ଭଞ୍ଜନଗର,୨୨ା୮(ବାବୁଲା ପ୍ରଧାନ): ବେଲଗୁଣ୍ଠା ବ୍ଲକ ଇଙ୍ଗିନାଠି ସେବା ସମବାୟ ସମିତି (ସୋସାଇଟି)ରେ ଜମାକାରୀଙ୍କ ନାମରେ ପ୍ରାୟ ୨ କୋଟିରୁ ଊର୍ଦ୍ଧ୍ୱ ଟଙ୍କା ଠକେଇ ହୋଇଥିବା ଅଭିଯୋଗ ହୋଇଛି। ସୋମବାର ସମ୍ପୃକ୍ତ ପଞ୍ଚାୟତର ଚାଷୀମାନେ ଭଞ୍ଜନଗର ଜନଶୁଣାଣି ଶିବିରକୁ ଆସିଥିବା ଗଞ୍ଜାମ ଏସପି ଜଗମୋହନ ମୀନାଙ୍କୁ ଭେଟି ଘଟଣା ସମ୍ପର୍କରେ ଅଭିଯୋଗ କରିଛନ୍ତି। ଏନେଇ ଆବଶ୍ୟକ ପଦକ୍ଷେପ ନେବାକୁ ଏସ୍ପି ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ଏହାପରେ ବେଲଗୁଣ୍ଠା ପୋଲିସ ସୋମବାର ଅପରାହ୍ନରେ ଜଣେ ଅବସରପ୍ରାପ୍ତ ସମ୍ପାଦକଙ୍କୁ ଅଟକ ରଖି ପଚରାଉଚରା ଚଳାଇଛି।
ସୂଚନାଯୋଗ୍ୟ, ଇଙ୍ଗିନାଠି ସୋସାଇଟିରେ ୨୦୧୫ ରୁ ୨୦୧୬ ମଧ୍ୟରେ ୧୭୩ ଚାଷିଙ୍କ ଅଜାଣତରେ ସମ୍ପାଦକ ଏବଂ ଅନ୍ୟ କର୍ମଚାରୀମାନେ ୧ କୋଟି ୬୨ ଲକ୍ଷ ଟଙ୍କା ଚାଷିଙ୍କ ନାମରେ ଋଣ କରି ଟଙ୍କା ଠକି ନେଇଥିଲେ। ଚାଷୀମାନେ ଅଂଶଧନ ଟଙ୍କା ୧୦ ପ୍ରତିଶତ ବାନ୍ଧି ନାହାନ୍ତି ତଥାପି ସେମାନଙ୍କ ନାମରେ ଋଣ ଅନୁମୋଦନ ହୋଇଛି। ବର୍ତ୍ତମାନ ମୂଳଧନ ଏବଂ ସୁଧ ବାବଦକୁ ୨ କୋଟି ଟଙ୍କା ହୋଇଗଲାଣି। ତେଣୁ ଦୋଷୀ କର୍ମଚାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ସହ ଋଣ ଟଙ୍କା ଛାଡ କରିବାକୁ ଚାଷୀମାନେ ଦାବି କରିଛନ୍ତି। ପ୍ରକାଶ ଯେ, ଗତବର୍ଷ ବଳରାମ ଯୋଜନା ଲାଗୁ ହେବା ପରେ କିଛି ଚାଷୀ ଉକ୍ତ ଯୋଜନାର ସୁଫଳ ନେବା ପାଇଁ ସୋସାଇଟିରେ ଆବେଦନ କରିଥିଲେ। ଏହି ସମୟରେ ସେମାନଙ୍କ ନାମରେ ପୂର୍ବରୁ ବ୍ୟାଙ୍କରେ ବକେୟା ଋଣ ଗଡୁଥିବା ଯୋଗୁ ଯୋଜନାର ସୁଫଳ ପାଇପାରିନଥିଲେ। ସେମାନେ ପୂର୍ବରୁ ଋଣ ଆବେଦନ କରିନଥିବା ବେଳେ କିଭଳି ଏତେ ଟଙ୍କା ରୁଣ ହୋଇଛି ସେ ନେଇ ଗତ ୪ ତାରିଖରେ ଚାଷୀମାନେ ବେଲଗୁଣ୍ଠା ଥାନାରେ ଅଭିଯୋଗ କରିଥିଲେ। କିନ୍ତୁ ପୋଲିସ ବିଭିନ୍ନ ଆଳ ଦେଖାଇ ଏତଲାକୁ ଗ୍ରହଣ କରିନଥିଲା। ତେଣୁ ଚାଷୀମାନେ ଏକାଠି ହୋଇ ଏସ୍ପିଙ୍କୁ ଭେଟି ଘଟଣା ସମ୍ପର୍କରେ ଅଭିଯୋଗ କରିଥିଲେ। ଅନ୍ୟପକ୍ଷରେ ଅନେକ ଚାଷୀ ସୋସାଇଟି ସମ୍ପାଦକଙ୍କ ପାଖରେ ନିଜର ବ୍ୟାଙ୍କ ଖାତା, ଚେକ ବହି ରଖି ଦେଉଛନ୍ତି। ଆବଶ୍ୟକ ପଡିଲେ ସମ୍ପାଦକମାନେ ଚାଷିଙ୍କ ଦସ୍ତଖତ ନେଇଥାନ୍ତି। କିନ୍ତୁ ଚାଷୀମାନେ ଦସ୍ତଖତ କେଉଁଠି କାହିଁକି ମାରିଲେ ଅଶିକ୍ଷିତ ହେଉ ଅବା ବିଶ୍ୱାସରେ ଆଉ ଯାଞ୍ଚ କରୁନାହାନ୍ତି। ପରବର୍ତ୍ତୀ ପର୍ଯ୍ୟାୟରେ ଦୁର୍ନୀତିଗ୍ରସ୍ତ କର୍ମଚାରୀମାନେ ଚାଷିଙ୍କ ନାମରେ ବ୍ୟାଙ୍କରୁ ଟଙ୍କା ଠକି ନେଉଛନ୍ତି ବୋଲି ଅଭିଯୋଗ ହୋଇଛି।
