ କରୁଥିବାରୁ ନୀରିହ ଶ୍ରମିକମାନଙ୍କ ଜୀବନ ଯାଉଛି। ଏହି କ୍ରମରେ ମଙ୍ଗଳବାର ବିଳମ୍ବିତ ରାତିରେ ଜେନାପୁର ଥାନା ଅଧୀନ ଚଢ଼େଇଧରା ନିକଟରେ ଥିବା ଲୁଣିବର ମୌଜା ପଥର ଖାଦାନରେ ଅତଡା ଖସି ଜଣେ ଶିଶୁ ଶ୍ରମିକଙ୍କ ସମେତ ୨ ଜଣଙ୍କ ମୃତ୍ୟୁ ଘଟିଛି।
ସୂଚନା ଅନୁଯାୟୀ,ଲୁଣିବର ମୌଜାର ଏକ କଳାପଥର ଖାଦାନରେ ବିଳମ୍ବିତ ରାତିରେ ମେଶିନ ଲଗାଇ କଳାପଥର ଲୁଟ୍ ହେଉଥିଲା। ସେଠାରୁ ବିପୁଳ ପରିମାଣର କଳାପଥର ଚୋରାଚାଲାଣ ହୋଇସାରିଥିଲା। ସରକାରଙ୍କ ଏହି ମୂଲ୍ୟବାନ ସମ୍ପଦର ସୁରକ୍ଷା ଦାୟିତ୍ୱରେ ଥିବା ପୋଲିସ ଓ ତହସିଲ ପ୍ରଶାସନ ଜାଣିଶୁଣି ଆଖି ବୁଜି ଦେଇଥିଲେ। ମଙ୍ଗଳବାର ବିଳମ୍ବିତ ରାତିରେ ଉକ୍ତ ବେଆଇନ ଖାଦାନରେ ପଥର ବ୍ୟବସାୟୀ ମେଶିନ ଅପରେଟର କେନ୍ଦୁଝର ଜିଲା ତେଲକୋଇ ଗ୍ରାମର ଶାନ୍ତନୁ ଖିଲାରଙ୍କ ସହ ଜଣେ ଶିଶୁ ଶ୍ରମିକ ଓ ଅନ୍ୟମାନଙ୍କୁ କାମରେ ନିୟୋଜିତ କରିଥିଲେ। ବ୍ଲାଷ୍ଟିଂ କରି ସାରିବା ପରେ ମେଶିନରେ ପଥର ଉତ୍ତୋଳନ କରି ଗାଡ଼ିରେ ଅପ୍ଲୋଡିଂ ଚାଲିଥିଲା। ଏହି ସମୟରେ ଉପରୁ ହଠାତ୍ ପଥର ଅତଡା ଖସି ମେଶିନ ଅପରେଟର ଖିଲାର ଏବଂ ଶିଶୁ ଶ୍ରମିକଙ୍କ ଉପରେ ପଡିଥିଲା। ଫଳରେ ମେଶିନ ଅପରେଟର ଖିଲାରଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ଶିଶୁ ଶ୍ରମିକଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ବଡ ମେଡିକାଲ ସ୍ଥାନାନ୍ତର କରାଯାଇଥିଲା। କିଛି ସମୟ ପରେ ସେହି ଶିଶୁ ଶ୍ରମିକଙ୍କ ମଧ୍ୟ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିଲା।
ଖବର ପାଇ ଜେନାପୁର ଥାନା ପୋଲିସ ପହଞ୍ଚି ତଦନ୍ତ ଜାରି ରଖିଛି। ଗତ ପ୍ରାୟ ୭ରୁ ୮ ବର୍ଷ ମଧ୍ୟରେ ଏପରି ବେଆଇନ କଳାପଥର ଖାଦାନରେ ୨୫ରୁ ଊର୍ଦ୍ଧ୍ୱ ଶ୍ରମିକ ଓ ଅପରେଟରଙ୍କ ଜୀବନ ଯାଇଛି। ଅଧିକାଂଶ ଦୁର୍ଘଟଣା ପରେ ମୃତକଙ୍କ ପରିବାରବର୍ଗଙ୍କୁ କିଛି ପ୍ରଲୋଭନ ଦେଖାଇ ମାମଲାଗୁଡିକୁ ଚାପି ଦିଆଯାଇଛି। କେତେକାଂଶରେ ପଥର ବ୍ୟବସାୟୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇଥିଲେ ହେଁ ବେଆଇନ ଖାଦାନଗୁଡିକୁ ବନ୍ଦ କରିବାକୁ ସେତେଟା ଉଦ୍ୟମ କରାଯାଇନାହିଁ। ଫଳରେ ମୃତକଙ୍କ ସଂଖ୍ୟା କ୍ରମଶଃ ବୃଦ୍ଧି ପାଉଥିବା ମତପ୍ରକାଶ ପାଇଛି।
