ଝାରସୁଗୁଡ଼ା ଅଫିସ,୨୦ା୭: ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ବିଭାଗ ମଙ୍ଗଳବାର କଳାହାଣ୍ଡି ଜିଲା ଭବାନୀପାଟଣା ସରକାରୀ ପଲିଟେକ୍ନିକ କଲେଜ ଅଧ୍ୟକ୍ଷ ସୂର୍ଯ୍ୟ ନାରାୟଣ ରାୟଙ୍କ ଘରେ ଚଢ଼ାଉ କରିଛି। ତାଙ୍କ କଲେଜ କାର୍ଯ୍ୟାଳୟ, ପୈତୃକ ଘର କେନ୍ଦ୍ରାପଡ଼ା ଜିଲା ନିଆଳି ଥାନାର ଉଜଙ୍ଗ, ସୁନ୍ଦରଗଡ଼ରେ ସ୍ତ୍ରୀଙ୍କ କାର୍ଯ୍ୟାଳୟ, ଭୁବନେଶ୍ୱରରେ ଥିବା ପ୍ଲଟ ଆଦି ୬ ସ୍ଥାନରେ ଏକାଥରେ ଚଢ଼ାଉ କରିଥିଲା ଭିଜିଲାନ୍ସ ଟିମ୍।
ପୂର୍ବରୁ ଅଧ୍ୟକ୍ଷ ରାୟ ଝାରସୁଗୁଡ଼ା ଇଞ୍ଜିନିୟରିଂ ସ୍କୁଲ୍ରେ ମେକାନିକାଲ୍ ଅଧ୍ୟାପକ ଭାବେ କାମ କରୁଥିଲେ। ଗତ ଏପ୍ରିଲରେ ସେ ସେଠାରୁ ବଦଳି ହୋଇ ଭବାନୀପାଟଣା ସରକାରୀ ପଲିଟେକ୍ନିକ କଲେଜରେ ଅଧ୍ୟକ୍ଷ ଭାବେ ନିଯୁକ୍ତି ପାଇଛନ୍ତି। ତାଙ୍କ ସ୍ତ୍ରୀ ସୁଚିଶ୍ମିତା ପାଠୀ ପୂର୍ବରୁ ଝାରସୁଗୁଡ଼ାରେ କ୍ଷୁଦ୍ର ଜଳସେଚନ (ଏମ୍ଆଇ) ବିଭାଗରେ ଆସିଷ୍ଟାଣ୍ଟ ଇଞ୍ଜିନିୟର ଥିଲେ। ଏବେ ସେ ସୁନ୍ଦରଗଡ଼ରେ ଏମ୍ଆଇ ଆସିଷ୍ଟାଣ୍ଟ ଇଞ୍ଜିନିୟର ଭାବେ କାର୍ଯ୍ୟରତ। ଉଭୟଙ୍କ ନାମରେ ଝାରସୁଗୁଡ଼ା ୟୁନିଟ୍ରେ ୩ଟି ଦୁଇମହଲା କୋଠା, ୭ ପ୍ଲଟ୍, ବ୍ୟାଙ୍କ ଓ ପୋଷ୍ଟ ଅଫିସରେ ୭୦ଲକ୍ଷ ଟଙ୍କାର ଜମା, ନଗଦ ୩୦ ହଜାର ଟଙ୍କା, ୧ ଲକ୍ଷ ୨୦ହଜାର ଟଙ୍କାର ଅଳଙ୍କାର, ଗୋଟିଏ ମାରୁତି କାର୍ ରହିଛି। ସମୁଦାୟ ସମ୍ପତ୍ତିର ମୂଲ୍ୟ ୨କୋଟିରୁ ଊର୍ଦ୍ଧ୍ୱ ହେବ ବୋଲି ଭିଜିଲାନ୍ସ ବିଭାଗ ତରଫରୁ କୁହାଯାଇଛି।
ରାଉରକେଲା ଭିଜିଲାନ୍ସ ଏସ୍ପି ସାରା ଶର୍ମାଙ୍କ ନିର୍ଦ୍ଦେଶକ୍ରମେ ଡିଏସ୍ପି ବୀରେନ୍ଦ୍ର କୁମାର ନାୟକଙ୍କ ନେତୃତ୍ୱରେ ଝାରସୁଗୁଡ଼ା, ରାଉରକେଲା, ଦେବଗଡ଼ ଓ ସୁନ୍ଦରଗଡ଼ ଭିଜିଲାନ୍ସ ବିଭାଗର ଅଧିକାରୀଙ୍କୁ ନେଇ ୬ଟି ଟିମ୍ କରାଯାଇଥିଲା। ଏଥିରେ ସୁନ୍ଦରଗଡ଼ ଡିଏସ୍ପି ସୁଧାଂଶୁ ଶେଖର ପୂଜାରୀ, ଝାରସୁଗୁଡ଼ା ଡିଏସ୍ପି ପ୍ରଦୀପ କୁମାର ଆଇନ୍ଦ, ଦେବଗଡ଼ ଡିଏସ୍ପି ଜଗଦୀଶ ପ୍ରସାଦ ପଟେଲ, ରାଉରକେଲା ଡିଏସ୍ପି କାଦମ୍ବିନୀ ସାମଲ, ଇନ୍ସପେକ୍ଟର ରଶ୍ମିତା ଲାକ୍ରା, ଅଭୟ ପ୍ରଧାନ, ସୁଧୀର ସାହୁ ପ୍ରମୁଖ ସାମିଲ ଅଛନ୍ତି।
