ପରଜଙ୍ଗ, ୨୩।୮(ଡି.ଏନ.ଏ.)-ଢେଙ୍କାନାଳ ଜିଲା ପରଜଙ୍ଗ ଥାନା ମହାବିରୋଡ ଫାଣ୍ଡି ଅଧୀନ ୧୪୯ନଂ. ଜାତୀୟ ରାଜପଥର ଭେଜିଆ ଛକ ନିକଟରେ ରବିବାର ଅପରାହ୍ନରେ ଦୁଃଖଦ ଦୁର୍ଘଟଣାରେ ୨ ଭଉଣୀଭାଇଙ୍କ ଜୀବନ ଯାଇଛି। ଏଥିରେ ଅନ୍ୟ ୬ଜଣ ଗୁରୁତର ହୋଇଛନ୍ତି। ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏକ କାର୍ (ଓଡ଼ି ୦୨ ଆର୍ ୨୯୪୪) ପିତିରିରୁ ପାଲଲହଡ଼ା ଅଭିମୁଖେ ଯାଉଥିବାବେଳେ ବିପରୀତ ପାର୍ଶ୍ୱରୁ ଆସୁଥିବା ଅନ୍ୟ ଏକ କାର୍ (ଓଆର୍ ୦୭ ଆର୍ ୩୦୩୦) ସହ ମୁହଁାମୁହିଁ ଧକ୍କା ହୋଇଥିଲା। ଏଥିରେ ପାଲଲହଡ଼ା ଅଭିମୁଖେ ଯାଉଥିବା କାର୍ଟି ରାସ୍ତା ତଳକୁ ଖସିପଡ଼ିଥିଲା। ଗାଡ଼ିରେ ବସିଥିବା ମିତାଲି ନାହାକ (୮), ନିଖିଳ ନାହାକ (୬)ଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ବାପା ଶିବଶଙ୍କର ନାହାକ (୩୮), ମା’ ଇତାରାନି ନାହାକ (୨୬), ସମ୍ପର୍କୀୟ ଲକ୍ଷ୍ମଣ ସାହୁ (୩୩) ଏବଂ ଡ୍ରାଇଭର ଗୁରୁତର ହୋଇଛନ୍ତି। ଏମାନେ ସମସ୍ତେ ଗଞ୍ଜାମ ଜିଲା। ସେହିପରି ଅନ୍ୟଗାଡ଼ିରେ ବସିଥିବା ଅନୁଗୋଳ ଜିଲା ବଳରାମପ୍ରସାଦର ସର୍ବେଶ୍ୱର ମହାନ୍ତି, ନଟବର ମହାନ୍ତି ଆହତ ହୋଇଛନ୍ତି। ଉଭୟେ ନାଲ୍କୋ କର୍ମଚାରୀ ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଛି। ଦଦରାଘାଟି ଫାଣ୍ଡି ଅଧିକାରୀ ସମରଜିତ ନାୟକ, ପରଜଙ୍ଗ ବ୍ଲକ ଯୁବ ବିଜେଡି ସଭାପତି ସୁବ୍ରତ ଦାସ ପ୍ରମୁଖ ପହଞ୍ଚତ୍ ସମସ୍ତଙ୍କୁ ଉଦ୍ଧାର କରି ୧୦୮ ଆମ୍ବୁଲାନ୍ସରେ ମଣ୍ଡାପାଳ ଡାକ୍ତରଖାନାକୁ ପଠାଇଥିଲେ।
